Gosota-Kəmkàrje 18
18
1Yeḛ gə́ unda rəa ŋgərəŋ lé
Saŋg né gə́ lelee-yeḛ ya ba,
Yeḛ ar mée ḭ səa jugugu dɔ nékəmkàr gə́ rara kara’g tɔ.
2Mbə-dəw lé ra rɔlel dɔ gosonégər’g el,
Nérɔlel ləa lé to mba riba dɔ takə̰jije ləa gə́ raga.
3Loo gə́ njemeeyèr ree keneŋ lé
Koo na̰ gə́ né el ree keneŋ tɔ,
Loo gə́ ta rɔkul teḛ ndá
Rɔkul gə́ boo orè gée tɔ.
4Taje gə́ teḛ ta dəw’g lé
To asəna gə mán gə́ uru bèe ləm,
Ŋgira kəmkàr lé kara
To asəna gə kəm-rəw-mán gə́ mán uba keneŋ tir-tir bèe ləm tɔ.
5Loo-gaŋg-rəwta lé maji koo njemeeyèr gə́ né
Mba kila ne ta dɔ njemeekarabasur’g lé bèe el#Ləb 19.15, TtG 1.17, GTK 24.23.
6Tapa mbə lé ree gə takɔl ləm,
Tea kara ɓar rɔ ləm tɔ.
7Tapa mbə lé to gin tuji-boo ləa ləm,
Tapeaje lé tel to gum kwá ləm tɔ.
8Tapaje lə njekunda nani lé to asəna gə nésɔ gə́ lel ləm,
D’aw saar teḛ rudu ŋgan siḭje’g ləm tɔ.
9Yeḛ gə́ ra kula ləa gə jiŋgaombadə lé
Yeḛ to ŋgoko̰ njetuji né.
10Ri Njesigənea̰ lé to gad-kəi-kaar-kɔgərɔ,
Njemeekarabasur aḭ iya rəa keneŋ si ne gə meekulɔm.
11Nébao lə bao lé
To asəna gə ɓee-boo ləa gə́ siŋgá tɔ,
Gə goo takə̰ji ləa lé
Yeḛ ée asəna gə ndògo-bɔrɔ gə́ ḭ gə́ tar yaa̰ bèe.
12Kédé ɓa kar tuji gə́ boo teḛ ɓəi lé
Dəw ti rəa mée’g,
Nɛ kula dɔ kédé ɓa rɔnduba orè gée ɓəi.
13Dəw gə́ ila ta’g ɓad ɓa oo ginee ɓəi lé
Ra némbə ar rɔkul dəb ne dəa’g.
14Takə̰ji lə dəw lé gədee dan rɔko̰’g,
Nɛ dəw gə́ rəa gaḭ ges lé see a gəd rəa to gə́ ban wa.
15Mee njegosonégər lé iŋga négər ləm,
Mbi njékəmkàrje lé saŋg négər ləm tɔ.
16Nékarnoji lə dəw lé ar rəw-kabee to ne tag bə̰dəŋ nea̰’g ləm,
Aree iŋga ne loo teḛ no̰ dəwje gə́ boo’g ləm tɔ.
17Yeḛ gə́ pata ləa kédé loo gaŋg rəwta’g lé
D’oo gə́ ta gə́ tɔgərɔ,
Nɛ yeḛ gə́ njeta ləa ree pa kea̰ ndá
D’ur gelee maji tɔ.
18Ra né to gə́ tḛ́ bèe ar takɔlje unda ne lɔd ləm,
Gaŋ ne rəwta mbuna njésiŋgamoŋje’g ləm tɔ.
19Gɔl ŋgako̰ na̰je gə́ tḭ na̰ lé
Kədərə yaa̰ unda gɔl ɓee-boo ləm,
Takɔlje lə dee kara
To asəna gə pəgərə-larje gə́ ta kəi-gad’g lə mbai ləm tɔ.
20Kandə ta gə́ teḛ ta dəw’g lé
Ar nésɔ as darəa nag-nag,
Taje gə́ yeḛ pa lé
La səa aree si ne kəmba.
21Kandə ta gə́ teḛ ta dəw’g lé
Askəm tel to nésikəmba ləa ləm gə gel yée ləm tɔ,
Yeḛ gə́ ndigi ta yaa̰ lé a koo keán tɔ.
22Yeḛ gə́ iŋga dené lé iŋga né gə́ maji,
To noji gə́ Njesigənea̰ ɓa wa səa ya.
23Njendoo lé ra ndòo ɓa kwɔi ne né,
Nɛ bao lé ila ta’g gə ta gə́ kədərə.
24Dəw gə́ baokuraje ləa bula lé
Tel to némeeko̰ ləa,
Nɛ baokura gə́ ɔm səi na̰’d sad lé
Unda ŋgokɔḭ tɔ.
Ngambai Bible © Alliance Biblique du Tchad 1989, 2015.