Nehemi 13
13
Mal kar dəwje d’aa dɔ godndu lé ra Nehemi ŋgwɔd-ŋgwɔd
1Mee ndəa’g neelé deḛ tura maktub lə Moyis kəm koso-dəwje’g lai ndá d’iŋga ta kára gə́ ndaŋg keneŋ pana: Dəw gə́ to gə́ ginkoji Amo̰’g əsé gə ginkoji Moab’g lé a kandə loo-mbo̰-dɔ-na̰’g lə dəwje lə Ala nda̰ el 2mbata deḛ tila kəm Israɛlje gə muru əsé gə mán el ləm, mbata deḛ tɔs ta Balaam gə lar mba karee ila ne ndɔl dɔ dee’g ləm tɔ, nɛ Ala lə sí ar ta ndɔl lé tel to ta tɔr ndu . 3Loo gə́ deḛ d’oo ta godndu lé ndá léegəneeya d’ɔr kəm dəwje lai gə́ dɔ ɓee’g mbuna Israɛlje’g d’unda dee ɓəd.
4Kédé ɓa kar néje nee teḛ ɓəi lé Eliasib, njekinjanéməs gə́ d’unda gə́ njekaa dɔ ŋgan kəije gə́ mee kəi-Ala’g lə sí lé yeḛ to njenoji lə Tobija 5ndá yeḛ unda kəi gə́ boi gə kəmee mbata lə Tobija, to kəi gə́ kédé d’unda nékarje gə́ to nduji ləm, gə néje gə́ ə̰də sululu ləm, gə nékulaje ləma, gə ta néje gə́ kun kára mee njé gə́ dɔg’d gə́ to kó gə mán-nduú gə ubu ləm tɔ keneŋ. Yee ɓa to né gə́ d’un gə goo godndu d’ar Ləbije ləm, gə njékɔspaje gə njéŋgəm takəije ləma, gə né gə́ d’ɔr dan mareeje’g mbata lə njékinjanéməsje ləm tɔ.
6Loo gə́ néje nee teḛ lé ndá ma m’godo Jerusalem mbata m’tel m’aw rɔ mbai’g mee ləb ko̰ɓee’g lə Artajerjɛs, mbai gə́ Babilɔn gə́ njekɔm’g rɔ-munda-giree-joo lé. 7Loo gə́ rudu ləb teḛ ndá ma m’dəji mbai m’aree ya̰ loo am m’tel m’aw Jerusalem. Bèe ɓa m’oo némajel gə́ Eliasib ra loo gə́ yeḛ unda ŋgon kəi mee gadloo gə́ wɔji dɔ kəi-Ala ar Tobija lé. 8Né neelé ar məəm o̰m yaa̰ ndá m’odo néje lai gə́ to ka̰ Tobija lé m’ɔm raga. 9M’un ndum mba kar dee d’ɔr won ŋgan kəije ndá m’tel m’unda nékulaje gə́ wɔji dɔ kəi-Ala ləm, gə nékarje gə́ to nduji gə néje gə́ ə̰də sululu ləm tɔ tor dee’g.
10Ma m’oo né gə́ raŋg ya tɔɓəi, to gə́ néje gə́ wɔji dɔ Ləbije lé d’ar dee el ndá ar Ləbije gə njékɔspaje gə́ ra kula lé d’aḭ ar nana kara aw dɔ naŋg’d ləa-ləa . 11Ma m’ndaŋg njéko̰ɓeeje m’pana: See gelee ban ɓa d’uba kəi-Ala d’ya̰ wa. Yee ɓa m’tel mbo̰ Ləbije gə njékɔspaje m’ɔm dee loo-kula’g lə dee gogo. 12Togə́bè ɓa dəwje gə́ Juda lai ree gə ta néje lə dee gə́ kun kára mee njé gə́ dɔg’d gə́ to kó ləm, gə mán-nduú gə́ sigi ləma, gə ubu ləm tɔ mee kəi-ŋgəm-né’g . 13Ma m’ɔm kula koo goo kəi-ŋgəm-néje lé ji Selemia, njekinjanéməs’g ləm gə Sadɔk, njendaji-maktub’g ləm, gə Pedaja, yeḛ gə́ kára mbuna Ləbije’g ndá m’ar Hanan, ŋgolə Jakur gə́ to ŋgolə Matania la sə dee mbata deḛ ɓa d’oo dee gə́ majikojije. Deḛ ɓa d’ɔm kula kai ŋgako̰ deeje né ji dee’g.
14Ǝi Ala ləm, maji kari ar məəi olé dɔm’g mbata né neelé ndá ar məəi wəi dɔ néramje gə́ m’ra gə ŋgonkoji wɔji dɔ kəi-Ala ləm ləm, gə néje gə́ kəm kaa dɔ dee kər-kər lé ləm tɔ.
15Mee ndəa’g neelé ma m’oo diŋgamje gə́ mee ɓee gə́ Juda gə́ d’aar mbula kandə nduúje gə ndɔ-kwa-rɔ ləm, deḛ d’odo koje gə mán-nduúje gə kandə nduúje gə kandə kodéje gə néje gə́ rara kara dɔ mulayḛ̀je-je’g ləm tɔ ɓa deḛ ree ne Jerusalem gə ndɔ-kwa-rɔ lé. Yen ŋga m’ɓar dee m’ndəji dee kɔr dɔ ndɔ’g neelé gə́ deḛ ndogo nésɔ dee keneŋ lé . 16Njé gə́ Tir gə́ d’isi Jerusalem kara ree gə ka̰jije gə néje lai gə́ to néndogoje ndá d’ar Judaje ndogo sə dee néje neelé gə ndɔ-kwa-rɔ. 17Ma m’ndaŋg dəwje gə́ boo gə́ Juda m’pa ne sə dee m’pana: Némajel gə́ seḭ raje ilaje ne ndɔl dɔ ndɔ-kwa-rɔ’g togə́bè lé see gelee to ɗi wa. 18See yee gə́ bèe ɓa bɔ síje-je ra kédé el wa. See yee gə́ bèe ɓa Ala lə sí ar nékəmndooje lai neelé teḛ ne dɔ sí’g gə dɔ ɓee-boo’g neelé gə mbəa el wa. Bèe ɓa seḭ lé seḭ ilaje ndɔl dɔ ndɔ-kwa-rɔ’g ɓarje ne oŋg dɔ Israɛlje’g ya tɔɓəi.
19Yen ŋga m’un ndum mba kar dee d’udu tarəwkɔgje gə́ Jerusalem loo gə́ kàr a gə kandə kédé ɓa kar ndɔ-kwa-rɔ teḛ ɓəi ndá d’a kɔr ta dee el saar ndɔ-kwa-rɔ godo ɓa. Tɔɓəi ma m’unda kuraje ləm gə́ na̰je tarəwkɔgje’g gə mba kɔg dee loo kandə keneŋ gə nékodo gə́ wɔi gə ndɔ-kwa-rɔ’g lé. 20Togə́bè ɓa njérab-néndogoje gə njéndogo néje gə́ rara kara ree to gir ɓee gə́ Jerusalem’g raga loondul’g as gɔl kára əsé gɔl joo bèe tɔ. 21M’ndəji dee m’pa ne sə dee m’pana: See gelee ban ɓa toje gir ndògo-bɔrɔ’g nee loondul’g bèe wa. Ɓó lé seḭ a toje bèe gɔl kára tɔɓəi ndá m’a kɔrɔ rɔ sí gə jim.
Un kudee mee ndəa gən lé deḛ ree gə ndɔ-kwa-rɔ gogo el ŋga. 22Ləbije kara m’un ndum mba kar dee d’ɔr won rɔ dee ləm, gə mba kar dee ŋgəm tarəwkɔgje mba kunda ndɔ-kwa-rɔ lé gə kəmee doi ləm tɔ.
23Mee ndəa’g neelé ma m’oo Jibje gə́ taa denéje gə́ to Asdodje əsé Amo̰je əsé Moabje tɔ . 24Ges ŋgan deeje pata Asdod nɛ deḛ gər ta lə Jibje el, deḛ pata lə ginkoji dəwje gə raŋg gə́ yo gə́ nee. 25Ma m’ndaŋg dee ləm, m’ila ndɔl dɔ dee’g ləm, m’kunda njé gə́ na̰je bula mbuna dee’g ləma, m’tɔr yiŋga dɔ dee ləm tɔ ndá m’ar dee manrɔ dee gə ri Ala m’pana: Seḭ a karje ŋgan síje gə́ dené taa ŋgan deeje gə́ diŋgam el ləm, seḭ a taaje ŋgan deeje gə́ dené karje ŋgan síje gə́ diŋgam el ləma, seḭ kara a taa deeje el ləm tɔ.
26See yee gə́ bèe ɓa gə́ kaiya ra Salomo̰, mbai lə Israɛlje el wa. Mbai gə́ to tana səa mbuna ginkoji dəwje gə raŋg gə́ bula digi-digi gə́ Ala ləa ndigee to gə́ yeḛ bèe lé godo ndá Ala ɓa undá gə́ mbai dɔ Israɛlje’g lai. Lé bèe kara denéje gə́ dɔɓeje’g ɓa ndɔree d’ilá dan kaiya’g . 27See kəm kar dee d’oo sor sí to gə́ seḭ kara raje némajel gə́ boo taaje ne denéje gə́ dɔ-ɓee’g mba ra ne kaiya kɔs ne ta lə Ala lə sí rəw wa.
28Dəw kára mbuna ŋgalə Jeojada’d gə́ to ŋgolə Eliasib ŋgɔ-njekinjanéməs lé yeḛ to məəm Sanbalatje, dəw gə́ Hɔro̰. Ma m’ɔsee rɔm’g rəw gə́ raŋg .
29Ǝi Ala ləm, maji kari ar məəi olé dɔ dee’g mbata deḛ d’ar kula kḭjanémes gə ta manrɔ gə́ i man ne rɔi ar njékinjanéməsje gə Ləbije lé mina̰ ya.
30Togə́bè ɓa m’ɔr ne dəwje lai gə́ dɔɓee’g mbuna dee’g ndá m’tel m’ɔm godndu gə́ wɔji dɔ njékinjanéməsje gə Ləbije mba kar dee ra lé ji dee’g mba kar nana kara tɔs kəmee dɔ kula’g ləa-ləa. 31M’tel m’gɔl dɔ ta gə́ wɔji dɔ nékarje gə́ to kir gə́ d’a kar mee ndəa gə́ d’wɔji ləm, gə dɔ dɔmaḭ-koje gə́ doŋgɔr kara bèe ləm tɔ.
Ǝi Ala ləm, maji kari ar məəi olé dɔm’d gə́ majee ya kari.
Currently Selected:
Nehemi 13: SBA2015
Highlight
Share
Copy
Want to have your highlights saved across all your devices? Sign up or sign in
Ngambai Bible © Alliance Biblique du Tchad 1989, 2015.