Ləbije 9

Nékinjaməsje gə́ dɔtar gə́ Aaro̰ gə ŋganeeje d’inja

1Ndɔ gə́ njekɔm’g jinaijoo lé Moyis ɓar Aaro̰ gə ŋganeeje gə ŋgatɔgje lə Israɛlje. 2Yeḛ ula Aaro̰ pana: Maji kari wa ŋgon maŋg gə́ nékinjaməs gə́ wɔji dɔ kuga dɔ kaiya ləm, gə bàl badə gə́ nékinjaməs gə́ ka̰ roo ləm tɔ, deḛ joo bɔr gə́ rɔ dee to ndəb-ndəb ɓa i a kinja dee no̰ Njesigənea̰’g. 3I a kula Israɛlje pana: Maji kar sí waje bàl bya̰ gə́ nékinjaməs gə́ wɔji dɔ kuga dɔ kaiya ləm, gə ŋgon maŋg kára ləm gə ŋgon badə kára ləm tɔ, dee gə́ ra ləb dee kára-kára ba gə́ rɔ dee mina̰ el lé gə́ nékinjaməs gə́ ka̰ roo ləm, 4gə bɔ maŋg gə bàl badə gə́ nékinjaməs gə́ ka̰ kɔm na̰’d ləm tɔ, mba kinja dee no̰ Njesigənea̰’g, tɔɓəi nékar gə́ to nduji-kó gə́ mbɔḭ gə ubu tɔ. Mbata ɓogənè lé Njesigənea̰ a gə teḛ kəm sí’g ya.

5Deḛ ree no̰ kəi-kubu-kiŋga-na̰’g gə néje lai gə́ Moyis un ndia dɔ’g ar dee lé, tɔɓəi koso-dəwje lai rəm pər gə́ keneŋ ndá d’aar tar no̰ Njesigənea̰’g. 6Moyis pana: Yee ɓa gə́ né gə́ seḭ a raje gə́ Njesigənea̰ un ne ndia dɔ’g lé, raje ndá rɔnduba lə Njesigənea̰ a teḛ kəm sí’g ya.

7Moyis ula Aaro̰ pana: Maji kari rəm pər gə́ loo-nékinjaməs’g, ndá inja nékinjaməs ləi gə́ wɔji dɔ kuga dɔ kaiya ləm, gə nékinjaməs ləi gə́ ka̰ roo ləm tɔ, mba kuga ne dɔ kaiya ləi-i ləm, gə ka̰ koso-dəwje ləm tɔ, tɔɓəi i a kinja nékinjaməs lə koso-dəwje mba kuga ne dɔ kaiya lə dee-deḛ to gə́ Njesigənea̰ un ne ndia lé tɔ#Ǝbr 7.27.

8Aaro̰ rəm pər gə́ loo-nékinjaməs’g ndá yeḛ inja gwɔb ŋgon maŋg mba karee to nékinjaməs gə́ wɔji dɔ kuga dɔ kaiya ləa-yeḛ. 9Ŋgalə Aaro̰ d’un məs lé d’aree, yeḛ ula ŋgaw jia dan məs’g ləm, yeḛ rad dɔ kum loo-nékinjanéməsje gə́ ḭta ləma, yeḛ ɔm naŋg no̰ loo-nékinjaməs’g ləm tɔ. 10Tɔɓəi ubu da nékinjaməs gə́ wɔji dɔ kuga dɔ kaiya ləm, gə ɓɔlɔlɔ-duneeje ləma, gə dəb wurndulee gə́ boi ləm tɔ lé yeḛ roo dee loo-nékinjaməs’g, to gə́ Njesigənea̰ un ne ndia ar Moyis lé tɔ. 11Nɛ dakasee gə ndaree lé yeḛ roo dee gir loo-si dee gə́ raga.

12Yeḛ inja nékinjaməs gə́ ka̰ roo lé. Ŋgalə Aaro̰ d’un məs lé d’aree ndá yeḛ saga loo-nékinjaməs’g gugu ne dəa sub tɔ. 13Deḛ d’un nékinjaməs gə́ ka̰ roo gə́ deḛ tuga gaŋg dana ɗuguru-ɗuguru gə dəa lé to d’aree ndá yeḛ roo dee loo-nékinjaməs’g lé. 14Yeḛ togo ŋgan siḭyeje gə gɔleeje ndá yeḛ roo dee dɔ nékinjaməs gə́ ka̰ roo gə́ to dɔ loo-nékinjaməs’g lé tɔ.

15Gée gə́ gogo yeḛ aw gə nékinjaməs gə́ to ka̰ koso-dəwje lé. Yeḛ wa bàl bya̰ gə́ to nékinjaməs gə́ ka̰ kuga kaiya lə koso-dəwje ndá yeḛ inja gwɔbee gə́ nékinjaməs gə́ wɔji dɔ ka̰ kaiya to gə́ yeḛ ra ne gə njé gə́ kédé lé tɔ. 16Yeḛ aw gə nékinjaməs gə́ ka̰ roo ndá yeḛ inja gə goo rəbee gə́ wɔji dəa. 17Yeḛ un nékar gə́ to nduji lé ndá ɔr nduji as ŋgo jia kára, tɔɓəi yeḛ roo loo-nékinjaməs’g orè ne gə nékinjaməs gə́ ka̰ roo gə ndɔ rad gə́ ndɔje kára-kára lai lé. 18Yeḛ inja gwɔb bɔ maŋg gə bàl badə gə́ nékinjaməs gə́ ka̰ kɔm na̰’d mbata lə dəwje. Ndá ŋgalə Aaro̰ d’un məs lé d’aree saga dɔ loo-nékinjaməs’g gugu ne dəa sub tɔ#Ləb 3.1-11. 19Deḛ d’aree ubu bɔ maŋg gə ubu bàl badə, gə ɓoŋ bàl badə, gə ubee gə́ dolè dɔ ŋgan siḭyeeje’g gə ɓɔlɔlɔ-duneeje, gə dəb wurndulee gə́ boi lé tɔ, 20deḛ d’ɔm ubu dee dɔ kaar dee’g ndá yeḛ roo ubu dee neelé loo-nékinjaməs’g. 21Aaro̰ odo kaar dee gə biŋ da gə́ kára gə́ dɔkɔl lé ra nduree no̰ Njesigənea̰’g unda ne gə kəmee to gə́ Moyis un ne ndia lé.

22Aaro̰ odo jia par gə́ tar gə́ rɔ koso-dəwje’g ndá yeḛ tɔr ndia dɔ dee’g. Loo gə́ yeḛ inja nékinjanéməsje gə́ ka̰ kuga dɔ kaiya ləm, gə ka̰ roo ləma, gə ka̰ kɔm na̰’d ləm tɔ mba̰ ndá yeḛ risi uru naŋg tɔ#BI 6.22-26.

23Moyis gə Aaro̰ d’andə d’aw mee kəi-kubu-kiŋga-na̰’g. Loo gə́ d’unda loo teḛ raga ndá deḛ tɔr ndu dee dɔ koso-dəwje’g. Tɔɓəi rɔnduba lə Njesigənea̰ teḛ kəm koso-dəwje’g lé lai tɔ. 24Pər ḭ no̰ Njesigənea̰’g ndá roo nékinjaməs gə́ ka̰ roo gə ubuje gə́ to loo-nékinjaməs’g lé. Koso-dəwje lai d’oo ndá deḛ ra né u-u-u gə rɔlel tɔɓəi deḛ d’oso rəb dəb kəm dee naŋg tɔ.

Currently Selected:

Ləbije 9: SBA2015

Highlight

Copy