Ləbije 13

Godndu gə́ wɔji dɔ rɔko̰ gə́ ra ndar rɔ dəw

1Njesigənea̰ ula Moyis gə Aaro̰ pana: 2Loo gə́ dəw kára né tiee to gə́ lu bèe, əsé tilá ar rəa ḭ ŋgwɔi əsé rəa tila ndá asəna gə́ doo ba̰ji gə́ to ndar rəa’g bèe ndá d’a kaw səa rɔ Aaro̰ gə́ njekinjanéməs’g, əsé rɔ ŋgonee’g kára mbuna ŋganeeje gə́ to njékinjanéməsje lé karee a tən doo 3gə́ to ndar rəa’g lé. Ɓó lé bḭ rəa gə́ uba ta doo’g lé tel ndá ləm, aree oo to gə́ doo lé uru dəs ndar rəa ləm tɔ ndá to doo ba̰ji ya: njekinjanéməs gə́ tən rəa lé a kun ndia dɔ’g njaŋg pana: Dəw neelé rəa mina̰ ya. 4Ɓó lé ndar rəa gə́ tila ndá lé uru dəs ndar rəa el ləm, gə bḭ rəa tel ndá el ləm tɔ ndá dəw gə́ doo to rəa’g lé njekinjanéməs lé a kudee kəi as ndɔ siri. 5Ndɔ gə́ njekɔm’g siri lé njekinjanéməs lé a tən rəa. Ɓó lé yeḛ oo to gə́ doo lé aw gə́ kédé-kédé el ləm, yoolé ndar rəa el ləm tɔ ndá njekinjanéməs lé a kudee kəi gɔl kára ya tɔɓəi as ndɔ siri. 6Ndɔ gə́ njekɔm’g siri lé njekinjanéməs a tən rəa gɔl kára ya tɔɓəi. Ɓó lé ta doo lé ɔr ndá ləm, yoolé ndar rəa el ləm tɔ ndá njekinjanéməs lé a pa njaŋg pana: Dəw neelé rəa àr ya: to rəa gə́ ḭ ŋgwɔi gə́ kḭ, yeḛ a togo kubuje ləa ndá rəa a kàr ŋgad-ŋgad. 7Nɛ loo gə́ yeḛ tɔji njekinjanéməs rəa aree oo ɓa pana: Rea àr ɓa gée gə́ gogo ŋgwɔiee ḭ yoolé ndar rəa’g unda nje gə́ kédé ndá yeḛ a tel kaw kar njekinjanéməs lé tən rəa gɔl kára ya tɔɓəi. 8Njekinjanéməs lé a tən rəa. Ɓó lé ŋgwɔiee ḭ yoolé ndar rəa’g unda nje gə́ kédé ndá njekinjanéməs lé a pa njaŋg pana: Rea mina̰, to ba̰ji ya.

9Loo gə́ dəw kára doo ba̰ji to rəa’g ndá d’a kaw səa rɔ njekinjanéməs’g karee tən rəa. 10Ɓó lé né ti ndar rəa to gə́ lu gə́ tel ndá ləm, ɓó lé lu neelé ar bḭyee tel ndá ləma, ar dakas rəa gaŋg doo mee lu’g neelé ləm tɔ ndá 11to ba̰ji gə́ to ndar rəa’g ləw ba: njekinjanéməs lé a pa njaŋg pana: Rea mina̰, yeḛ a kudee kəi el mbata rəa mina̰ ya. 12Ɓó lé yeḛ gə́ ba̰ji ila rəa’g ɓa ba̰ji lé ḭ taa rəa pəl-pəl, un kudee dəa’g saar teḛ gɔlee’g, loo gə́ rara gə́ njekinjanéməs lé askəm koo ndá a tən rəa 13ɓa loo gə́ oo to gə́ ba̰ji taa rəa pəl-pəl ndá a pa njaŋg pana: Débee gə́ doo rəa lé rəa àr, mbata rəa lai tel ɔr nda ndá yeḛ àr ya. 14Nɛ mee ndəa’g d’a koo dakasrea gə́ gaŋg doo ndá rəa a tel mina̰ gogo, 15loo gə́ njekinjanéməs lé oo dakasrea gə́ gaŋg doo ndá a pa njaŋg pana: Rea mina̰ mbata dakasrea mina̰, to ba̰ji ya. 16Ɓó lé dakasrea tel ɓəd ləm, tel ndá ləm tɔ ndá yeḛ a kaw rɔ njekinjanéməs’g lé karee tən rəa, tɔɓəi 17ɓó lé doo lé tel nda ndá njekinjanéməs lé a pa njaŋg pana: Dəw gə́ doo to rəa’g lé rəa àr mba̰ ndá: yeḛ àr ya tɔ.

18Loo gə́ dəw kára né uba ndar rəa ɓa ər ɓəi, 19ar tor nduna doo neelé ɔm ŋgururu, to gə́ lu gə́ ndá əsé né gə́ tila ɓal ndá gə kas ndá dəw neelé a tɔji rəa njekinjanéməs karee tənee. 20Ɓó lé oo to gə́ né gə́ ila ɓal rəa’g uru dəs ndar rəa ləm, bḭyee tel ndá ləm tɔ ndá njekinjanéməs lé a pa njaŋg pana: Rea mina̰: to gə́ doo ba̰ji gə́ ḭ tor nékuba’g. 21Ɓó lé njekinjanéməs lé oo to gə́ né gə́ ila ɓal lé ar bḭyee tel ndá el ləm, uru dəs ndar rəa el ləma, rəa tel ɔr ndá ləm tɔ ndá yeḛ a kudu debee neelé kəi as ndɔ siri. 22Ɓó lé né gə́ ila ndar rəa’g lé aw gə́ kédé-kédé ndá njekinjanéməs a pa njaŋg pana: Rea mina̰: to gə́ doo ba̰ji ya. 23Nɛ ɓó lé né gə́ ila rəa’g lé to lé gə́ kédé ya ɓó aw gə́ kédé el ndá to nduna né gə́ ubá: Njekinjanéməs lé a pa njaŋg pana: Rea àr ya.

24Loo gə́ doo pər to rɔ dəw’g ɓa toree ila ndá əsé ɔb wə ndá njekinjanéməs a tənee. 25Ɓó lé bḭyee tel ndá tor né gə́ ilá’g lé ləm, təa uru dəs ndar rəa ləm tɔ ndá to ba̰ji gə́ kinja ɓagəsa tor doo pər’g neelé, ndá njekinjanéməs lé a pa njaŋg pana: Dəw neelé rəa mina̰: mbata to doo ba̰ji ya. 26Ɓó lé njekinjanéməs oo to gə́ bḭyee gə́ ndá godo tor né gə́ ilá’g lé ləm, təa uru dəs ndar rəa el ləma, gə rəa tel ɔr ndá ləm tɔ ndá njekinjanéməs a kudu dəw neelé kəi as ndɔ siri. 27Ndɔ gə́ njekɔm’g siri lé njekinjanéməs lé a tən rəa. Ɓó lé né gə́ ilá lé aw gə́ kédé ndar rəa’g ndá njekinjanéməs lé a pa njaŋg pana: Rea mina̰: to gə́ doo ba̰ji ya. 28Nɛ ɓó lé né gə́ tila rəa’g to lé’d gə́ kédé ya ləm, aw gə́ kédé el ləma, rəa tel ɔr ndá ləm tɔ ndá to nduna doo pər, njekinjanéməs lé a pa njaŋg pana: Rea àr mbata to nduna doo pər tɔ.

29Loo gə́ diŋgam əsé dené iŋga doo dəa’g əsé gel təa’g ndá 30njekinjanéməs lé a tən doo neelé. Ɓó lé oo to gə́ doo lé uru dəs ndar rəa ləm, bḭ rəa ɔb wə gə tel wagəsa ləm tɔ ndá njekinjanéməs lé a pa njaŋg pana: Rea mina̰: to ŋgər, to ŋgər gə́ wɔji dɔ dəa əsé wɔji dɔ gel təa tɔ. 31Ɓó lé njekinjanéməs lé oo to gə́ doo ŋgər lé uru dəs ndar rəa el ləm, bḭyee gə́ ndul godo keneŋ ləm tɔ ndá njekinjanéməs lé a kudu debee gə́ doo ŋgər to rəa’g lé kəi as ndɔ siri. 32Ndɔ gə́ njekɔm’g siri lé njekinjanéməs a tən doo lé. Ɓó lé oo to gə́ ŋgər neelé aw gə́ kédé-kédé el ləm, bḭ rəa gə́ ɔb wə gə́ tel wagəsa godo keneŋ ləma, uru dəs ndar rəa el ləm tɔ 33ndá debee gə́ ŋgər rəa neelé a ndisa bḭ rəa nɛ loo gə́ ŋgər to keneŋ ndá a ndisa el, tɔɓəi njekinjanéməs lé a kudee kəi as ndɔ siri gɔl kára ɓəi tɔ. 34Ndɔ gə́ nékɔm’g siri lé njekinjanéməs a tən ŋgər lé. Ɓó lé ŋgər lé aw gə́ kédé-kédé el ləm, uru dəs ndar rəa el ləm tɔ ndá njekinjanéməs lé a pa njaŋg pana: Rea àr ya, yeḛ a togo kubuje ləa ndá yeḛ a kàr ya. 35Nɛ ɓó lé ŋgər lé aw ndar rəa’d gə́ kédé-kédé gə goo pa gə́ yeḛ pa njaŋg pana: Rea àr lé ndá njekinjanéməs lé a tel tənee gogo. 36Ɓó lé ŋgər lé aw ndar rəa’d gə́ kédé-kédé ndá njekinjanéməs lé a kaw ndòo saŋg bḭyee gə́ ɔb wə gə́ tel wagəsa el ŋga: yeḛ mina̰ ya. 37Ɓó lé ŋgər lé aw gə́ kédé-kédé el, ar bḭ rəa gə́ ndul uba lée’g ndá ŋgər lé ər kəmsə ŋga: rəa àr ndá njekinjanéməs lé a pa njaŋg pana: Yeḛ àr ya.

38Ɓó lé diŋgam əsé dené ɓa néje tila rəa ar néje gə́ tilá lé nda ndá 39njekinjanéməs a tənee, ɓó lé néje gə́ tila ndá rəa’g lé ɔr nda ndá to néje gə́ tila rəa’d gə́ d’ḭ taa ndar rəa pəl-pəl kari ba: ndá rəa àr ya.

40Loo gə́ yiŋga dɔ dəw mbar mbár-mbár ndá yeḛ to njedɔmbar: rəa àr ya. 41Ɓó lé dəa mbar ŋgonea̰’g ndá yeḛ to njenɔmbar: yeḛ àr ya. 42Nɛ ɓó lé loo gə́ mbar lé to gə́ nea̰’g əsé gée’g ɓa doo to keneŋ ɓa ndá gə kas ndá to ba̰ji gə́ ḭ taa loo gə́ gée’g əsé loo gə́ ŋgonea̰’g pəl-pəl. 43Njekinjanéməs a tən rɔ njedɔmbar lé. Ɓó lé to tɔr doo gə́ ndá gə kas ɓa to loo gə́ mbar gə́ gée’g əsé ŋgonea̰’g aree to tana gə ba̰ji gə́ to ndar rəa’g bèe ndá 44dəw neelé to njeba̰ji, rəa mina̰: njekinjanéməs lé a pa njaŋg pana: Dəw neelé mina̰: mbata doo to dəa’g tɔ.

45Njeba̰ji gə́ doo to rəa’g ndá a tula ŋgisi kubuje ləa rəa’g tɔɓəi a ndisa dəa ŋgori-ŋgori, a tɔ né dɔ təa’g ndá a kila ndia naŋg wəl pana: Rɔm mina̰! Rɔm mina̰! 46Ndɔje lai gə́ doo to ne rəa’g ɓəi lé yeḛ a mina̰ ne ya ɓəi, rəa mina̰ ya. Yeḛ a si gə karee ba, ndá loo-siée a to gir loo-si dee’g raga tɔ.

Godndu gə́ wɔji dɔ rɔko̰ ba̰ji gə́ oso kubu gə́ wa moro

47Loo gə́ kubu wa moro lé to kubu bḭ badə əsé gə́ kubu kúla palégal gə́ bḭ maji, 48lé to kúla kubu gə́ tḭja yao-yao əsé kúla gə́ ka̰ tula mbuna’d gə́ ra gə kúla palégal gə́ bḭ maji əsé gə kúla bḭ badə, lé to ndar əsé né gə́ ra gə ndar kara, 49ɓó lé moro neelé to gə́ kam gə́ ɔb wə əsé kas gəḭ dɔ kubu’g əsé dɔ ndar’g, dɔ kúla kubu gə́ tḭja yao-yao’g əsé kúla gə́ tula mbuna’g əsé dɔ né gə́ rara gə́ ra gə ndar ndá to moro gə́ loo kɔree godo, né neelé d’a tɔji njekinjanéməs ya. 50Njekinjanéməs lé a tən né gə́ wa moro neelé koo ndá a ŋgəm né neelé kəi as ndɔ siri. 51Ndɔ gə́ njekɔm’g siri lé yeḛ a tən moro neelé. Ɓó lé moro neelé aw gə́ kédé-kédé dɔ kubu’g dɔ kúla kubuje gə́ tḭja yao-yao’g əsé dɔ yee gə́ tula mbuna’g əsé dɔ ndar’g əsé dɔ né gə́ rara gə́ ra gə ndar lé ndá to gə́ rɔko̰ ba̰ji gə́ ləw ba, ndá né neelé mina̰ ya. 52Togə́bè kubu neelé gə kúla kubuje gə́ tḭja yao-yao əsé yee gə́ tula mbuna’d gə́ ra gə bḭ badə əsé gə kúla palégal gə́ bḭ maji, gə néje gə́ rara gə́ ra gə ndar gə́ moro neelé wa keneŋ ndá yeḛ a roo dee mbata to moro gə́ ləw ba: ndá yeḛ a roo dee ya. 53Nɛ ɓó lé njekinjanéməs lé oo to gə́ rɔko̰ neelé aw gə́ kédé-kédé dɔ kubu’g el ləm, əsé dɔ kúla kubuje gə́ tḭja yao-yao’g, əsé dɔ yee gə́ tula mbuna’g el ləm, əsé dɔ né gə́ rara gə́ ra gə ndar el ləm tɔ ndá 54yeḛ a kun ndia kar dee togo né gə́ moro neelé wa keneŋ ləm, yeḛ a ŋgəm kəi gɔl kára tɔɓəi as ndɔ siri ləm tɔ. 55Loo gə́ dəw togo né neelé ndá njekinjanéməs a tən moro neelé ya ɓəi. Ɓó lé moro neelé tel rəa raŋg el ləm, aw gə́ kédé-kédé el ləm tɔ ndá né neelé mina̰ ya: d’a roo, to debee gə́ mée’g əsé giree’g kara d’a roo gə́ roo ya. 56Ɓó lé njekinjanéməs lé oo to gə́ rɔko̰ neelé tel ɔr ndá goo togo gə́ dee togo’g mba̰ ndá kubu əsé ndar əsé kúla kubuje gə́ tḭja yao-yao əsé yee gə́ tula mbuna na̰’d kara yeḛ a gore lé kɔr. 57Ɓó lé moro neelé tel oso dɔ kubu’g gogo ɓəi, dɔ kúla kubuje gə́ tḭja yao-yao’g əsé dɔ yee gə́ tula mbuna’g əsé dɔ né gə́ rara gə́ ra gə ndar ndá to ba̰ji gə́ taa pəl-pəl: ndá né gə́ moro oso keneŋ neelé d’a roo.

58Kubu, gə kúla kubuje gə́ ŋgal pɔ-pɔ əsé yeḛ gə́ tula mbuna’g əsé gə né gə́ rara gə́ ra gə ndar ɓa deḛ togo ɓəi, ɓó lé moro neelé ɔr keneŋ ndá d’a tel togo gɔl kára tɔɓəi ɓa a kàr ɓəi.

59Yee gə́ bèe ɓa to godndu gə́ wɔji dɔ moro gə́ wa kubuje gə́ ra gə bḭ badə əsé kubu palégal gə́ bḭ maji dɔ kúla gə́ tḭja yao-yao’g əsé yee gə́ tula mbuna’g əsé dɔ né gə́ rara gə́ ra gə ndar tɔ, gə goo godndu neelé ɓa d’a pa ne njaŋg pana: Dee to néje gə́ d’àr ŋgad-ŋgad əsé to néje gə́ mina̰ lé tɔ.

Currently Selected:

Ləbije 13: SBA2015

Highlight

Copy