Jɔb 6
6
Ta kila’g lə Jɔb
1Jɔb tel ilá keneŋ pana:
2Ǝi, ɓó lé d’askəm kwɔji kwɔi lə némeeko̰ ləm ləm,
Ɓó lé mbo̰ nékəmndooje ləm lai na̰’d d’unda dɔ nékwɔji kwɔi’g lə né ləm tɔ ndá
3D’a kwɔi kunda nagəra gə́ mee baa-boo-kad’g,
Gelee gə́ nee ɓa taje ləm aw ne saar ar ta mbə teḛ ne tam’g.
4Mbata kandə ɓandaŋgje lə Bao-siŋgamoŋ wam
Ar kuma̰-yoo gə́ keneŋ andə rɔm’g tɔ.
Néɓəlje lə Ala mbo̰ na̰ dɔm’g rɔ səm.
5See mbur a ra né wəl mbɔr mu gə́ lelee’g wa.
See bɔ maŋg a no̰ mbɔr moro’g ləa wa.
6See dəw a sɔ né gə́ to dədələ lal kad wa.
See nda-kaokṵja lé lel wa.
7Né gə́ m’ndiŋga rɔm gə mba kɔrɔ rəa el
Gə́ to kḛji kəm’g lé yee ɓa tel to nésɔ ləm,
8Né gə́ ma m’dəjii lé maji kam m’iŋga ləm,
Né gə́ məəm to yel dɔ’g lé maji kar Ala am ləm tɔ.
9Ɓó lé mee Ala ndigi ndá
Maji karee rədm naŋg mbə̰ji-mbə̰ji ləm
Maji karee ula jia ɔrm ne dɔ naŋg nee ləm tɔ.
10Lé bèe ndá m’a kiŋga négɔl məəm ləm,
M’a kal rɔm dan némeeko̰ gə́ yeḛ ɔm dɔm’g ləm tɔ,
Nɛ ma lé m’al ta ta ndukunje’g lə Ala gə́ Njerɔkunda pai el.
11Loo gə́ siŋgam godo lé see m’a kunda məəm yel gə mba ɗi ɓəi wa.
Loo gə́ d’wɔji rudu ndɔ ləm njaŋg mba̰ lé see m’a ŋgina gə mba ɗi ɓəi wa.
12See siŋgam asəna gə siŋga mbal wa.
See darɔm to larkas wa.
13See ma lé njela səm godo ɓa
Kaji nai ne səm əw wa.
14Yeḛ gə́ oo ko̰-né lé
Lé yeḛ uba goo ɓəl Bao-siŋgamoŋ ya̰ kara
Yeḛ aw ndoo meekaw taḭ-taḭ lə baokura ləa ya.
15Ŋgakɔmje to njésukəmje to gə́ kəm-rəw-mán gə́ tudu kurum-kurum
Gə́ ər dəw bèe,
16Kɔr kwɔji aree ɓeb ləm,
Kwɔji ɔm keneŋ aree to bigim ləm tɔ.
17Loo gə́ nai kàr ndá dee d’yi tə ləm,
Pər kàr ar dee tudu kurum-kurum lée’g ya ləm tɔ.
18Njékawrəw’gje d’uba rəw lə dee d’ya̰
D’ur dɔdilaloo’g ndá d’udu keneŋ guduru.
19Njékawrəw’gje gə́ Tema d’orè kəm dee dɔ’g sḭ ləm,
Njékawmbáje gə́ Seba kara d’unda meḛ dee yel dɔ’g ləm tɔ.
20Rɔ dee kul mbata kunda gə́ d’unda meḛ dee yel dɔ’g ləm,
Rɔ dee gaḭ ges loo gə́ deḛ teḛ keneŋ ləm tɔ.
21Ɓasinè, seḭ toje gə́ né gə́ kari ba,
Seḭ ooje néɓəŋgərəti ləm ndá seḭ ɓəlje ne kədm-kədm tɔ.
22See ma m’ula sí m’pana: Amje né
Esé m’pana: Ugaje dɔm gə némajije lə sí,
23Esé m’pana: Taamje ji njeba̰’g,
Esé m’pana: Ɔrmje ji njémeeyèrje’g wa.
24Ndoomje ndá m’a si mundu ya,
Tɔjimje né gə́ m’ndəm dɔ’g lé amje m’gər.
25Ta gə́ tɔgərɔ lé siŋgá to ya,
Nɛ ta gə́ seḭ ilaje dɔm’g lé see gelee to ɗi wa.
26See seḭ ndigi gaŋgje ta dɔ taje’g ləm,
Kooje gə́ ta lə dəw gə́ to ta yoo’d gə́ ta ləa dəs to gə́ lel bèe wa.
27Seḭ raje tḛ́ dɔ ŋgonal’g ləm,
Seḭ ndogoje kuramar síje ləm tɔ.
28M’ra ndòo rɔ sí’g, maji kar sí aamje gərərə,
See m’a pa taŋgɔm kəm sí’g wa.
29Maji kar sí telje dɔ taje’g lə sí,
Maji kar sí gaŋgje ta gə́ gə goo rəbee el lé bèe el.
Maji kar sí telje dɔ taje’g lə sí
Ndá seḭ a gərje to gə́ ta wa dɔm el.
30See ndɔm pata gə́ kori-kori wa.
Esé see tam askəm kɔr kəm né gə́ majel el wa.
Currently Selected:
Jɔb 6: SBA2015
Highlight
Copy
Compare
Share
Want to have your highlights saved across all your devices? Sign up or sign in
Ngambai Bible © Alliance Biblique du Tchad 1989, 2015.
