Jɔb 40
40
To ta gə́ Jɔb ɓa a kilá keneŋ
1Njesigənea̰ dəji Jɔb ta pana:
2See njemaḭta gə Bao-siŋgamoŋ lé see ta dumee wa.
See dəw gə́ maḭta gə Ala see yeḛ aw gə ta gə́ kəm kila’g wa.
3Jɔb tel gə ta ila Njesigənea̰’g pana:
4Aa oo, ma m’to gə́ né el.
See ta ɗi ɓa m’a tel kilai’g wa.
Ma m’ila jim tam’g sud.
5Ma m’pata gɔl kára mba̰ ndá m’a tel kila’g el ŋga,
Gɔl joo ləa ndá m’a tel kila maree dɔ’g el.
See Jɔb a koo rəa gə́ Ala wa
6Njesigənea̰ tel ila Jɔb ta’g dan lel-boo’g pana:
7Ɔm mina wuri’g asəna gə dəw gə́ diŋgam,
M’a gə dəjii ta ndá i a kɔr gelee kam.
8See i a tuji rəwta-gaŋg ləm wa.
See i a kila ta dɔm’g ɓa mba kɔr ne ta dɔi’g wa.
9See kag-jii ɓar mèr-mèr to gə́ ka̰ Ala wa.
Esé see ndui ɓar to gə́ kea̰-yeḛ wa.
10Maji kari ɗɔi rɔi gə boo-nérɔnduba gə némajije gə́ bə̰dərə bə̰ ləm,
Maji kari ula rɔnduba gə riɓar rɔi’g to gə́ kubu bèe ləm tɔ.
11Maji kari kila oŋg ləi gə́ o̰ to gə́ pər bèe lé gə́ raga ləm,
Maji kari aa njédɔkədərəje gərərə ar dee d’ula dɔ dee ləm tɔ.
12Maji kari aa njédɔkədərəje ar dee d’ula dɔ dee ləm,
Tal njémeeyèrje naŋg ras-ras loo-kaar dee’g ləm tɔ.
13Maji kari iya dee na̰’d ya lai gel naŋg’d ləm,
Maji kari ɔm dee duu-loo gə́ ndul njudu-njudu’g ləm tɔ.
14Yen ɓa m’a kula rɔnduba dɔi’g
Mbata siŋgamoŋ lə jikɔli.
Ta lə ab
15Aa oo, ab lé ma m’aree kəmə to gə́ i bèe,
Yee sɔ mu to gə́ maŋg bèe.
16Aa loo ée, siŋgamoŋgee to rḛgee’g ləm,
Ŋgira mée ɓa gə́ loo-kuba-siŋgá ləm tɔ.
17Yee tuga ɓo̰gee ta kudee’g kérég aree kədərə to gə́ kag-sɛdrə bèe,
Ŋgira biŋgeeje ula na̰’d siŋ-siŋ.
18Siŋgaje lé to asəna gə larkas gə́ bolè to keneŋ ləm,
Siŋga kaareeje to to gə́ kag-larndul bèe ləm tɔ.
19Yee nja to nékunda gə́ dɔtar mbuna nékundaje’g lə Ala,
Yeḛ gə́ njekṵdá lé aree kiambas tɔ.
20Dɔ mbalje ɓa to loo-nésɔ ləa
Loo gə́ daje gə́ wala ndam keneŋ.
21Yee to gel ɓala’g ləm,
Yee iya rəa mee kó-abje gə dan bɔrɔ’g ləm tɔ.
22Kam ɓalaje neelé ɓa on dəa ləm,
Kag-tṵguje gə́ ta mán’g gugu dəa sub ləm tɔ.
23Ɓó lé mán bèlm ḭ taa loo kara yee ɓəl el ləm,
Loo gə́ baa gə́ Jurdɛ̰ ula saar teḛ təa’g kara yee si lɔm ləm tɔ.
24See na̰ ɓa askəm kwá gə siŋgamoŋgee wa.
See dəw a kwá gə bura mbudu əmee wa.
Mar əsé da-mán gə́ to ɓəl
25See i askəm kwa da-mán gə́ to ɓəl gə ki wa.
See i askəm tuga kúla ndəa̰’g kwá ne wa#Pak 74.14, 104.26, Esa 27.1.
26See i a mbudu əmee gə tatɔg wa
See i a tuga kéŋgəlé ka təa’g kwá ne wa.
27See yee a ra ndòo rɔi’g wa
See yee a kulai ta gə ndu gwɔsee gə́ kul wa.
28See yee a man rəa kari
Gə mba tel to ne ɓər ləi saar gə no̰ wa.
29See i a ndam səa to gə́ ŋgon yel bèe wa.
See i a teá gə kúla karee to nérɔlel lə ŋgama̰dje ləi wa.
30See njékɔska̰jije d’a tel kəmee kiŋga ne né wa.
See d’a kaiyee kar njéndogo-néje wa.
31See i a kɔs ndaree gə niŋga mbudu wa
Esé a kɔs dəa gə niŋga-tɔl-ka̰jije wa.
32Maji kari un jii oma̰ ne səa oo
Ndá i a kḛji gə́ mba rɔ səa gogo el.
Currently Selected:
Jɔb 40: SBA2015
Highlight
Copy
Compare
Share
Want to have your highlights saved across all your devices? Sign up or sign in
Ngambai Bible © Alliance Biblique du Tchad 1989, 2015.
