Jɔb 4
4
Ta lə Elipaj
1Elipaj, dəw gə́ Teman un ta ula Jɔb pana:
2Ɓó lé j’a gə kulai ta ndá see a kar məəi oḭ wa.
Nɛ see na̰ ɓa a kaskəm si təa mundu lal pata wa.
3Aa oo, ta-ta i ndoo dəwje gə́ raŋg né ləm,
I ar deḛ gə́ ji dee unda ndolé kara ɓar mèr-mèr ləm,
4Taje ləi ar deḛ gə́ d’oso d’ḭta ləma,
Deḛ gə́ d’wa koŋgoŋ lé i ar dee ndɔji rɔ dee ləm tɔ.
5Nɛ ɓasinè to ndəa kaḭ ndá i unda ndolé.
Ɓasinè né ɔrɔ rɔi-i ndá i ar məəi pélé ne wəs-wəs.
6See ɓəl Ala ləi lé ɓa
Ari ɔm ne məəi dɔ Ala’g lé ləm, unda ne məəi yel dəa’g ləm el wa.
See gelgodo ləi lé ɓa ari tɔs ne kəmi bao-bao dɔ rəw kabije’g el wa.
7Maji kari ə̰ji ta məəi’g oo: See dəw gə́ ta wa dəa el gə́ ra ɓa tuji wa.
Esé see njéra nédanaje gə́ ra ɓa d’udu guduru wa.
8Ma lé m’oo gao, deḛ gə́ d’ɔs gel néra gə́ kori-kori ləm,
Gə́ dubu néra gə́ gə dɔ najee el ləm tɔ lé d’a kinja ka̰dee ya tɔ.
9Kəmə gə́ Ala ila pugudu dɔ dee’g lé deḛ tuji ne ləm,
Lel oŋg ləa roo dee dula-dula ləm tɔ.
10Gel ndu no̰ lə toboḭje gaŋg ləm,
Ŋgaŋ ŋgan toboḭje kara təd ləm tɔ.
11Bɔ toboḭ tuji mbata nékwa ləa godo,
Ŋgalə ko̰ toboḭ sanéna̰ kad-kad tɔ.
12Ta gə́ to loo-kiya’g lé aw saar ree teḛ rɔm’g
Ndá mbim oo keaa lam-lam.
13Loo gə́ dəwje d’ɔm ɓi mán-kad yèm lé
To kàree gə́ nénije d’ar mee dəw tila ŋgaḭla-ŋgaḭla lé#Jɔb 33.15.
14Ɓəl undam badə gaŋgm am m’unda bala ləm,
Siŋgarɔmje lai yə ləm tɔ.
15Lel dəs mbɔrm’g dəb ndá m’ɓəl
Ar bḭ rɔmje d’ḭ mugugu.
16Dəw kára aar lée’g neelé ndá ma m’gəree el,
Nɛ m’oo ndu dəw gə́ wɔji ne ta lam-lam pana:
17See dəw a to njera né gə dɔ najee no̰ Ala’g wa.
See yeḛ a kàr ŋgad-ŋgad no̰ yeḛ gə́ njekṵdá’g wa.
18Ɓó lé Ala ɔm mée dɔ kuraje’g ləa gə́ dara el ləm,
Ɓó lé yeḛ iŋga némbə rɔ kuraje’g ləa ləm tɔ,
19Nɛ ɓəd ɓa see dəwje gə́ d’isi mee kəi naŋg’d
Gə́ gin dee ḭ nduji naŋg’d
Gə́ d’askəm rəd dɔ dee naŋg to gə́ rəd ne kuruje bèe el wa.
20Teḛ gə ndɔ saar kàrkemetag ndá deḛ tɔ dee pɔs-pɔs,
Deḛ tuji gə no̰ ar dəw kára kara ə̰ji dɔ dee’g el.
21Kula si kəmba lə dee gaŋg badə,
Deḛ d’wəi nɛ d’wəi lal kiŋga kəmkàr ya.
Currently Selected:
Jɔb 4: SBA2015
Highlight
Copy
Compare
Share
Want to have your highlights saved across all your devices? Sign up or sign in
Ngambai Bible © Alliance Biblique du Tchad 1989, 2015.
