Jɔb 37
37
1Dɔ ɓəŋgərəm ɓar ɗigi-ɗigi,
Yee ya̰ loo-tée ŋgəs gə́ raŋg.
2Maji kar sí ooje, ooje kaa ndia gə́ ɓar
Gə ndu ndaŋg rɔ gə́ teḛ təa’g!
3Yeḛ aree ɓar taa mee dara pəl-pəl ləm,
Tèl ləa ndɔḭ saar ɔr rudu naŋg nee njal ləm tɔ.
4Tɔɓəi ndia ɓar wəl,
Yeḛ ar ndu rɔnduba ləa ɓar ɔr loo lɔi-lɔi,
Loo gə́ ndia ɓar lé ndá yeḛ ɔg ne tèl lə ndi el.
5Ala ndaŋg rəa gə ndia gə́ to ɓəl kədm-kədm,
Yeḛ ra boo-néje gə́ jeḛ n’gər gin dee el.
6Yeḛ ula kwɔjije pana: Maji kar sí ɔmje naŋg nee!
Yeḛ ula gə mán ndi ləm gə ko̰ ndi gə́ ər ɓai-ɓai ləm tɔ.
7Yeḛ unda nétorji ji dəwje’g lai
Mba kar dee-deḛ lai gər ne na̰ gə́ nékundaje ləa.
8Da gə́ wala aḭ aw loo-kiya rɔ’g ləa ləm,
Aw to duu loo-tée’g ləm tɔ.
9Lel-mal ḭ par gə́ dɔkɔl ula ləm,
Lel ḭ dɔgel ree gə kul ləm tɔ.
10Mbɔl dɔ kəmə lé Ala ar mán tel ɓi gəmsə,
Yeḛ ar kəm-rəw-manje gə́ tad lé tel kədərə ne kaw-kaw.
11Yeḛ ar kṵji manje tel to kil-lə-ndi ləm,
Yeḛ sané kil-lə-ndi ar tèl ləa ndogó wər-wər ləm tɔ.
12Deḛ taa tor na̰ ɓəd-ɓəd gə goo rəw gə́ yeḛ wɔji ar dee
Mba kar dee ra néje lai gə́ yeḛ un ndia dɔ’g karee aw lée’g béréré
Dɔ naŋg nee gə́ dəwje d’isi keneŋ lé.
13To asəna gə ɗuguru-kag gə́ yeḛ unda ne naŋg ləa bèe ləm,
Esé to asəna gə nékɔr gin meenoji ləa gə́ yeḛ aree teḛ kəm dee’g bèe ləm tɔ.
14Jɔb, maji kari ur mbii gèŋ oo ne néje neelé!
Maji kari aa loo oo nédumkooje lə Ala ya ɓəi!
15Kar gə́ Ala ar dee d’aw gə rəw-kaw dee ləm,
Ar kil-lə-ndi ləa ndogó wər-wər ləm tɔ lé see i gər ginee wa.
16See kaw liriri-liriri lə kil-li-ndi ləm,
Gə nédumkooje lə yeḛ gə́ to njegosonégər gə́ maji ɔr njoroŋ ləm tɔ lé
See i gər gin dee ya wa.
17Kubuje ləi gə́ nuŋga
Loo gə́ yeḛ ar naŋg wa rəa gə goo lel gə́ ḭ dɔkɔl ula lé see i gər ginee wa.
18See i askəm naji dara karee ndər asəna gə nékoo-kəm
Gə́ to lar gə́ léḛ to gə́ yeḛ ra bèe wa.
19Maji kari ar sí n’gər né gə́ kəm kar sí j’ulá,
Jeḛ n’to njénégərelje gə́ yaa̰ ɓó j’askəm kulá ta el.
20See dəw a kulá kédé pana: M’a gə pata wa.
Nɛ see dəw gə́ ra ɓa wɔji-kwɔji karee udu bo̰ wa.
21Loo gə́ kàr ɔs keḭ-keḭ mee dara’g lé
Dəw kára kara askəm keaa gərərə
Loo gə́ lel togo kəmee aree àr ŋgad-ŋgad lé el.
22Loo gə́ par gə́ dɔgel lé aree ndɔḭ to gə́ larlɔr bèe.
Ǝi, boo-ronduba lə Ala to ɓəl kədm-kədm!
23Jeḛ j’askəm kaw saar teḛ rɔ Bao-siŋgamoŋ’d el,
Yeḛ lé to gə́ boo gə goo siŋgamoŋ ləa ləm,
Gə goo rəwta-gaŋg ləa gə nérea gə́ danasur gə́ un naŋg nee lad ləm tɔ,
Yeḛ aw ndòo kila ta’g el.
24Gelee gə́ nee ɓa dəwje d’askəm ɓəlee ne,
Njekəmkàr gə́ rara kara yeḛ ée gə́ né el.
Currently Selected:
Jɔb 37: SBA2015
Highlight
Copy
Compare
Share
Want to have your highlights saved across all your devices? Sign up or sign in
Ngambai Bible © Alliance Biblique du Tchad 1989, 2015.
