Jɔb 34
34
Elihu ila ta dɔ Jɔb’g
1Elihu tel un ta pa ya ɓəi pana:
2Seḭ njékəmkàrje, maji kar sí ooje taje ləm!
Seḭ gə́ toje njénégərje, maji kar sí urje mbi sí gə́ rɔm’g nee!
3Mbata mbi dəw unda taje gə lée-lée
To gə́ ndəa̰ kara naa ne lel lə nésɔje togə́bè tɔ#Jɔb 12.11.
4Ar sí j’ɔrje kəm né gə́ danasur mbata lə sí,
Ar sí n’gərje né gə́ maji mbuna sí’g.
5Jɔb pana: Neḛ n’to njera nédanasur,
Ala ɓa ɔs ta ləa gə́ gə dɔ najee lé rəw.
6Ta ləa to lée’g ya nɛ d’ée gə́ njetaŋgɔm,
Doo ləa rəa yaa̰ nɛ yeḛ ra né kaiya kára kara el.
7See dəw gə́ to tana gə Jɔb
Gə́ ai ta kula sul dɔ loo’g to gə́ mán bèe ləm,
8Gə́ njaa gə njékɔm na̰’dje gə́ ra né gə́ majel ləma,
Gə́ orè rəw na̰’d més gə njémeeyèrje ləm tɔ lé si gən wa.
9Mbata yeḛ pana: Saŋg gə́ dəw saŋg loo mba kɔm na̰’d gə Ala
To né gə́ gə mḭdé ba.
10Maji kar sí ooje ta ləm ɓa, seḭ dəwje gə́ takə̰ji lə sí inja paw!
Néra gə́ lal najee godo rɔ Ala’g lé ləm,
Meeyèr godo rɔ Bao-siŋgamoŋ’d ləm tɔ.
11Yeḛ ra gə dəw né gə goo kula reaje ləm,
Yeḛ uga nana kara gə goo rəw-kabeeje ləm tɔ#Pak 62.13.
12Tɔgərɔ ya, Ala to njera né gə goo meeyèr el,
Bao-siŋgamoŋ to njekal dɔ né gə́ gə dɔ najee lé el tɔ.
13See na̰ ɓa aree o̰ ɓee dɔ naŋg nee wa.
See na̰ ɓa ɔm naŋg nee bura jia’g wa.
14Ɓó lé yeḛ ə̰ji dɔ rəa-yeḛ’g ya kára ba ləm,
Ɓó lé yeḛ tel gə ndilee gə kəmə ləa rəa’g ləm tɔ ndá
15Dəwje lai d’a kudu gə́ léegəneeya ləm,
Dəw a tel kaw naŋg gogo ləm tɔ.
16Ɓó lé i to njegosonégər ndá maji kari oo ta nee,
Maji kari ur mbii oo ne taje ləm gə́ m’pa!
17See dəw gə́ to njeba̰ lə néra gə́ danasur lé a ko̰ɓee wa.
See i a kila ta dɔ njera nédanasur’d gə́ to njesiŋgamoŋ lé wa.
18See dəw a kula mbai pana: I to dəw gə́ gə mḭdé ba
Esé a kula dəwje gə́ boo pana: Seḭ toje njéra né kori-korije wa.
19Yeḛ ɔr kəm ŋgan-mbaije unda dee ɓəd ləm,
Yeḛ oo bao to gə́ ur dɔ njendoo’g el ləm tɔ,
Mbata deḛ lai to néje gə́ jia ɓa ra dee.
20Léegəneeya deḛ d’wəi,
Dan loo bab lé koso-dəwje d’unda ndolè d’udu bo̰,
Njesiŋgamoŋ godo lal kar ji dəw ɔrɔ rəa.
21Mbata kəm Ala oo panjaa dəwje lai ləm,
Yeḛ gər kila gɔl nana kara ləm tɔ.
22Loo gə́ ndul njudu-njudu gə́ dəb bigim
Gə́ njéra né kori-korije d’askəm k’iya rɔ dee keneŋ lé godo.
23Ala aw ndòo kaa dɔ dəw gərərə kuree əw ɓa
Mba kar dee-deḛ səa d’aw loo gaŋg-rəwta’g el.
24Yeḛ tuji njésiŋgamoŋje lal saŋg gin dee
Ndá yeḛ taa tor dee gə njé gə́ raŋg.
25Mbata yeḛ gər néra dee gao,
Yeḛ tɔs dee loondul’g tila dee ləm, rəd dee naŋg mbə̰ji-mbə̰ji ləm tɔ.
26Yeḛ kunda dee to gə́ kunda ne njémeeyèrje bèe
Kəm dəwje’g lai.
27Loo gə́ deḛ d’unda rɔ dee ɓad rəa’g ləm,
Deḛ d’uba rəw-kabeeje lai d’ya̰ ləm tɔ ndá
28Deḛ d’ar ndu no̰ lə njendoo aw saar oso mbi Ala’g lé ləm,
Deḛ d’aree oo ndu no̰ lə njénékəmndooje ya ləm tɔ.
29Ɓó lé yeḛ ar loo to lɔm ndá
See na̰ ɓa a kaskəm kɔm ɓəl dɔ dəwje’g wa.
Ɓó lé yeḛ iya kəmee ndá see na̰ ɓa askəm kée wa.
Yeḛ ra né gə ginkoji dəwje gə raŋg əsé dəw gə́ kára aree asəna
30Gə mba kar njehulai o̰ ɓee el ləm,
Mba karee to gum kwa dəwje el ləm tɔ.
31Mbata see dəw a kula Ala pana:
Bo̰ néra neḛ ɔs ta neḛ’g ndá n’a ra kaiya gogo el ləm,
32Né gə́ neḛ n’gər el lé maji karee tɔji neḛ ləma,
Ɓó lé neḛ n’ra né gə́ to gə dɔ najee el kara
N’a tel ra gogo el ŋga ləm tɔ, see a pa bèe wa.
33See gə goo takə̰ji ləi-i ɓa Ala a gaŋg ne rəwta wa.
To i nja mbad ləm, to i nja mbər ləm tɔ ɓó to ma el.
Né gə́ i gər lé maji kari pa ɓa.
34Dəwje gə́ takə̰ji lə dee inja paw lé d’a ndigi səm,
Njekəmkàr gə́ oo ta ləm ndá a kḛji to gə́ m’ə̰ji bèe ya tɔ.
35Jɔb pata lal gər ginee ləm,
Taje ləa gə́ pa lé lal kɔrkəmta ləm tɔ.
36Maji kaḭ mee Jɔb gə́ kédé-kédé ya
Mbata yeḛ ila ta’g to njémeeyèrje bèe.
37Mbata néra majel ləa lé yeḛ ila kaiya dɔ’d gə́ kédé-kédé ləm,
Yeḛ ula dɔ sí’g ləma
Yeḛ pa taje ləa gə́ dɔ na̰’d dɔ na̰’d ɔs ne ta lə Ala rəw ləm tɔ.
Currently Selected:
Jɔb 34: SBA2015
Highlight
Copy
Compare
Share
Want to have your highlights saved across all your devices? Sign up or sign in
Ngambai Bible © Alliance Biblique du Tchad 1989, 2015.
