Jɔb 20
20
Ta gə́ njekɔm’g gɔl joo gə́ Sopar ula Jɔb
1Sopar, dəw gə́ Naaman un ta pa pana:
2Takə̰jije ləm ɔsm ɓɔḭ-ɓɔḭ gə mba kilai ta’g ləm,
Meekaarkərm ləm am m’askəm kisi bèe el ləm tɔ.
3Ma m’oo ta rɔkulje gə́ m’as taa taree el,
Gosɔsnégər ləm a kam m’ilai ta’g tɔ.
4See i gər el wa. Un kudee ləw ba
Gə́ Ala unda ne dəw dɔ naŋg nee lé
5Kun baŋga lə njémeeyèrje kuree to gə́ lam ba ləm,
Rɔlel lə njehulai kara kuree əw waga ba ləm tɔ lé see i gər bèe el wa.
6Lée ti-rɔ ləa aw njal teḛ dara
Ar dəa aw saar mee mum’g kara
7Yeḛ a tuji gə no̰ to gə́ ɓiriɓisi ləa bèe ləm,
Deḛ gə́ d’ée kédé kara d’a dəji pana: See yeḛ lé əd ra ŋga nee wa.
8Yeḛ a kḭ kaw to gə́ néni ndá dəw a koo gée el ləm,
Yeḛ a sané pá to gə́ némḭdi gə́ loondul’g bèe ləm tɔ.
9Kəm dəw gə́ ée kédé lé a kée el ləm,
Loo gə́ yeḛ si keneŋ kédé lé kara a kée keneŋ el ŋga ləm tɔ.
10Ŋganeeje lé njéndooje d’a nar némajije ji dee’g ləm,
Néje gə́ yeḛ taa dɔ buguru’g lé d’a tel ne kar dee gogo ləm tɔ.
11Siŋgamoŋ basa ləa gə́ taa barkəmreaje pəl-pəl lé
A to səa na̰’d babur’g.
12Majel lel təa’g jula-jula ləm,
Yeḛ iyá gel ndəa̰’g ləm,
13Yeḛ ŋgəm lal kya̰ gée ləma,
Aree tia̰ ŋgadŋgia̰’g ləm tɔ.
14Nɛ nésɔ ləa a tel to ɓəd ŋgan siiyeḛ’g
Ndá a tel gə́ mas li-meewai darəa’g.
15Yeḛ turu nébaoje mée’g ndá yeḛ a tɔmé dee,
Ala nja a kɔr dee mée’g kɔm dee raga.
16Né gə́ yeḛ njibi lé tel to mas li-meewai
Ndá ndo̰ li-meewai a tɔlee.
17Yeḛ a kila kəmee dɔ manje’g el ləm,
Gə dɔ kəm-rəw-manje’g el ləma, əsé dɔ ubu tə̰ji’g gə mbà gə́ to asəna gə baaje lé el ləm tɔ.
18Yeḛ a tel gə né gə́ yeḛ iŋga ɓó a kuba majee el ŋga ləm,
Némajije lai gə́ yeḛ taa lé yeḛ a tel ne kar dee gogo ɓó a kal rəa gə mbəa el ləm tɔ.
19Mbata yeḛ ra kədərə gə njéndooje ya̰ dee dan nékəmndoo’g ləm,
Yeḛ taa kəije gə́ yeḛ ra el gə siŋgamoŋ ləm tɔ.
20Mal né gə́ rəa lé loo kunda ŋgŋgee godo,
Nɛ nébaoje ləa gə́ rara kara a taa ne dɔ rəa el.
21Gə goo mal né gə́ rəa lé ar né kára kara nai el,
Nɛ kuru si maji ləa a kəw el.
22Dan boo-néje gə́ taa rəa pəl-pəl lé yeḛ a si ne dan néurti’g ləm,
Ji njénékəmndooje lai a mbo̰ na̰ dəa’g ləm tɔ.
23Loo gə́ yeḛ si mbula nésɔ mée’g ndá
Ala a kɔm pər oŋg ləa dəa’g
Karee ər dəa’g to gə́ ndi bèe.
24Ɓó lé yeḛ teḛ ta nérɔje gə́ to larndul ndá
Ɓandaŋ larkas a mbudee ya.
25Yeḛ ɔr kandə ɓandaŋg rəa’g,
To né gə́ adə njel-njel gə́ ɔs wurndulee teḛ
Ndá ɓəl-yoo dəb dəa’g.
26Néurtije lai lé d’unda dee kul mbata nébaoje ləa,
Pər gə́ dəw a yel el ɓa a rée dula-dula ləm,
A ko̰ ges néje gə́ nai mee kəi-kubu’g ləa rug-rug ləm tɔ.
27Dara a riba dɔ néra kori-korije ləa gə́ raga ləm,
Naŋg kara a kḭ kɔsee ŋgərəŋ ləm tɔ.
28Némajije gə́ mee kəi’g ləa lé mán-kaw a dəs ne ləm,
Ndɔ oŋg lə Ala d’a godo mbad-mbad ləm tɔ.
29Yee ɓa gə́ né gə́ Ala unda kul wɔji ne dɔ njemeeyèr ləm,
Yee ɓa gə́ nédɔji gə́ Ala wɔji ne dəa ləm tɔ.
Currently Selected:
Jɔb 20: SBA2015
Highlight
Copy
Compare
Share
Want to have your highlights saved across all your devices? Sign up or sign in
Ngambai Bible © Alliance Biblique du Tchad 1989, 2015.
