Jɔb 2
2
Né gə́ naa Jɔb gə́ njekɔm’g gɔl joo
1Tɔɓəi ndɔ kára bèe loo gə́ kuraje lə Ala gə́ dara ree d’aar nea̰’g ndá Njekurai kara ree aar sə dee na̰’d no̰ Njesigənea̰’g tɔ. 2Njesigənea̰ dəji Njekurai pana: See i ḭ ra wa.
Ndá Njekurai ila Njesigənea̰’g pana: M’ḭ loo gugu’d dɔ naŋg nee ləm, gə loo njaa keneŋ ləm tɔ.
3Njesigənea̰ dəji Njekurai pana: See i oo kura ləm Jɔb wa. Gar dəw gə́ togə́bè lé godo dɔ naŋg nee. Yeḛ to dəw gə́ njera né gə́ gə goo rəbee ləm, gə njenéra gə́ danasur ləm tɔ. Yeḛ ɓəl Ala ləm, unda ne rəa ɓad dɔ néra gə́ majel’g ləm tɔ. Yeḛ aar njaŋg dɔ néra ləa gə́ gə goo rəbee ya. Ndá i ɔsm ɓɔḭ-ɓɔḭ mba karm m’tujee kari ba lal né gə́ bèe.
4Yen ŋga Njekurai tel ila Njesigənea̰’g pana: Ndar rɔ tɔ ndar rɔ tɔ. Néje lai gə́ dəw iŋga lé yeḛ un ar mba kuga ne darəa ya. 5Nɛ maji kari un jii ɔrɔ ne siŋgarea gə darəa oo ndá ma m’gər gao to gə́ yeḛ a kila ndɔl dɔi’g kəmi’g nee ya.
6Njesigənea̰ ula Njekurai pana: Aa oo, ma m’ilá jii’g nɛ né kára ba lé i a kyá̰ kəmba!
7Yen ŋga Njekurai ɔd no̰ Njesigənea̰’g aw. Tɔɓəi yeḛ ar rɔ Jɔb pélé ḭ gɔlee’g naŋg saar teḛ dəa’g tar. 8Togə́bè Jɔb un seŋgəre ŋgə ne rəa ləm, si ne dan bu’g ləm tɔ.
9Dené ləa dəjee pana: See i aar njaŋg dɔ néra gə́ gə goo rəbee ləi ya ɓəi wa. Maji kari ila ndɔl dɔ Ala’g lé wəi ne.
10Nɛ Jɔb tel ilá keneŋ pana: I pata asəna gə mbə-dené bèe. Mba ɗi ɓa j’iŋga né gə́ maji rɔ Ala’g lé ndá see j’a taa né gə́ majel to el wa.
Gə goo néje lai lé Jɔb ra ne kaiya gə taje gə́ teḛ təa’g el.
Baokuraje lə Jɔb munda ree rəa’g
11Baokuraje lə Jɔb munda d’oo sor nékəmndooje ɓəd-ɓəd gə́ teḛ dəa’g ndá nana kara ḭ ɓee ləa aw: Elipaj, dəw gə́ Teman ləm, Bildad, dəw gə́ Sua ləma, gə Sopar, dəw gə́ Naaman ləm tɔ. Deḛ d’ḭ ɓee lə dee d’ɔm na̰’d rəw’g d’aw gə mba ndiŋga səa ndòo ləm, gə mba gɔl mée ləm tɔ. 12Loo gə́ deḛ nai əw ya ɓəi ndá d’un kəm dee d’ée ndá deḛ gəree el. Deḛ d’ɔr ndu dee gə́ tar wəl no̰ ne ləm, deḛ til kubuje lə dee gə́ boi yul-yul rɔ dee’g ləma, deḛ tuga kor d’ɔm dɔ dee’g ləm tɔ. 13Deḛ d’isi səa dɔ naŋg’d ya ndɔ siri dan kàrá gə loondul’g ar dəw kára kara ulá ta el mbata deḛ d’oo néɓəŋgərəti ləa gə́ al dɔ loo sula lé.
Currently Selected:
Jɔb 2: SBA2015
Highlight
Copy
Compare
Share
Want to have your highlights saved across all your devices? Sign up or sign in
Ngambai Bible © Alliance Biblique du Tchad 1989, 2015.
