Jɔb 18
18
Ta gə́ njekɔm’g joo lə Bildad
1Bildad, dəw gə́ Sua un ta pa pana:
2See ndɔ gə́ ra ɓa a kundaje ŋgaŋ taje lə sí wa.
Maji kar sí iŋgaje gosonégər ɓa j’a kwɔji na̰ ta ɓəi.
3See gelee gə́ ban ɓa d’oo síjeḛ gə́ daje wa.
See gelee ban ɓa jeḛ n’to gə́ mbəje kəm sí’g wa.
4Ǝi Jɔb, i gə́ oŋg ləi tujii pugudu,
See kəm kar naŋg tel to dɔ nduba gə mbata ləi-i wa.
See kəm kar kɔr mbalje sané d’ya̰ loo-to dee wa.
5Lookàr lə njemeeyèr a kwəi misi ləm,
Ndo̰ pər gə́ o̰ bilim-bilim gə́ ḭ keneŋ lé a ndogó el ləm tɔ#Jɔb 21.17.
6Lookàr a tel ndul njudu-njudu mee kəi’g ləa ləm,
Néndogó ləa a kwəi misi ləm tɔ.
7Gɔlee gə́ to njam-njam lé a tel kunda ndolé ləm,
Lé yeḛ wa rəa kɔgərɔ kara a koso ya ləm tɔ.
8Mbata yeḛ ula gɔlee ba̰də’g ləm,
Yeḛ njaa mee wul-ba̰də’g ləm tɔ.
9Gum wá gel gɔlee’g ləm,
Wul-ba̰də ɓiree ilá ləm tɔ.
10D’iya gum naŋg gə mba kwá ne ləm
Tɔɓəi mba̰gəra to kila rəw-kabee’g ləm tɔ.
11Néɓəl-boo aḭ dəa sub oma̰ səa ləm,
Tuba gée ɓiri-ɓiri ləm tɔ.
12Ɓó ɔr siŋgá ho̰d ləm,
Nékəmndooje d’aḭ dəa sub-sub ləm tɔ.
13Ndareje bɔr mbuji-mbuji gə́ kédé-kédé ləm,
Yoo gə́ teḛ gə dɔtar ya tuji barkəmreaje pugudu-pugudu ləm tɔ.
14Kəi ləa gə́ yeḛ ɔm mée dɔ’g gə́ loo-si-lɔm lé d’ɔree wɔgədɔ keneŋ
D’aw səa rɔ mbai dɔ néje gə́ to ɓəl kədm-kədm’g.
15Dəw ləa kára kara nai mee kəi’g ləa el ləm
Kṵji pər gə́ kas njir-njir taa loo-siée pəl-pəl ləm tɔ.
16Gel ŋgiráje gə́ naŋg lé tudu kurum-kurum ləm,
Deḛ tuga barkəmeeje gə́ tar badə-badə ləm tɔ.
17Dəw kára kara mée olé dəa’g el ləm,
Ria kara ɓar dɔ naŋg nee el ləm tɔ.
18D’ɔsee lookàr’g d’ila dan loondul’g ləm,
Deḛ tɔbee dɔ naŋg nee ləm tɔ.
19Yeḛ ya̰ ŋganeeje əsé ŋgakeaje mbuna koso-dəwje’g ləa el,
Dəw gə́ si kəmba kara godo loo-siée’g tɔ.
20Dəwje gə́ d’a gə koji dee gogo lé kaar dee a kwa dee paḭ mbata tuji ləa ləm,
Deḛ gə́ d’isi keneŋ ɓasinè kara ɓəl-boo a kunda dee badə gaŋg dee gə mbəa ləm tɔ.
21Tɔgərɔ, né gə́ raŋg gə́ a teḛ dɔ njemeeyèr’g lé godo ləm,
Né gə́ raŋg gə́ a teḛ dɔ yeḛ gə́ gər Ala el lé kara godo ləm tɔ.
Currently Selected:
Jɔb 18: SBA2015
Highlight
Copy
Compare
Share
Want to have your highlights saved across all your devices? Sign up or sign in
Ngambai Bible © Alliance Biblique du Tchad 1989, 2015.
