Jɔb 14
14
Ta kila’g lə Jɔb ɓəi
1Dəw gə́ dené ojee lé
Ndɔ si kəmba ləa bula el ləm, né ula kəmee ndòo ta-ta ləm tɔ.
2Yeḛ nduba rəa to gə́ pudu bèe ndá gəḭ,
Yeḛ ɔd aw to gə́ ndil kag gə́ sané pá bèe.
3Dəw gə́ bèe ɓa i teḛ kəmi dəa’g!
Yee ɓa to ma gə́ i ndɔrm aw səm loo-gaŋg-rəwta’g ləi.
4See na̰ ɓa askəm kar né gə́ àr ŋgad-ŋgad unda loo teḛ mee dəw gə́ mina̰’g wa.
Dəw kára kara gə́ askəm ra bèe godo.
5Ɓó lé i wɔji ndɔje ləa njaŋg ləm, ɓó lé i tura bula lə naḭje ləa ləma,
Ɓó lé i wɔji ŋgaŋ loo ləa gə́ yeḛ askəm dəs el ləm tɔ ndá
6Maji kari un kəmi dəa’g aree taa kəmə
Mba kar rəa lelee to gə́ njekula lar gə́ iŋga nékoga dɔ ji mee ndɔ’g ləa bèe.
7Kag lé nékunda-mee-yel ləa to keneŋ,
Loo gə́ deḛ tugá gaŋgee ndá yee tel uba gogo ləm,
Barkəmeeje tel tuba gogo ləm tɔ.
8Loo gə́ ŋgiráje gə́ naŋg ɓuga ləm,
Loo gə́ kuburu rəa ndolé mee nduji naŋg’d ləm tɔ
9Ndá yee tel idi loo gə́ ma̰-ndi si ree ləm,
Yee tuba barkəmeeje to gə́ kag gə́ mea̰ sigi bèe ləm tɔ.
10Nɛ dəw gə́ wəi lé ndá siŋgá godo ŋga.
Loo gə́ kəmə lə dəw teḛ mba̰ lé see a kée ra tɔɓəi wa.
11Kṵji ndag-manje teḛ ləm,
Man baa-booje d’yi tudu kurum-kurum ləm tɔ.
12Togə́bè ɓa loo gə́ dəw wəi mba̰ ndá yeḛ a kḭta el ləm,
Yeḛ a ndel el saar kar dara sané pá ləma,
Yeḛ a kḭ dɔ ɓi’g ləa el saar ləm tɔ.
13Ǝi, ɓó lé i ndigi kya̰m ɓee’g lə njé gə́ d’wəi
Gə mba kudu tam saar kar oŋg ləi dəs ləm,
Gə mba kwɔji ndɔ gə́ i a kar məəi olé ne dɔm’g njaŋg ləm tɔ...
14Dəw gə́ wəi lé see a tel si kəmba wa.
M’a kunda məəm yel m’ŋgina ne mee ndɔje lai gə́ m’oo ko̰-né keneŋ
Saar kar né gə́ wɔji dɔm lé teḛ.
15I a ɓarm ndá m’a tel kilai’g,
I a ndiŋga rɔi mba koo kula gə́ i ra gə jii lé.
16Nɛ ɓasinè i tura kila gɔlmje ləm,
Kəmi oso dɔ kaiya ramje’g ləm tɔ,
17Kaltaje ləm lé i iya dee mee ɓɔl’g ləm,
I ə̰ji néra kori-korije ɔm dɔm’g ləm tɔ.
18Mbal-ɓuŋga oso ndá təd njigi-njigi ləm,
Biri mbal nduburi oso raŋg ya̰ lé ləm tɔ.
19Manje kodé kəm kɔr mbal ləm,
Kula ləa ɔr naŋg ləm tɔ,
Togə́bè ɓa i tuji meekundayel lə dəw pugudu tɔ.
20I dum dəa ta-ta ləm, i aree ɔd aw ləma,
I ar kəmee tel wagəsa tɔɓəi i tubá ləm tɔ.
21Ɓó lé d’ila riɓar dɔ ŋganeeje’g ndá yeḛ gər el,
Ɓó lé d’ar dee d’oso kul kara yeḛ gər el ya tɔ.
22To dakasrea-yeḛ nja ɓa yeḛ oo ko̰-né keneŋ ləm,
To ŋgaw mée-yeḛ nja ɓa si ne dan kəmndoo’g ləm tɔ.
Currently Selected:
Jɔb 14: SBA2015
Highlight
Copy
Compare
Share
Want to have your highlights saved across all your devices? Sign up or sign in
Ngambai Bible © Alliance Biblique du Tchad 1989, 2015.
