Jeremi 42
42
Jeremi ɔs Judaje gə́ ndigi sa rɔ dee kaw Ejiptə lé rəw
1Ɓée kudu-njérɔje lai gə Jokana, ŋgolə Karea gə Jejania, ŋgolə Hosee ləm, gə koso-dəwje lai gə́ un kudee dɔ ŋganje’g saar teḛ ne dɔ njé gə́ tɔg’d ləm tɔ lé rəm pər 2d’ula Jeremi, njetegginta pana: Maji kar ndòo raje lə sí taa kəmi rəgm ya. Ra mbai ta Njesigənea̰, Ala’g lé ləi mbata lə síjeḛ dəwje lai gə́ naije mbata jeḛ m’bula yaa̰ kédé nɛ jeḛ naije jebəre ba to gə́ i oo gə kəmi nee lé. 3Maji kar Njesigənea̰, Ala ləi tɔji sí rəw gə́ kəm kar sí j’unje ləm, gə né gə́ kəm kar sí n’raje ləm tɔ.
4Jeremi njetegginta ula dee pana: M’oo ta lə sí ya. Aa ooje, m’a ra tamaji ta Njesigənea̰, Ala’g lə sí gə goo tadəji lə sí. M’a kar sí ooje taje lai gə́ Njesigənea̰ a kila sí keneŋ ɓó m’a kiya sə sí dɔ né kára kara el.
5Deḛ d’ula Jeremi pana: Ɓó lé jeḛ n’raje néje lai gə́ Ala ləi gə́ Njesigənea̰ a kulai kari ula sí el ndá maji kar Njesigənea̰ to kankəm njekɔrgoota gə́ gə goo rəbee mba kila ne ta dɔ sí’g ya. 6Lé to né gə́ maji əsé né gə́ majel kara j’a kilaje koji dɔ ta’g lə Njesigənea̰, Ala lə sí gə́ jeḛ j’ulaije rəa’g, mba kar sí j’iŋgaje ne rɔlel ɓó lé jeḛ j’ilaje koji dɔ ta’g lə Ala lə sí gə́ Njesigənea̰ lé.
7Ndɔ dɔg goo’g ndá Njesigənea̰ ula Jeremi ta. 8Yen ɓa Jeremi ɓar Jokana, ŋgolə Karea gə ɓée kudu-njérɔje lai gə́ d’aw səa ləm, gə koso-dəwje lai un kudee dɔ ŋganje’g saar teḛ ne dɔ njé gə́ tɔg’d ləm tɔ. 9Yeḛ ula dee pana: Njesigənea̰, Ala lə Israɛlje gə́ seḭ ulamje rəa’g mba karm m’aw gə ndòo raje lə sí nea̰’g lé pa togə́bè pana:
10Ɓó lé seḭ naije mee ɓee’g nee
Ndá m’a kar sí síje keneŋ ɓó
M’a tuji sí el,
M’a ma̰a sí ndá m’a tɔr sí el,
Mbata ma m’ya̰ goo majel
Gə́ m’wɔji-kwɔji ra sə sí lé.
11Maji kar sí ɓəlje mbai gə́ Babilɔn
Gə́ seḭ ɓəleeje lé el,
Ɓəleje el ɓó,
Njesigənea̰ ɓa pa bèe,
Mbata m’a nai sə sí mba kaji sí ləm,
Gə mba kɔr sí jia’g ləm tɔ,
12M’a kar mée aw taḭ-taḭ dɔ sí’g
Ndá yeḛ a koo kəmtondoo lə sí ləm,
Yeḛ a kya̰ loo kar sí síje
Mee ɓee’g lə sí ləm tɔ.
13Nɛ ɓó lé seḭ ilaje ŋgonkoji dɔ ta’g lə Njesigənea̰, Ala lə sí el, 14ɓa seḭ pajena: Wah, j’a si mee ɓee’g nee el nɛ j’a kaw mee ɓee gə́ Ejiptə, loo gə́ j’a koo rɔ keneŋ el ləm, j’a koo ndu to̰to̰ keneŋ el ləma, muru a lal sí keneŋ el ləm tɔ, lé neelé ɓa j’a si keneŋ, 15ndá maji kar sí ooje ta lə
Njesigənea̰, seḭ ges Judaje gə́ naije!
Njesigənea̰ gə́ njeboo-néje,
Ala lə Israɛlje pa togə́bè pana:
Ɓó lé seḭ aarje njaŋg
Dɔ kaw Ejiptə’g ləm,
Ɓó lé seḭ aw síje keneŋ ləm tɔ ndá
16Kia-rɔ gə́ seḭ ɓəleeje lé
A kinja sí mee ɓee gə́ Ejiptə ləm,
Ɓoo-boo gə́ seḭ ɓəleeje lé
A ree goo sí’g mee ɓee gə́ Ejiptə neelé ləm tɔ
Ndá seḭ a kwəije keneŋ.
17Deḛ lai gə́ d’a kaar njaŋg
Dɔ kaw Ejiptə’g kaw kisi keneŋ lé
D’a kwəi yoo-kiambas ləm,
Gə yoo-ɓoo-boo ləma,
Gə yoo-koso ləm tɔ
Ɓó dəw kára kara a nai el ləm,
Dəw kára kara a kaḭ
No̰ némeekonje gə́ m’a kar dee ree
Dɔ dee’g lé el ləm tɔ.
18Mbata Njesigənea̰ gə́ njeboo-néje gə́ to Ala lə Israɛlje lé pa togə́bè pana: To gə́ oŋg gə meekḭ jugugu ləm ɔm dɔ dəwje gə́ Jerusalem’g lé ɓó lé seḭ awje Ejiptə ndá meekḭ jugugu ləm a kɔm dɔ sí’g togə́bè tɔ, seḭ a toje né kun kunda yoo dɔ’g lə dəwje ləm, gə néɓəl ləm, gə nékila ndɔl dɔ’g ləma, gə nékila rɔkul-boo dɔ’g ləm tɔ. Ndá seḭ a kooje loo neelé gogo el.
19Njesigənea̰ ula sí pana: Seḭ ges Judaje gə́ nai lé awje Ejiptə el. Maji kar sí gərje gao to gə́ ma m’ɔg sí dɔ’g ɓogənè ya. 20Seḭ nja seḭ suje kəm rɔ sí mbata seḭ ulamje rɔ Njesigənea̰, Ala’g lə sí mba pa pana: M’ra ndòo rɔ Njesigənea̰ Ala’g lə sí mbata lə sí ləm, m’ula sí taje lai gə́ Njesigənea̰, Ala lə sí pa lé ləm tɔ ndá seḭ a raje née ya. 21Ɓogənè ma m’ula sí njai ya nɛ seḭ unje mbi sí rəw dɔ ta’g lə Ala lə sí gə́ Njesigənea̰ lé ləm, gə dɔ néje gə́ yeḛ ulam mba karm m’ula sí lé ləm tɔ. 22Ɓasinè maji kar sí gərje gao to gə́ seḭ a kwəije yoo-kiambas ləm, gə yoo ɓoo-boo ləma, gə yoo-koso ləm tɔ loo gə́ seḭ ndigije kaw síje keneŋ lé.
Currently Selected:
Jeremi 42: SBA2015
Highlight
Copy
Compare
Share
Want to have your highlights saved across all your devices? Sign up or sign in
Ngambai Bible © Alliance Biblique du Tchad 1989, 2015.
