Jeremi 22
22
1Njesigənea̰ ula Jeremi ta togə́bè pana: Aw mee kəi’g lə mbai gə́ Juda ndá pata nee keneŋ. 2I a pana: I mbai gə́ Juda gə́ si dɔ kalimbai’g lə Dabid, gə kuraje ləi, gə koso-dəwje ləi gə́ a̰dje gə tarəwje neelé ooje ta lə Njesigənea̰! 3Njesigənea̰ pa togə́bè pana: Gaŋje rəwta néra gə́ gə dɔ najee gə goo rəbee ləm, taaje dɔ deḛ gə́ d’ula kəm dee ndòo ji njékula kəm loo ndooje’g ləma, ulaje kəm dəw-dɔ-ɓee gə ŋgonal gə njekəisiŋga ndòo el ləm tɔ. Raje néra gə́ kərm-kərm el ləm, ilaje məs yeḛ gə́ ta wa dəa el naŋg mee loo gə́ nee el ləm tɔ. 4Mbata ɓó lé seḭ a raje né gə goo ta neelé tɔgərɔ ndá mbaije gə́ d’isi dɔ kalimbai’g lə Dabid lé d’a si mee pusu-rɔje’g ləm, d’a tuba kundaje ləm tɔ, deḛ ləm gə kuraje lə dee ləma, gə koso-dəwje lə dee ləm tɔ mba kandə gə tarəwkəije’g neelé. 5Nɛ ɓó lé seḭ unje mbi sí rəw dɔ taje’g neelé ndá Njesigənea̰ pana: Neḛ manrɔ neḛ bər-bər mba kar kəi-mbai neelé tel to dɔ nduba#Mat 23.38, Lug 13.35.
6Mbata Njesigənea̰ pata wɔji ne dɔ kəi-mbai lə mbai gə́ Juda pana:
Kəm neḛ’g lé i to asəna gə ɓee gə́ Galaad bèe ləm,
Asəna gə dɔ sém mbal gə́ Liba̰ bèe ləm tɔ.
Nɛ tɔgərɔ n’a kari tel to asəna gə dɔdilaloo ləm,
Gə ɓee-boo gə́ dəw kára kara si keneŋ el ləm tɔ.
7Neḛ n’wa dɔ gɔl njétujilooje
Gə mba kar dee d’oma̰ səi,
Nana kara aw gə nérɔje ləa jia’g-jia’g,
Deḛ d’a tuga kag-sɛdrəje ləi
Gə́ maji yaa̰ kɔm dee pər’d.
8Ginkoji dəwje gə raŋg bula d’a dəs mbɔr ɓee-boo’g neelé ndá d’a dəji na̰ ta yo gə́ nee pana: See gelee ban ɓa Njesigənea̰ ra gə ɓee-boo neelé né gə́ togə́bè wa. 9Ndá d’a kila dee keneŋ pana: Mbata deḛ d’uba ta manrɔ lə Njesigənea̰ d’ya̰ ləm, deḛ d’unda barmba dəb kəm dee naŋg no̰ magəje’g pole dee ne ləm tɔ.
Ta gə́ wɔji dɔ Salum, ŋgolə Jojias gə́ njetaa toree lé
10Yeḛ gə́ wəi mba̰ lé
Maji kar sí nea̰je el ləm,
Waje ndòo yée el ləm tɔ.
Nɛ yeḛ gə́ aw kəmba
Gə́ a tel ree gogo el ləm,
A tel koo ɓee-kojee el ləm tɔ lé ɓa
Maji kar sí nea̰je.
11Mbata Njesigənea̰ pata togə́bè wɔji ne dɔ Salum, ŋgolə Jojias, mbai gə́ Juda gə́ o̰ ɓee tor bɔbee Jojias’g ɓa yeḛ ḭ lée’g nee aw pana: Yeḛ lé a tel ree lée’g neelé gogo el. 12Nɛ yeḛ a kwəi mee ɓee gə́ d’wá ɓər d’aw səa keneŋ lé ɓó kəmee a koso dɔ ɓee’g neelé gogo el ŋga.
Ta gə́ wɔji dɔ Jojakim, ŋgolə Jojias lé
13Meeko̰ a koso dɔ yeḛ
Gə́ tum gin kəi ləa
Gə goo néra gə́ gə dɔ najee el ləm,
Gə rɔd ŋgan kəije dɔ na̰’d-na̰’d
Gə goo néra gə́ gə goo rəbee el ləma,
Gə ar maree ra kula aree kari ba
Lal kuga dɔ jia ləm tɔ.
14Yeḛ gə́ pana:
N’a ra kəi lə neḛ karee boo ləm,
N’a rɔd ŋgan kəije dɔ na̰’d-na̰’d
Karee tad rəg-rəg ləm,
Gə́ ar dee mbudu kəmbolèje
Gə́ tad keneŋ ləm,
Gə́ ɓər kag-sɛdrəje mée’g ləma,
Gə́ ɔr giree gə né gə́ kas ləm tɔ.
15See i o̰ ɓee
Mbata mal kag-sɛdrəje gə́ wa məəi wa.
See bɔbi sɔ né gə ai né el wa.
Nɛ yeḛ nja gaŋg rəwta gə goo rəbee ləm,
Gə dɔ najee ləm tɔ
Ndá yeḛ si ne dan rɔlel’g.
16Yeḛ gaŋg rəwta lə njenékəmndoo
Gə yeḛ gə́ né lalee gə goo rəbee,
Ndá yeḛ si ne dan rɔlel’g.
Njesigənea̰ pana:
See néra gə́ togə́bè ɓa gə́ gər neḛ el wa.
17Nɛ i lé kəmi gə dɔ ɓəŋgəri
To mba tɔl ne mal kiŋga né gə goo rəbee el ləm,
Gə mba kila ne məs yeḛ gə́ ta wa dəa el ləma,
Gə mba kula kəm loo ndòo
Ra ne né gə́ kərm-kərm ləm tɔ.
18Gelee gə́ nee ɓa Njesigənea̰ pa ne ta togə́bè wɔji ne dɔ Jojakim, ŋgolə Jojias, mbai gə́ Juda pana:
D’a nea̰ pana: Wai, ŋgokɔm gə́ diŋgam!
Wai, ŋgokɔm gə́ dené! bèe el ləm,
Esé d’a nea̰ togə́bè pana: Wai, mbai ləm!
Wai, njemajidum ləm bèe el ləm tɔ#2Mb 23.36–24.6, 2SgI 36.5-7.
19Dɔɓaree a kasəna gə ka̰ mulayḛ̀je bèe,
D’a ndɔree naŋg kaw kilá gir tarəwkɔgje gə́ Jerusalem.
Rɔkul a gə kwa dɔ njé gə́ Jerusalem
20Ubaje dɔ sém mbal gə́ Liba̰
Raje ne né wəl ləm,
Paje gə ndu sí gə́ tar ɓəgəgə
Arje loo gə́ Basan ləma,
Arje ndu sí ɓar dɔ sém loo
Gə́ Abarim ləm tɔ!
Mbata deḛ lai gə́ d’unda sí dan kəm dee’g lé
Tuji pugudu.
21Ma m’ula sí ta
Loo gə́ seḭ síje dan maji’g,
Nɛ seḭ pajena:
A kooje ta el.
Yee ɓa gə́ néra sí gə́ un kudee gə kas sí ba lé
Seḭ unje ne mbi sí rəw dɔ ta’g lə neḛ.
22Njékul síje lai lé
Lel a kɔr dee kaw sə dee əw ləm,
Deḛ gə́ d’unda sí dan kəm dee’g kara
D’a kaw ɓee-ɓər’g ləm tɔ.
Yen ŋga rɔkul a dəb dɔ sí’g
Kar sɔḭ wa kəm sí
Mbata néra meeyèrje lə sí lai.
23Seḭ gə́ síje sém mbal gə́ Liba̰
Gə́ raje kəi lə sí asəna gə kəi-yel
Mbuna kag-sɛdrəje’g bèe lé
Loo gə́ némeekonje d’a teḛ dɔ sí’g ndá
Seḭ a tuma̰je ŋgururu-ŋgururu,
To némeeko̰ gə́ to asəna gə ndóo
Gə́ ra dené loo-koji ŋgon’g bèe.
Ta gə́ wɔji dɔ Jekonia, ŋgolə Jojakim
24Njesigənea̰ pana: Neḛ n’to njesikəmba, lé i Jekonia, ŋgolə Jojakim, mbai gə́ Juda to gə́ ŋgama gə́ jikɔl neḛ’g ya kara n’a kɔree gə́ léegəneeya#2Mb 24.8-15, 2SgI 36.9-10. 25N’a kubá kyá̰ ji deḛ gə́ ndigi tɔlee’g ləm, gə ji Nebukadnesar, mbai gə́ Babilɔn ləma, gə ji Kaldeje’g ləm tɔ. 26N’a kuni-i gə kɔinje gə́ njekojii kaw kɔm sí ɓee gə́ raŋg gə́ to ɓee-koji sí el ndá lé nee ɓa seḭ a kwəije keneŋ. 27Nɛ ɓee gə́ mal tel kaw keneŋ ra dee lé d’a tel kaw keneŋ gogo el ŋga. 28See Jekonia to jo gə́ tɔ gə́ d’ə̰jee bəḭ-bəḭ wa. See yeḛ to né gə́ dəw kára kara oo gə́ né el ɓəi wa. See gelee ban ɓa d’unee-yeḛ gə ŋgakeaje d’aw d’ɔm dee dɔ ɓee’d gə́ deḛ gər el lé wa.
29Ǝi ɓee ləm, ɓee ləm, ɓee ləm, maji kari oo ta lə Njesigənea̰! 30Njesigənea̰ pa togə́bè pana: Undaje ri dəw neelé gə́ dəw gə́ lal ŋgon ləm, gə́ dəw gə́ teḛkɔr mee ndɔje’g ləa el ləm tɔ. Mbata ŋgokea kára kara gə́ a teḛkɔr mba si kalimbai’g lə Dabid mba ko̰ɓee dɔ Judaje’g lé godo.
Currently Selected:
Jeremi 22: SBA2015
Highlight
Copy
Compare
Share
Want to have your highlights saved across all your devices? Sign up or sign in
Ngambai Bible © Alliance Biblique du Tchad 1989, 2015.
