Jeremi 10
10
Njesigənea̰ ɓa to gə́ njekur dɔ magəje’g
1Seḭ gel-bɔje lə Israɛl, Ooje ta gə́ Njesigənea̰ ula sí! 2Njesigənea̰ pa togə́bè pana:
Maji kar sí ndajije panjaa njépole-magəje el ləm,
Ɓəlje nétɔjije gə́ mee dara’g el ləm tɔ,
Mbata néje neelé njépole-magəje ɓəl dee.
3Mbata néjiɓee lə koso-dəwje lé
To né gə́ kari ba.
Deḛ tuga kag gə́ mee kag-kɔr’g,
Njetɔlee tɔl gə kuba.
4Deḛ d’ɔr giree gə larnda gə larlɔr d’aree kura,
D’un mo̰ ɓər ne ŋgawlar keneŋ
Gə mba karee yə el.
5Dee magəje neelé to d’asəna
Gə jigi-kag gə́ aar ndiu lal pata,
Dəwje d’odo dee
Mbata deḛ d’askəm njaa el.
Maji kar sí ɓəl deeje el
Mbata deḛ d’askəm ra né gə́ majel
Kára kara el ləm,
Deḛ d’askəm ra né gə́ maji
Kára kara el ləm tɔ.
6Ǝi Njesigənea̰! Dəw kára bèe
Gə́ to tana səi pai godo.
I to gə́ boo ləm, riɓar ləi to gə́ boo
Gə goo siŋgamoŋ ləi ləm tɔ.
7I gə́ to mbai dɔ ginkoji dəwje gə raŋg lé
See na̰ ɓa a ɓəli el wa.
I nja ɓa kəm kar dee ɓəli ya,
Mbata mbuna njékəmkàrje’g
Le ginkoji dəwje gə raŋg ləm,
Gə mee ɓeeko̰je’g lə deḛ lai ləm tɔ lé
Njetana səi godo#LkJ 15.4.
8Deḛ lai to gə́ mbəje gə njégərnéelje,
Gosɔnégər lə dee to gə́ né gə́ kari ba:
To gə́ kag!
9Deḛ d’ḭ gə larnda gə́ d’unda gə mo̰
Ɓee gə́ Tarsis ləm,
Gə larlɔr gə́ Upaj ləm tɔ ɓa ree ne.
Njékulaje gə njégər goso kula larje ɓa
Ra kula keneŋ gə ji dee,
Kubu kula rɔ magəje neelé
To kubuje gə́ deḛ ndiri gə́ ndul piro-piro ləm,
Gə kas njir-njir ləm tɔ.
Néje lai neelé to kula gə́ njégərgoseje
Ɓa ra gə ji dee.
10Nɛ Njesigənea̰ to Ala gə́ tɔgərɔ,
Yeḛ to Ala gə́ njesikəmba ləm,
Gə mbai gə́ njesi gə ləbee-ləbee
Gə no̰ ləm tɔ.
Naŋg yə no̰ oŋg’d ləa ləm,
Ginkoji dəwje gə raŋg d’askəm
Kaar gəs no̰ oŋg-boo’g ləa el ləm tɔ.
11Seḭ a kula deeje togə́bè pajena:
Magəje gə́ ra dara əsé naŋg nee el lé
D’a sané pá dɔ naŋg nee ləm,
Gə gin dara’g ləm tɔ.
12Njesigənea̰ unda naŋg
Gə goo siŋgamoŋ ləa ləm,
Yeḛ tum gin naŋg nee
Gə goo kəmkàr ləa ləma,
Yeḛ naji dara gə goo gosonégər ləa ləm tɔ.
13Loo gə́ ndia ɓar ndá
Manje mbo̰ na̰ mee dara’g ləm,
Yeḛ ar kil-lə-ndi ḭ rudu naŋg’d ləm,
Yeḛ ar ndi tel ləm, gə ər ləma,
Yeḛ ar lel ḭ loo-ŋgəm’g ula ləm tɔ.
14Dəw gə́ rara kara
Négər ləa aree tel mbə ləm,
Njelḛ̀ né gə́ rara kara rəa kul
Mbata lə né gə́ yeḛ ndaji ləm tɔ,
Mbata magəje ləa to néŋgɔmje ləm,
Kəmə godo meḛ dee’g ləm tɔ.
15Deḛ to néje gə́ mḭdé ba ləm,
To nésukəmloo ləm tɔ.
Loo gə́ bo̰ néra dee a kɔs ta dee’g ndá
D’a tuji pugudu-pugudu.
16Yeḛ gə́ to ka̰ Jakob lé
To asəna gə magəje el,
Mbata yeḛ nja ɓa gə́ njera néje lai,
Ginkoji Israɛlje to gə́ nédɔji ləa.
Njesigənea̰ gə́ njeboo-néje ɓa gə́ ria.
Tuji-boo si ree
(Tapa Jeremi)
17Seḭ gə́ Jerusalem gə́ síje dan néurti’g,
Odoje néje lə sí gə́ mee ɓee’g.
18Mbata Njesigənea̰ pa togə́bè pana:
Aa ooje, ɓasinè n’a kɔs njéɓeeje neelé
Kɔm dee loo gə́ əw’g ya.
N’a gə kwa dee kègègè
Kar dee teḛ ji neḛ’g el.
(Tapa ɓee gə́ Jerusalem)
19Meeko̰ oso dɔm’g am m’tuji mba̰!
Doo lé tom yaa̰!
Kédé ma m’pana: To rɔko̰ gə́ ram
Ndá m’a kila məəm po̰.
20Kəi-kubu ləm tuji pugudu ləm,
Kulaje ləa lai gaŋg ləm tɔ,
Ŋganəmje gə́ diŋgam d’ubam d’ya̰’m,
Deḛ godo.
Dəw kára gə́ njegɔl kəi-kubu ləm gogo
Gə́ njera kəi-boom ləm lé godo.
(Tapa Jeremi)
21Njékul dəwje lé kəmkàr lə dee godo,
Deḛ ndolè goo Njesigənea̰ el,
Yee gə́ bèe ɓa deḛ teḛ ne kɔr el ləm,
Dəwje lə deḛ lai sané ne na̰ kad-kad ləm tɔ.
22Aa ooje, sorta gə́ dəwje d’oo,
To gə́ baŋga rɔ gə́ ḭ par gə́ dɔgel bèe ɓa si ree
Gə mba kar ɓee-booje gə́ Juda tel to gə́ dɔ nduba ləm,
Gə loo-to tàlje ləm tɔ.
Jeremi ra tamaji mbata koso-dəwje ləa
23Ǝi Njesigənea̰, ma m’gər gao,
Rəw-kaw dəw lé to gə goo siŋgamoŋ ləa el ləm,
Yeḛ askəm kwɔji rəw-kabee gə dɔrea el ləm tɔ.
24Ǝi Njesigənea̰, maji kari wɔjim kəmkàr
Nɛ gə goo rəbee ɓa,
Ɓó gə oŋg el, nà a tujim pugudu.
25Ar oŋg-boo ləi ɔm dɔ njépole-magəje’d
Gə́ gəri el lé ləm,
Gə dɔ koso-dəwje’d
Gə́ ɓar rii el lé ləm tɔ,
Mbata deḛ gaŋg njé’g lə Jakob mbidi-mbidi,
Deḛ gaŋg dee, d’ar dee d’udu ləm,
Deḛ tuji loo-si dee pugudu ləm tɔ.
Currently Selected:
Jeremi 10: SBA2015
Highlight
Copy
Compare
Share
Want to have your highlights saved across all your devices? Sign up or sign in
Ngambai Bible © Alliance Biblique du Tchad 1989, 2015.
