Njéga̰g-Rəwtaje 8
8
Meeko̰ lə Eprayimje
1Dəwje gə́ Eprayim dəji Gedeo̰ pana: Né gə́ i ra sə sí togə́bè lé see gelee to ɗi wa. Mbata ɗi ɓa i a gə kaw rɔ gə Madianje ndá ɓar sí el wa.
Deḛ pata gə́ kədərə kɔl ne səa. 2Gedeo̰ ila dee keneŋ pana: See ɗi ɓa m’ra gə́ né gə́ as gə ka̰ sí-seḭ wa. See kwa ɓuru lə Eprayimje maji yaa̰ unda tḭja nduú lə Abiejerje el wa. 3Oreb gə Jeeb, mbaije gə́ Madian lé Ala lé ya̰ dee ji sí-seḭ’g ya el wa. Ŋga see ɗi ɓa m’askəm ra gə́ né gə́ as gə ka̰ sí-seḭ wa.
Loo gə́ yeḛ pata togə́bè mba̰ ndá oŋg lə dee gə́ d’ḭ ne səa lé wəi bèm .
Gedeo̰je tuba njéba̰je lə dee
4Gedeo̰ teḛ Jurdɛ̰ ndá yeḛ gaŋg mán, yeḛ ləm gə njérɔje gə́ tɔl-munda (300) gə́ d’aw səa na̰’d ləm tɔ, deḛ lé dao yaa̰ ya nɛ deḛ tuba njéba̰je lə dee ya ɓəi. 5Yeḛ ula dəwje gə́ Sukot lé pana: M’ra ndòo rɔ sí’g, amje muru m’ar njérɔje gə́ d’aw səm nee d’o̰, mbata dao yaa̰, ma lé m’aw m’tuba goo Jeba gə Salmuna, mbaije gə́ Madian ya.
6Mbaije gə́ Sukot d’ilá keneŋ pana: See i wa ji Jeba gə Salmuna ŋgəji mba̰ ŋga ɓa ɓar sí mba kar sí j’ar njérɔje ləi muru d’o̰ wa. 7Ndá Gedeo̰ pana: A̰-a̰, bèe-èe! Maji! Loo gə́ Njesigənea̰ a kya̰ Jeba gə Salmuna jim’g ndá m’a njaré dakas rɔ sí gə kunje gə́ dɔdilaloo’g ləm, gə kun ŋgarje ləm tɔ.
8Yeḛ ɔd lée’g neelé aw Penuel ndá yeḛ dəji dəwje gə́ Penuel togə́bè ya tɔ. Deḛ d’ilá keneŋ to gə́ njé gə́ Sukot lé bèe ya tɔ. 9Tɔɓəi yeḛ ula dəwje gə́ Penuel pana: Loo gə́ m’a tel gə majee ndá m’a tɔ kəi gə́ ŋgal gə́ duu dɔ loo mee ɓee’g neelé.
10Jeba gə Salmuna d’isi Karkɔr gə njérɔje lə dee gə́ d’as tɔl-dɔg-loo dɔg-giree-mi (15.000) jén bèe. To ges njérɔje gə́ nai mbuna njé gə́ Bər’g, mbata deḛ tɔl njérɔ gə kiambasje gə́ tɔl-dɔg-loo-tɔl gə dəa rɔ-joo (120.000) lé mba̰. 11Gedeo̰ un rəw-kaw njé gə́ d’isi mee kəi-kubuje’g par gə́ bər lə Noba gə Jogbea ndá yeḛ rɔ gə njérɔje gə́ d’ə̰ji meḛ dee’g pana: N’isije lɔm lé. 12Jeba gə Salmuna təd na̰ d’aḭ. Gedeo̰ tuba dee ndá yeḛ wa Jeba gə Salmuna, mbaije gə́ Madian gə́ joo lé tɔɓəi yeḛ ar njérɔje lə deḛ lai d’ila dɔ na̰’d rima-rima tɔ.
13Gedeo̰, ŋgolə Joas ḭ loo-rɔ’g tel ree gə rəw gə́ dɔdərloo gə́ Herɛs. 14Yeḛ wa basa kára mbuna dəwje gə́ Sukot ndá yeḛ dəjee aree ndaŋg ri mbaije gə ŋgatɔgje gə́ Sukot lai d’as dəwje rɔ-siri-gir-dee-siri aree. 15Tɔɓəi yeḛ ree rɔ dəwje gə́ Sukot ula dee pana: Aa ooje, Jeba gə Salmuna gə́ seḭ tajimje gə mbata lə dee lé ɓa d’aar nee mbata seḭ pajena: See m’wa ji Jeba gə Salmuna ŋgəji mba̰ ŋga ɓa mba kar sí arje njérɔje ləm muru d’o̰ wa lé.
16Bèe ɓa yeḛ wa ne ŋgatɔgje gə́ mee ɓee-boo’g neelé ndá yeḛ ula kəm dəwje gə́ Sukot ndòo gə kunje gə́ dɔdilaloo’g ləm, gə kun ŋgarje ləm tɔ. 17Yeḛ tɔ kəi gə́ ŋgal gə́ duu dɔ loo gə́ to Penuel ndá yeḛ tɔl dəwje gə́ mee ɓee-boo’g neelé tɔ.
18Yee dəji Jeba gə Salmuna pana: See dəwje gə́ seḭ tɔl deeje Tabɔr lé to dəwje gə́ ban wa.
Deḛ d’ilá keneŋ pana: Deḛ to to gə́ i bèe ya, nana kara to asəna gə ŋgolə mbai bèe.
19Yeḛ pana: Deḛ to ŋgakɔmje gə́ to ŋgalə kɔmje ya. Njesigənea̰ si kəmba! ɓó lé seḭ ya̰ deeje kəmba ndá ma kara m’a tɔl sí el tɔ.
20Yeḛ ula Jeter, ŋgondəree pana: Ḭta, tɔl dee.
Nɛ basa lé ɔr kiambas ləa el, yeḛ ɓəl mbata yeḛ nai basa ɓəi. 21Jeba gə Salmuna pana: I ya ḭta tɔl sí. Mbata dəw gə́ togə́bè lé siŋgá to bèe ya tɔ.
Ndá Gedeo̰ ḭ tɔl Jeba gə Salmuna. Yeḛ tɔr néje gə́ gwɔb jambalje’g lə dee tɔ.
Rudu ləb si kəmba lə Gedeo̰
22Dəwje gə́ Israɛl d’ula Gedeo̰ pana: Maji kari o̰ ɓee dɔ sí’g, i gə ŋgoni ləm, gə ŋgon mee ŋgoni ləm tɔ mbata i ɔr sí ji Madianje’g ɔm sí tar ya.
23Gedeo̰ ula dee pana: M’a ko̰ɓee dɔ sí’g el ləm, ŋganəmje kara d’a ko̰ɓee dɔ sí’g el ləm tɔ. Njesigənea̰ nja ɓa a ko̰ɓee dɔ sí’g.
24Gedeo̰ ula dee pana: M’aw gə ta kára mba dəji sí. Maji kar nana kara mbuna sí’g am ŋgama kára-kára gə́ seḭ taaje gə́ nébanrɔ lé.
Njéba̰je lə dee lé d’aw gə ŋgamaje gə́ ra gə larlɔr mbata deḛ to Ismaelje tɔ.
25Deḛ pana: Ŋgamaje neelé j’a kari to gə́ meḛ sí ndigi ya. Tɔɓəi deḛ d’ila kubu gə́ boi naŋg ndá deḛ lai d’ɔm ŋgamaje gə́ d’iŋga gə́ nébanrɔ lé keneŋ. 26Kwɔi lə ŋgamaje gə́ ra gə larlɔr gə́ Gedeo̰ dəji lé to asəna gə nékwɔji kwɔi-lə-né rɔ-joo lal né kɔm gwɔbje’d gə́ ndaji naḭ gə́ teḛ sigi ləm, lal mbaiŋgiraje ləm, lal kubuje gə́ kas gəḭ gə́ to kubu kula mbaije gə́ Madian ləma, lal ma̰a kɔm gwɔb jambalje’g bèe ləm tɔ. 27Néje gə́ ra gə larlɔr neelé Gedeo̰ ra gə́ magə ndá yeḛ unda dan mee ɓee-boo’g ləa gə́ Opra ndá né neelé tel to magəpole lə Israɛlje lai ya, tɔɓəi yee tel to gum mbata Gedeo̰ gə njémeekəije ləa tɔ.
28Madianje d’ula dɔ dee no̰ Israɛlje’g lal kɔr dɔ dee tar ŋga. Bèe ɓa mee ndəa’g lə Gedeo̰ lé ɓee to ne lɔm as ləb rɔ-sɔ.
29Jerubaal, ŋgolə Joas lé tel aw si mee kəi’g ləa tɔ. 30Gedeo̰ oji ŋganje gə́ diŋgam rɔ-siri mbata yeḛ taa denéje bula. 31Gamla-dené ləa gə́ si Sikem lé oji səa ŋgon gə́ diŋgam tɔ ndá yeḛ unda ria lə Abimelek. 32Gedeo̰, ŋgolə Joas lé si gə rɔlel ya ləb ɓuga’g ləa ɓa wəi ne, ndá deḛ dubee dɔɓar’g lə bɔbeeje gə́ Joas mee ɓee gə́ Opra gə́ to ka̰ gel-bɔje lə Abiejer tɔ.
33Loo gə́ Gedeo̰ wəi mba̰ ndá Israɛlje tel ra kaiya pole ne magə-Baalje ndá deḛ d’un magə gə́ ria lə Baal-Berit d’unda gə́ magə lə dee. 34Israɛlje d’ar meḛ dee olé dɔ Njesigənea̰, Ala’g lə dee gə́ ɔr dee ji njéba̰je’g lə deḛ lai gə́ gugu dɔ dee lé el. 35Deḛ d’wa noji gə gel-bɔje lə Jerubaal gə́ to Gedeo̰ lé goo némajije lai gə́ yeḛ ra gə Israɛlje lé el.
Currently Selected:
Njéga̰g-Rəwtaje 8: SBA2015
Highlight
Share
Copy
Want to have your highlights saved across all your devices? Sign up or sign in
Ngambai Bible © Alliance Biblique du Tchad 1989, 2015.