Njéga̰g-Rəwtaje 15
15
Dalba̰ lə Samso̰ gə́ wɔji dɔ Pilistije lé
1Gə kuree waga lam gə́ to naḭ kinja kó lé ndá Samso̰ aw gə ŋgon bya̰ mba koo ne dené ləa. Yeḛ pana: M’a m’ndigi kaw rɔ dené’g ləm mee kəi’g ləa. Nɛ bɔ denéje ləa lé ɔgee loo kandə kəi. 2Yeḛ pana: Ma m’oo to gə́ kédé i ə̰jee bəḭ-bəḭ ndá m’ar basa mari ɓa təa. See njegée’g lé ma̰də yaa̰ undá el wa. Maji kari təa-yeḛ ɓa toree’g.
3Samso̰ ula dee pana: Yee gə́ nee ɓa yḛ̀ lé m’ra gə Pilistije majel kara dəw a kaskəm kila ta dɔm’g gə mbəa el.
4Samso̰ ɔd aw. Ndá yeḛ aw wa tàlje tɔl-munda ləm, yeḛ tɔ ŋgelje ləm tɔ, tɔɓəi yeḛ turu ɓoŋ tàlje unda na̰’d ndá yeḛ tɔ ŋgelje lé mbuna ɓoŋ deeje gə́ joo-joo lé dana bab. 5Yeḛ tɔs pər ta ŋgelje’g lé ndá ɔm tàlje lé tar mee koje’g lə Pilistije ar pər taa dɔmaḭ-koje gə́ d’ɔm dɔ na̰’d-na̰’d ləm, gə koje gə́ d’aar tar lal kinja ləm tɔ saar teḛ ne loo-ndɔje gə́ kag-koiyoje to keneŋ. 6Pilistije pana: See na̰ ɓa ra né togə́bè wa. D’ila dee keneŋ pana: A to Samso̰, məəm dəw gə́ Timnaje ya ɓa, mbata yeḛ neelé un dené ləa ar basa maree ɓa təa.
Bèe ɓa Pilistije d’ḭ d’aw roo dené lé gə bɔbeeje na̰’d. 7Samso̰ ula dee pana: Yee gə́ bèe ɓa gə́ né gə́ seḭ raje səm wa. Bèe ndá ma lé m’a kəw rɔm el saar loo gə́ m’a ra sə sí-seḭ nja né dal ne ba̰ ləm ɓa.
8Yeḛ kunda dee mbugu-mbugu ləm, tɔl dee bula ləm tɔ ndá ɔd aw si bolè mbal gə́ Etam.
Samso̰ tɔl Pilistije tɔl-dɔg (1.000)
9Togə́bè ɓa Pilistije d’ḭ d’ɔr rɔ d’aw d’wa loo-si dee mee ɓee’g Juda ɓa d’aar keneŋ saar teḛ Léi. 10Dəwje gə́ Juda dəji dee pana: See ban ɓa seḭ ɔrje rɔ reeje mba rɔ sə sí wa.
Deḛ d’ila dee keneŋ pana: Jeḛ n’reeje mba tɔ Samso̰ gə mba ra səa to gə́ yeḛ ra ne sə sí kédé bèe lé tɔ.
11Yen ŋga dəwje gə́ Juda tɔl-dɔg-loo-munda (3.000) ree bolè mbal gə́ Etam ree dəji Samso̰ pana: See i gər to gə́ Pilistije ɓa gə́ njéko̰ síje el wa. See ɗi ɓa i ra sə sí togə́bè wa.
Yeḛ ila dee keneŋ pana: Ma m’ra sə dee to gə́ deḛ ra ne səm-ma bèe ya tɔ.
12Deḛ d’ulá pana: Jeḛ n’reeje gə mba tɔi kilai ji Pilistije’g.
Samso̰ tel ula dee pana: Ubuje rɔ sí amje to gə́ seḭ a tɔlmje el ɓa.
13Deḛ tel d’ilá keneŋ pana: Wah, jeḛ ndigi tɔije ba ya mba kilaije ji dee’g ɓó j’a rai kari wəi el.
Togə́bè deḛ teá gə kulaje gə́ sigi joo ləm, deḛ d’ḭ səa mee bolè mbal’g teḛ səa raga ləm tɔ. 14Loo gə́ yeḛ teḛ Léi mba̰ ndá Pilistije d’unda bula u-u-u tila ne kəmee. Bèe ɓa Ndil Njesigənea̰ dəb dəa’g ar kulaje gə́ tɔ ne jia lé tel to asəna gə kúla palégal gə́ pər o̰ bèe. 15Yeḛ oo siŋga ka ta mulayḛ̀je gə́ to sigi ɓəi naŋg ndá yeḛ ula jia un tɔl ne dəwje tɔl-dɔg (1.000). 16Bèe ɓa Samso̰ pana:
Ka ta mulayḛ̀je gə́ kára ba ya,
Yoo dee to ne naŋg rib-rib ur ne kugu loo-joo,
Ka ta mulayḛ̀je gə́ kára ba lé ya,
M’tɔl ne dəwje tɔl-dɔg (1.000).
17Loo gə́ yeḛ pata nee ila naŋg ɗəgərə ndá yeḛ ila siŋga ka ta mulayḛ̀je gə́ jia’g lé naŋg. Bèe ɓa deḛ d’unda ne ri loo neelé lə Ramat-Léi. 18Kṵdaman ɔree loi aree ɓar Njesigənea̰ pana: I ɓa am boo-kṵ-baŋga neelé ŋga see ɓasinè m’a kwəi yoo-kunda-mán gə mba koso ne ji njé gə́ lal kinja tamɔd dee’g lé wa.
19Ala ta̰ mbal gə́ Léi lé ar mán teḛ keneŋ. Samso̰ ai ndá ndilee ree rəa’g ar kəmee tuga sib. Gelee gə́ nee ɓa d’unda ne ri kəm-rəw-mán neelé lə En-Akɔr, kəm-rəw-mán neelé to Léi saar teḛ ne mee ndəa gən ɓəi.
20Samso̰ to njegaŋ-rəwta Israɛlje gə́ mee ndəa’g lə Pilistije as ləbee rɔ-joo.
Currently Selected:
Njéga̰g-Rəwtaje 15: SBA2015
Highlight
Share
Copy
Want to have your highlights saved across all your devices? Sign up or sign in
Ngambai Bible © Alliance Biblique du Tchad 1989, 2015.