Esai 59
59
Néra majel lə koso-dəwje
1Wah! ji Njesigənea̰ na tas
Gə mba kaji sí el ləm,
Mbia kara wa soo
Dɔ koo ta’g lə sí el ləm tɔ.
2Nɛ to néra majel lə sí ɓa
Tḭ sí gə Ala lə sí ləm,
To kaiyaje lə sí ɓa
Ɔg sí loo koo kəmee ləma,
Gə ɔgee koo ta lə sí ləm tɔ.
3Mbata məs wa ji sí mbəgə-mbəgə ləm,
Ŋgan ji sí ra néje gə́ majel ləm tɔ,
Taŋgɔm rusu ta sí tub-tub ləm,
Ndo̰ sí teḛ gə ta néra gə́ kori-kori ləm tɔ.
4Dəw kára kara səg maree
Gə goo rəbee bèe el ləm,
Dəw kára kara ɔr kəm ta
Gə goo néra gə́ danasur el ləm tɔ.
Deḛ d’ɔm meḛ dee dɔ né gə́ gə mḭdé ba’g
Pa ne taŋgɔmje ləm,
Deḛ d’əskèm né gə́ majel ləm
Néra gə́ majel ɓa d’ojee ləm tɔ.
5Deḛ d’um kaw li-ŋgɔrŋgo̰d ləm,
Deḛ d’ṵji jám gamagar ləm tɔ.
Yeḛ gə́ sɔ kaw dee ndá wəi,
Ɓó lé dəw unda kára aree tɔ ndá
Li-meewai ɓa teḛ keneŋ.
6Jámje lə dee lé
D’askəm kṵji gə́ kubu el ləm,
Nékula lə dee lé
D’askəm kɔn ne rɔ dee el ləm tɔ,
Kulaje lə dee to kulaje gə́ gə dɔ najee el ləm,
Néra gə́ kərm-kərm lə dee to meḛ ji dee’g ləm tɔ.
7Gɔl dee un dee pélè-pélè
Gə́ dɔ néra gə́ majel’g ləm,
D’ɔs rɔ dee ɓad
Gə mba kila məs dəw gə́ ta wa dəa el lé ləm tɔ,
Takə̰jije lə dee to takə̰ji néra gə́ kori-kori ləm,
Tuji gə tuji-boo to rəw-kaw dee’g ləm tɔ#Rɔm 3.15-17.
8Rəw meelɔm lé
Kəm dee tɔ dɔ’g sum-sum,
Néra gə́ gə dɔ najee kara
Godo rəw-kaw dee’g tɔ,
Deḛ d’un rəwje gə́ nduni koŋ-koŋ,
Nana ɓa gə́ taa rəw-kaw dee njaa keneŋ ndá
Iŋga meekulɔm nda̰ el.
Kəm koso-dəwje lə Ala inja dɔ néra majelje’g lə dee
9Gelee gə́ nee ɓa ndukun gə́ ka̰ kɔr ta dɔ sí’g lé
Nai ne əw sə sí ləm,
Kaji kara tibi mbɔr sí el ləm tɔ,
Jeḛ ŋginaje lookàr gə́ ndogó jol-jol
Nɛ loo gə́ ndul njudu-njudu ɓa jeḛ njaaje keneŋ.
10Jeḛ mamje loo to gə́ njékəmtɔje
Gə́ mam loo kaar ndògo’g bèe ləm,
Jeḛ mamje loo to gə́ dəwje gə́ kəm dee godo bèe ləm tɔ,
Loo gə́ kàr aar daŋdɔ lé
Jeḛ n’tosoje godə loo’g asəna gə dəw gə́ aw loondul’g bèe ləm,
Dan nékiŋgaje gə́ bèdèg lé
Jeḛ n’toje j’asəna gə yoo-dəwje keneŋ ləm tɔ.
11Jeḛ lai j’injaje miḭ to gə́ da-urs bèe ləm,
Jeḛ n’tuma̰je ŋgururu-ŋgururu to gə́ dərndaje bèe ləm,
Jeḛ ŋginaje kɔr dɔ sí kúla’g nɛ lé godo ləma,
Jeḛ ŋginaje kaji nɛ nai sə sí əw ləm tɔ.
12Mbata nékaltaje lə sí bula yaa̰ nɔḭ’g ləm,
Kaiyaje lə sí d’ila ta dɔ sí’g ləm tɔ.
Nékaltaje lə sí to rɔ sí’g ləm,
Jeḛ n’gərje néra majelje lə sí gao ya ləm tɔ.
13Ta wa dɔ sí ar sí n’toje njékaltaje no̰ Njesigənea̰’g ləm,
Jeḛ j’ubaje Ala lə sí j’ya̰ ləm tɔ,
Ta néra gə́ kərm-kərm gə ta kɔs ta rəw ɓa gə́ tapa sí ləm,
Jeḛ n’taaje kèm taŋgɔmje n’la̰jije toree meḛ sí’g ləm tɔ,
14Bèe ɓa néra gə́ gə dɔ najee rəm gə́ gée-gée ləm,
Kaji kara nai ne sə sí əw ləm tɔ,
Mbata d’orè dɔ kankəmta naŋg ndaa-loo’g ləm,
Néra gə́ danasur iŋga loo tibi mbɔr sí el ləm tɔ.
15Kankəmta sané pá ləm,
Dəw gə́ unda rəa ɓad dɔ néra gə́ majel’g ndá
Deḛ taa néje ləa lai gə́ taa ləm tɔ.
Njesigənea̰ aa loo gə kəm dɔbee
Oo to gə́ néra gə́ danasur godo.
16Yeḛ oo to gə́ dəw kára kara taa ne
Dɔ deḛ gə́ d’ula kəm dee ndòo el ləm,
Kaaree wá paḭ mbata dəw kára kara
Gə́ njekɔr kəm ta lə dee godo ləm tɔ,
Yen ŋga ji siŋgamoŋ lə Njesigənea̰ ɓa ree la sə dee ləm,
Meekarabasur ləa-yeḛ gəd dee ləm tɔ#Esa 63.5.
17Yeḛ dolè rəa gə meekarabasur
To gə́ kubu-rɔ gə́ ula kaaree’g bèe ləm,
Yeḛ ula dɔgugu-kaji dəa’g ləm tɔ,
Yeḛ un dalba̰ ula rəa’g
To gə́ kubu bèe ləm,
Kaḭ bada ləa gə́ dɔ dee’g
To asəna gə kubu gə́ boi yul bèe ləm tɔ#Epe 6.14,17, 1Tes 5.8.
18Yeḛ a kuga dɔ ji nana kara
Gə goo kula rəa-rəa ləm,
Yeḛ a kuga njékoma̰ səaje lé
Gə oŋg-boo ləm,
Gə njéba̰je ləa togə́bè ləm tɔ.
Deḛ gə́ d’isi dɔgoré-looje’g kara
A ra sə dee bèe tɔ.
19Un kudee dɔ-gó lé
D’a ɓəl ri Njesigənea̰ keneŋ ləm,
Un kudee loo gə́ kàr uba’g lé
D’a ɓəl rɔnduba ləa keneŋ ləm tɔ.
Loo gə́ njeba̰ lé a ree to gə́ mán baa bèe
Ndá Ndil Njesigənea̰ a rəa karee aḭ.
20Njetaa dɔ dee a ree mbata njé gə́ Sio̰ gə njé’g lə Jakob
D’a kuba goo kaiyaje lə dee kya̰,
Njesigənea̰ ɓa pa bèe#Rɔm 11.26.
21Njesigənea̰ pana: Aa ooje, manrɔ gə́ ma man ne rɔm m’ar dee ɓa nee: Ndiləm gə́ ɔm dɔ sí’g lé ləm, gə taje ləm gə́ m’ɔm ta sí’g ləm tɔ lé d’a lal ta sí el ləm, d’a lal ta ŋgan síje el ləma, d’a lal ta ŋgan meḛ ŋgan síje el ləm tɔ, un kudee ɓasinè saar gə no̰. Njesigənea̰ ɓa pa bèe.
Currently Selected:
Esai 59: SBA2015
Highlight
Copy
Compare
Share
Want to have your highlights saved across all your devices? Sign up or sign in
Ngambai Bible © Alliance Biblique du Tchad 1989, 2015.
