Esai 52
52
Ala a gə kɔr kúla dɔ njé gə́ Jerusalem’g
1Teḛje kəm sí, seḭ gə́ síje Sio̰!
Teḛje kəm sí, undaje siŋga sí dɔ maree’g,
Ulaje kubu-naḭ rɔ sí’g,
Seḭ gə́ Jerusalem, ɓee-boo gə́ to gə kəmee!
Mbata deḛ gə́ lal kinja tamɔd dee gə njé gə́ mina̰ lé
D’a kandə mee ɓee’g lə sí el ŋga#LkJ 21.2,27.
2Ḭje tar kundaje kor rɔ sí’g!
Ḭje tar síje dɔ loo-si sí’g,
Seḭ gə́ Jerusalem!
Tuduje kúla gə́ to gwɔs sí’g,
Seḭ ŋgalə Sio̰ gə́ toje ɓərje lé!
3Njesigənea̰ pa togə́bè pana: Seḭ lé deḛ d’wa sí ɓər kari ba lal lar sí ndá larnda ɓa d’a kuga ne dɔ sí el tɔ. 4Mbata Mbaidɔmbaije gə́ Njesigənea̰ pana: Kédé gə́ ləw lé koso-dəwje ləm d’aw Ejiptə mba kisi keneŋ. Tɔɓəi Asirije d’ula kəm dee ndòo lal né gə́ bèe. 5Ndá Njesigənea̰ pana: Ɓasinè, see m’a ra ban ɓa loo gə́ deḛ d’ɔr koso-dəwje ləm kari ba lal lar lé wa. Njesigənea̰ pana: Njékorè dɔ dəwje naŋg lé ra né wəl-wəl ləm, teḛ gə ndɔ saar kàr ur naŋg jigi lé d’ula sul dɔ rim’g ləm tɔ#Rɔm 2.24. 6Gelee gə́ nee ɓa koso-dəwje ləm d’a gər ne rim. Gelee gə́ nee ɓa mee ndəa’g neelé d’a gər gao to gə́ to ma nja ɓa m’pata: aa ooje yén m’aar nee.
7Dəw gə́ ḭ dɔ sém mbal’g ree ula sí tagə́maji ləm,
Gə́ ila mber ta gə́ wɔji dɔ meekulɔm ləm,
Yeḛ gə́ ula sí tagə́maji ləm,
Gə́ ila mber ta gə́ wɔji dɔ kaji ləma,
Yeḛ gə́ ula njé gə́ Sio̰ pana:
Ala lə sí lé o̰ ɓee ləm tɔ lé
Gɔlee to njam-njam#Nah 2.1, Rɔm 10.15, Epe 6.15.
8Ndu njéŋgəmlooje lə sí ɓar wəl,
Deḛ d’ɔr ndu dee gə́ tar ləm,
Deḛ d’ɔr ndu dee gə́ tar na̰’d wəl
Gə ndu pa kalrɔ ləm tɔ,
Mbata kəm dee-deḛ ya d’oo ne
To gə́ Njesigənea̰ tel gə njé gə́ Sio̰ mba̰.
9Seḭ dɔ ndubaje gə́ Jerusalem gə́ tujije lé
Ndubaje rɔ sí na̰’d gə pa rɔlel!
Mbata Njesigənea̰ gɔl meḛ koso-dəwje ləa ləm,
Yeḛ taa dɔ njé gə́ Jerusalem ləm tɔ.
10Njesigənea̰ ula ji meenda ləa ndiŋ
Kəm ginkoji dəwje gə raŋg’g lai ar dee d’oo,
Dəw-kundaje lai gə́ d’ɔr rudu naŋg nee rɔd lé
D’a koo kaji gə́ Ala lə sí gə kəm dee nda̰-nda̰ ya.
11Ḭje lée’g neelé undaje loo teḛje, gə́ teḛje ya!
Tibije mbɔr né gə́ mina̰ kára kara el!
Saaje rɔ sí rɔ dee’g.
Ɔrje won kaiya rɔ sí’g,
Seḭ gə́ odoje nékulaje lə Njesigənea̰ lé#2Kɔr 6.17!
12Maji kar sí undaje loo teḛje gə kaar gəd el ləm,
Gə teḛje gə ŋgwɔd el ləm tɔ,
Mbata Njesigənea̰ a kaw no̰ sí’g ləm,
Yeḛ gə́ to Ala lə Israɛlje a korè goo sí ndəŋ ləm tɔ.
Kula rɔnduba lə kura lə Njesigənea̰
13Aa ooje, kura ləm a teḛkɔr,
Yeḛ a si tar ɗaŋg ləm,
A kiŋga riɓar ləma,
A kur dɔ loo’g ləm tɔ.
14To gə́ kédé yeḛ to né gə́ ar dəwje bula ɓəl ne
Mbata kəmee to ndòo yaa̰ ləm,
Rɔndɔḭ ləa to asəna gə ka̰ dəw el ləm tɔ lé
15Togə́bè ɓa yeḛ a to nérɔlel lə koso-dəwje bula tɔ.
Mbaije d’a ndem ta dee nea̰’g,
Mbata d’a koo né gə́ d’ɔr soree d’ar dee kédé el ləm,
D’a koo ta gə́ oso mbi dee’g kédé el ləm tɔ#Rɔm 15.21.
Ngambai Bible © Alliance Biblique du Tchad 1989, 2015.