Esai 3
3
Rəwta gə́ gaŋg dɔ njé gə́ Juda’g gə dɔ njé gə́ Jerusalem’g
1Mbaidɔmbaije gə́ Njesigənea̰ gə́ njeboo-néje
A gə kɔr négəd-rɔ gə́ rara ləm,
Gə loo-nékiŋga gə́ rara ləm,
Gə loo-kiŋga-nésɔ gə́ rara kara ləma,
Gə loo-kiŋga-mán gə́ rara kara ləm tɔ
Mee ɓee gə́ Jerusalem gə mee ɓeeko̰ gə́ Juda,
2Yeḛ a kɔr bao-rɔ gə njerɔ gə́ keneŋ ləm,
Gə njegaŋ-rəwta gə njetegginta
Gə njenékoo gə ŋgatɔg ləm,
3Mbai dɔ dəwje gə́ rɔ-mi gə njeriɓar ləma,
Njekwɔji ta kəmkàr gə njegoso tɔl néje
Gə njegoso sukəmloo ləm tɔ.
4Njesigənea̰ pana:
N’a kar basaje ɓa to mbaije lə dee ləm,
Ŋganje gə́ kas ɓa d’a to njéko̰ dɔ deeje ləm tɔ.
5Dəwje d’a kula kəm na̰ ndòo mbuna na̰’d
Yeḛ gə́ kára a kula kəm maree ndòo,
Nana kara a kula kəm maree ndòo ya,
Basa a kɔs dɔ ɓuga gə tar ləm,
Dəw gə́ kari ba a koma̰ gə njeriɓar ləm tɔ.
6Dəw a kaw kwa ŋgokea̰ mee kəi’g lə bɔbeeje ya a kulá pana:
Kubu ləi-i to kára keneŋ ndá
Maji kari to mbai lə sí!
Néje gə́ tuji neelé
Maji kari taa jii’g!
7Mee ndəa’g neelé ya yeḛ a kilá keneŋ pana:
Ma m’as ra né kára mbata lə sí el,
Mee kəi’g ləm lé muru əsé kubu godo keneŋ,
Maji kundam gə́ mbai dɔ koso-dəwje’g neelé el.
8Njé gə́ Jerusalem ləŋg ləm,
Njé gə́ Juda kara d’unda naŋg rəb ləm tɔ
Mbata tapa dee gə néra dee ɔs ta lə Njesigənea̰ rəw ləm
Deḛ d’ɔs boo-ronduba ləa rəw ləm tɔ.
9Kəm dee-deḛ ya ɔr ta ila dɔ dee’g ləm,
Néra majelje lə dee lé d’ila mberee wəl-wəl
To gə́ ka̰ njé gə́ Sɔdɔm
Ɓó d’iya dəa el ləm tɔ.
Meeko̰ a koso dɔ dee’g
Mbata deḛ d’wa dɔ gɔl néje gə́ majel
Gə́ a gə tel koso dɔ dee-deḛ’g ya.
10Maji kar sí ulaje pajena:
Njéra nédanaje lé d’a si dan maji’g
Mbata d’a kal rɔ dee dɔ kandə néraje’g lə dee.
11Nɛ meeko̰ a koso dɔ njémeeyèrje’g.
D’a si dan majel’g
Mbata d’a kiŋga né gə goo kandə néraje
Gə́ ji dee ra lé tɔ.
12Ŋganje ɓa to njékula kəm koso-dəwje ləm ndòo ləm,
Denéje ɓa to dəw dɔ deeje ləm tɔ,
Seḭ koso-dəwje ləm, deḛ gə́ d’ɔr no̰ sí lé
D’ar sí ndəmje ne ləm,
Deḛ tuji rəw gə́ seḭ njaaje keneŋ ləm tɔ.
Njesigənea̰ gaŋgta dɔ njékɔrno̰ mar deeje
13Njesigənea̰ ree gə mba kɔr kəm ta lé ləm,
Yeḛ aar tar mba gaŋg rəwta dɔ koso-dəwje’g ləm tɔ.
14Njesigənea̰ ɔr ta ila dɔ ŋgatɔgje’g lə koso-dəwje ləa ləm,
Gə dɔ mbaije’g lə dee ləm tɔ pana:
Seḭ lé seḭ rumje loo-ndɔ-nduú!
Néje gə́ seḭ tɔrje rɔ njéndooje’g lé
To mee kəi’g lə sí to!
15See na̰ ɓa un ndia ar sí talje ne dəwje ləm naŋg ras-ras ləm,
Gə oreeje ne dɔ njéndooje naŋg ləm tɔ bèe wa.
Mbaidɔmbaije gə́ Njesigənea̰ gə́ njeboo-néje ɓa dəji ta togə́bè.
Denéje gə́ njékərkəmlooje gə́ Jerusalem
16Njesigənea̰ pana:
Denéje gə́ Jerusalem lé to njékərkəmlooje,
Deḛ njaa təd ne gwɔb dee ləm,
D’ar kəm dee ɔs loo pal-pal ləm,
Deḛ njaa lam-lam bèe ləma,
D’ar niŋgaje gə́ gɔl dee’g ɓar ləm tɔ.
17Gelee gə́ nee ɓa
Mbaidɔmbaije a kar yiŋga dɔ denéje gə́ Jerusalem
Rəd pənḭ-pənḭ ləm,
Njesigənea̰ a kar kudu dee
To dum ləm tɔ.
18Mee ndəa gən lé Mbaidɔmbaije a tɔr néma̰dje lə dee
Gə́ to niŋgaje gə́ gɔl dee’g ləm,
Gə nékwa yiŋga dɔ deeje ləm,
Gə néje gə́ d’ɔm rɔ dee’d gə́ ndaji ne naḭ gə́ teḛ sigi ləm,
19Gə mbaiŋgiraje, gə niŋgaje gə́ ji dee’g,
Gə kubuje gə́ ka̰ konkəm dee ləm,
20Gə mbɔrje, gə mər-larje ləm, gə ndar kwa ɓər ləm,
Gə laya̰ ləm, gə gajije ləm,
21Gə ŋgamaje ləm, gə mbaiŋgiraje gə́ əm’g ləm,
22Gə kubuje gə́ ka̰ ra naḭ ləm,
Gə kubuje gə́ tad ləm, gə kubuje gə́ boi yul-yul ləm, gə ɓɔlje ləm,
23Gə nékoo-kəmje ləm, gə kubu-kaar gə́ ra gə kúla palégal ləm,
Gə jɔg-kula-dɔ’g ləma, gə kubu gə́ ka̰ kila dɔ maree’g ləm tɔ.
24Né gə́ ə̰də mbo̰ a taa tor né gə́ ə̰də sululu ləm,
Kula a taa tor ndar ləm,
Dɔ gə́ àr ŋgori-ŋgori
A taa tor yiŋga dɔ ləm,
Kubu-kwa-ndòo
A taa tor kubu-ra-naḭ ləma,
Tor doo a taa tor maji lə darɔ ləm tɔ.
Njékəisiŋgaje gə́ Jerusalem
25I Jerusalem lé dəwje ləi gə́ diŋgam
D’a kwəi yoo-kiambas ləm,
Bao-rɔje ləi kara
D’a kwəi loo-rɔ’g ləm tɔ.
26Denéje d’a no̰ kwa ne ndòo yoo tarəwkɔgje gə́ Sio̰,
Némajije d’a godo rɔ dee’g ndá d’a si naŋg kari ba.
Currently Selected:
Esai 3: SBA2015
Highlight
Share
Copy
Want to have your highlights saved across all your devices? Sign up or sign in
Ngambai Bible © Alliance Biblique du Tchad 1989, 2015.