Ǝbrəje 6
6
Jeju lé to gə́ njekinjanéməs gə́ gəd
1Gelee gə́ nee ɓa ar sí j’ya̰ néndoo gə́ dɔtar gə́ wɔji dɔ ta lə Kristi ɓa j’aw ne gə́ kédé-kédé dɔ néndoo gə́ ɔr ne dɔ njoroŋ ɓəi ɓó ar sí n’tum gin ta néje neelé gogo el: yee ɓa to ta gə́ wɔji dɔ kya̰ goo néra sí gə́ ləw gə́ unda naŋg ndəs ləm, 2gə dɔ meekun gə́ jeḛ j’un j’ar Ala ləm, gə dɔ néndoo gə́ wɔji dɔ ta baptɛməje ɓəd-ɓəd ləm, gə dɔ kila ji dɔ dəwje’g ləm, gə dɔ teḛ dɔkumbwa’g lə dəwje ləma, gə dɔ rəwta gə́ gaŋg dɔ dəwje’g gə no̰ ləm tɔ. 3Ɓó lé Ala ya̰ rəw ar sí ndá yee ɓa j’a ra bèe ya.
4Deḛ gə́ kəm dee inja ləm, deḛ naa nénoji gə́ ḭ dara ləm, deḛ d’ɔm na̰’d gə Ndilmeenda ləm, 5deḛ naa ta lə Ala d’oo majee ləma, ləb gə́ si ree lé deḛ naa siŋgamoŋgee ləm tɔ lé 6ɓó lé deḛ neelé mbad d’unda piriŋ d’ila ndá d’a koo loo mba tel kwa ndòo rɔ dee dɔ kaiya’g lə dee el mbata deḛ nja deḛ ɗar Ŋgon-Ala kaar kag’d d’ula ne sul dəa’g tɔ.
7Loo gə́ ndi ər ta-ta ar manee tən naŋg ləm, ar lée neelé kinja gə koje mba kaji dee gə ndɔ-ndɔ keneŋ ləm tɔ ndá dɔ naŋg neelé taa kəm Ala aree tɔr ne ndia dɔ’g tɔ. 8Nɛ ɓó lé naŋg a kinja gə kun əsé kiro ndá yeḛ a rəm gə ndia dəa’g mba manee ne ləm, a to gə́ né gə́ ka̰ roo ləm tɔ#Gn 3.17-18.
9Seḭ gə́ j’unda sí dan kəm sí’g lé ɓó lé jeḛ m’pa togə́bè kara meḛ sí to dɔ sí-seḭ’g ɓəi, jeḛ n’gər gao, néje gə́ maji unda gə́ d’a kɔm sí rəw-kaji’g ɓa wɔji dɔ sí. 10Mbata Ala lé to njera né gə́ lal najee el, mée a kwəi dɔ kula ra sí gə́ seḭ raje areeje lé el ləm, gə dɔ ɓar gə́ seḭ arje ria ɓar ne wəl-wəl el ləma, gə dɔ nojimeenda gə́ seḭ waje gə deḛ gə́ to gə kəmee bur-bur kédé lé saar ɓasinè el ləm tɔ. 11Jeḛ ndigi kar sí-seḭ kára-kára lai lé ulaje rɔ sí ndubu togə́bè saar mba kar ndəa gə́ rudu lé a kiŋgaje ne né gə́ seḭ undaje meḛ sí yel dɔ’g. 12Bèe ɓa seḭ a kya̰je gée yɔgɔ el ləm, seḭ a ndajije kəm deḛ gə́ mbɔl dɔ meekun gə meekai sam-sam ɓa taa ne né gə́ ndukun ɓa wɔji gə mba kar dee lé ləm tɔ.
Ndukun lə Ala lé to njaŋg ya
13Loo gə́ Ala un ndia ar Abrakam ndá yeḛ man rəa gə ria-yeḛ nja mbata dəw gə́ njekur dəa’g godo 14pana: Tɔgərɔ ya, n’a tɔr ndu neḛ dɔi’g ləm, n’a kar ŋgakaije d’ɔs goo na̰ gə́ kédé-kédé ləm tɔ#Gn 22.16-17. 15Bèe ɓa Abrakam ai ne mée sam-sam ɓa iŋga ne né gə́ wɔji dəa ɓəi. 16Mbata dəwje manrɔ dee gə ri njekur dɔ dee’g ndá manrɔ lé to né gə́ tɔl ne tamaḭ lə dee bém. 17Gelee gə́ nee ɓa loo gə́ Ala ndigi kar deḛ gə́ d’a gə kiŋga né gə́ wɔji dɔ dee lé d’oo gao to gə́ yeḛ wɔji njaŋg ɓó a tel gə ndia el ndá yeḛ man ne rəa 18mba kar mbɔl dɔ ndu gə́ gel joo gə́ to njaŋg gə́ Ala a koo loo mba pəl ta dɔ’g el lé ɓa jeḛ nja j’iŋga ta gə́ ula diŋgam meḛ sí’g jugugu-jugugu ləm, jeḛ n’taa ta neelé sagm j’unda ne meḛ sí yel dɔ’g ləm tɔ ndá j’uru ne njo̰loo’g pḛ́ tɔ. 19Ta neelé gə́ j’unda meḛ sí yel gə́ dɔ’g lé to asəna gə riŋgi-to gə́ kədərə kaw-kaw gə́ jeḛ n’reḛ́ keneŋ rḛ́-rḛ́, yee ɓa jeḛ woḭ ne mbuna kubu gə́ a teḛ sə sí njal mee kəi gə́ to gə kəmee’g#Ləb 16.2 20loo gə́ Jeju lé aw gə́ ŋgaw ta sí keneŋ mbata yeḛ nja d’aree to gə́ ŋgɔ-njekinjanéməs saar-saar gə́ no̰, gə goo ka̰ Melkisedek ya#Pak 110.4.
Currently Selected:
Ǝbrəje 6: SBA2015
Highlight
Copy
Compare
Share
Want to have your highlights saved across all your devices? Sign up or sign in
Ngambai Bible © Alliance Biblique du Tchad 1989, 2015.
