Ǝbrəje 2

Ar sí j’undaje kəmkàr dɔ rɔ sí’g

1Gelee gə́ nee ɓa ta néje gə́ jeḛ j’oo lé maji kar sí n’reḛ́ keneŋ rḛ́-rḛ́ nà j’a ndəm kigi loo gə́ əw’g. 2Mbata ɓó lé ta gə́ kuraje gə́ dara pa taree lé ra née ləm, ɓó lé nana ɓa gə́ ɔs ta nee rəw əsé al ta təa’g ɓa d’ar bo̰ nérea ɔs təa’g ləm tɔ 3ndá ɓó lé jeḛ ndoo bao dɔ boo-kaji gə́ Mbaidɔmbaije ila mberee kédé ləm, deḛ gə́ d’oo ta ləa təa’g d’ɔr ginee d’ar sí j’oo ləm tɔ ndá see j’a kiya rɔ sí ra ɓa mba kar ta wa dɔ sí el wa. 4Ala kara ɔr goo ta lə dee aree to ne njaŋg gə nédumkooje gə némɔrije ɓəd-ɓəd ləm, gə nénojije gə́ Ndilmeenda kai dee to gə́ mée ndigi ləm tɔ.

5Tɔgərɔ ya ɓeeko̰ gə́ a gə ree gə́ jeḛ m’pa taree j’ar sí lé Ala ar kuraje gə́ dara to gə́ dəw dəaje el. 6To gə́ deḛ ndaŋg mee maktub’g d’ɔr ginta nee pana:

See dəw to gə́ ɗi ɓa i ar məəi olé dəa’g bèe wa.

See ŋgon dəw lé to gə́ ɗi ɓa i tɔs kəmi bao-bao dəa’g bèe wa#Pak 8.5-7.

7I undá aree nai lam bèe ndá a kas gə kuraje gə́ dara ləm,

I ula dɔgugu rɔnduba dəa’g ila ne riɓar ne dəa’g ləm tɔ.

8I ɔm néje lai-lai gin gɔlee’g ya.

Tɔgərɔ ya, to gə́ Ala aree o̰ ɓee dɔ néje’g lai ndá yeḛ ya̰ né kára kara gə́ lal kɔm gin gɔlee’g el nɛ ɓasinè lé jeḛ j’oo néje lai gin gɔlee’g el ɓəi. 9Nɛ jeḛ j’oo Jeju, yeḛ gə́ Ala undá aree nai lam bèe a kas kuraje gə́ dara. Jeju lé ya̰ rəa ar yoo mba kar mbɔl dɔ noji lə Ala lé ɓa yeḛ wəi ne ila ne ɗigi kaar yoo’g mbata lə dəwje lai. Nɛ ɓasinè d’ula dɔgugu rɔnduba dəa’g ləm, d’ila ne riɓar dəa’g ləm tɔ. 10Tɔgərɔ ya, Ala gə́ unda néje lai ləm, nékundaje lai to kea̰-yeḛ ləm tɔ lé yeḛ nja ra gə goo rəbee loo gə́ yeḛ ar njegin bəgərə kaji lə ŋganee bula uru dan néurti’g, mba karee to ne dəw gə́ maji dum ləm, mba karee ɔr no̰ dee ula ne rɔnduba dɔ dee’g ləm tɔ.

11Mbata yeḛ gə́ ɔr dee unda dee gə kəmee ləm, gə deḛ gə́ yeḛ ɔr dee gə kəmee ləm tɔ lé to kojikəi kára ba. Gelee gə́ nee ɓa yeḛ ɓar dee ne ŋgabɔbeeje ndá rəa kul ne dɔ dee’g el. 12Yeḛ pana:

M’a teḛ gə rii mbuna ŋgakɔmje’g ləm,

M’a pidii loo-kwa-dɔ-na̰’g lə koso-dəwje ləm tɔ#Pak 22.23.

13Tɔɓəi yeḛ pa pana:

M’a kɔm məəm dəa’g. Yeḛ pa tɔɓəi pana:

Aa oo, ma gə ŋganəmje gə́ Ala ɓa am dee#Esa 8.17,18.

14Bèe ndá to gə́ ŋganje gə́ d’oji dee to məs gə dakasrɔ gə́ ḭ rɔ njékoji deeje’g ndá yeḛ kara un rəa-yeḛ togə́bè tɔ mba kar kwəi gə́ yeḛ wəi ne ɓa yeḛ a tuji ne njekurai gə́ to njesiŋgamoŋ lə yoo ləm, 15mba kar deḛ gə́ ɓəl d’oo ndòo gin yoo’g lé yeḛ a kar dee taa rɔ dee jia’g. 16Mbata né gə́ yeḛ ra lé wɔji dɔ ŋgaka Abrakam ɓó wɔji dɔ kuraje gə́ dara el. 17Togə́bè ɓa, rəa gə́ yeḛ tel tana gə ŋgabɔbeeje, tana sə dee pai-pai lé gə́ kuma̰ mba karee to ne ŋgɔ-njekinjanéməs gə́ njemeekɔrjol ləm, gə njemeenda londoŋ mba ra kula no̰ Ala’g ləm tɔ mba kuga ne kaiya lə dəwje lé. 18Mbata yeḛ gə́ dum dɔ nékər gə́ əree dan néurti’g lé yeḛ nja ɓa askəm la gə deḛ gə́ nai dan nékər’g ɓəi.

Currently Selected:

Ǝbrəje 2: SBA2015

Highlight

Copy

Compare