Ǝbrəje 11
11
Meekun lé ɓa
1Meekun lé see to ɗi wa. Néje gə́ meḛ sí to yel dɔ’g ɓa j’wa peb el ɓəi nɛ meḛ sí ɓa to dɔ’g bururu ya. J’oo gə kəm sí el ɓəi nɛ meḛ sí ɓa oo mba̰ tɔ. 2Dəwje gə́ ləw lé meekun lə dee ɓa Ala oo dee ne gə́ dəwje gə́ maji.
3Meekun lé ɓa jeḛ j’oo to gə́ tapa Ala ɓa yeḛ unda ne naŋg nee ar néje gə́ jeḛ j’oo gə kəm sí el lé Ala mbo̰ dee unda ne néje gə́ jeḛ j’oo gə kəm sí#Gn 1.1, Pak 33.6,9, ja̰ 1.3.
4Meekun lé ɓa Abel inja nékinjaməs gə́ ur dɔ ka̰ Kaḭ’g ar Ala. Meekun lé Ala ée ne gə́ njemeekarabasur mbata né gə́ yeḛ un ar Ala lé taa ne kəmee rəgm. Abel lé wəi mba̰ nɛ mbɔl dɔ meekun ləa lé yeḛ pata ar sí ɓəi#Gn 4.3-10.
5Meekun lé ɓa Enɔk sané ne pá mba kar yoo ɓar ria el ləm, kar dəw ée el ŋga ləm tɔ mbata Ala nja unee gə́ kun, mbata kédé d’ɔr goo ta ləa pana: Nérea lé taa kəm Ala rəgm#Gn 5.21-24. 6Tɔgərɔ ya, ɓó lé meekun godo ndá dəw kára kara askəm taa kəm Ala el. Mbata kɔm mee dɔ Ala’g kée to gə́ yeḛ si gən ləm, kée gə́ yeḛ gə́ a kar nana gə́ ndolè uba maji ləm tɔ lé yee ɓa gə́ kuma̰ kar dəw rəm ne pər gə́ rɔ Ala’g ya.
7Meekun lé ɓa Noe ra ne bato aji ne njémeekəije ləa. Ala aree oo néje gə́ dəwje d’oo el ɓəi, taa ne tapea wá mée’g sud. Togə́bè meekun lé ɓa yeḛ ila ne ta dɔ dəwje gə́ dɔ naŋg nee, tel ne ŋgon nduba iŋga ne meekarabasur gə́ dəw iŋga gə goo meekun lé#Gn 6.13-22.
8Meekun lé ɓa Abrakam ila ne ŋgonkoji dɔ Ala’g. Loo gə́ yeḛ ɓaree ne mba karee aw si dɔ naŋg gə́ yeḛ a gə kiŋga gə́ dɔ nduba ləa ndá yeḛ ḭ aw ne, nɛ yeḛ gər loo kabee el#Gn 12.1-5. 9Meekun lé ɓa yeḛ aw ra ne ɓee gə́ Ala un ndia gə mba karee. Yeḛ si keneŋ asəna gə njekwagirloo. Kəi-surumje gə́ la gə kubu ɓa yeḛ si keneŋ ar Isaak, deḛ gə Jakob gə́ to njékwa-néndubaje səa na̰’d lé kara d’isi səa keneŋ gə́ njékwagirlooje tɔ#Gn 35.27. 10Mbata Abrakam lé ŋgina ɓee gə́ ŋgira ŋgəŋ, yee ɓa gə́ ɓee gə́ Ala nja gə́ njekwɔji lé ləm, gə njekṵdá ləm tɔ.
11Meekun lé ɓa Sara gə́ to gə́ ɓuga dené kara iŋga siŋga oji ne ŋgon aree oji ne ŋgakeaje mbata yeḛ ɔm mée dɔ njemeenda londoŋ gə́ un ndia aree#Gn 18.11-14, 21.2. 12Yee gə́ bèe ɓa yeḛ gə́ to dəw gə́ unda naŋg mba̰ lé oji ne ŋgon aree oji ne ŋgakeaje gə́ bula digi-digi to gə́ kéréméje gə́ dara ləm, gə nagəra gə́ ta baa-boo’g gə́ dəw askəm tura el ləm tɔ#Gn 15.5, 22.17, 32.12.
13Deḛ neelé lai d’wəi dɔ meekun’g lə dee, lal kiŋga ne néje gə́ Ala un ndia gə mba kar dee. Nɛ d’oo néje neelé gə goo ŋgalee d’orè meḛ dee dɔ’g més, deḛ pana: Neḛ n’toje gə́ mbáje ləm, gə njékwagirlooje gə́ dɔ naŋg nee ləm tɔ#Gn 23.4, 1SgI 29.15, Pak 39.13. 14Deḛ gə́ pa togə́bè lé d’ar sí j’oo gao to gə́ deḛ to dəwje gə́ saŋg ɓee-ra dee gə́ gəd ya. 15Ɓó lé d’ə̰ji ɓee-koji dee gə́ d’ḭ keneŋ ndá kàr bèe nḛ d’iŋga loo tel keneŋ ləw ba mba̰. 16Nɛ ɓasinè lé deḛ ndiŋga ɓee gə́ maji ur dɔ nje gə́ kédé’g, yee ɓa gə́ ɓee gə́ dara. Gelee gə́ nee ɓa rɔ Ala kul ne el, ar dee ɓaree ne Ala lə dee mbata yeḛ gɔl ɓee-boo ar dee mba̰.
17Meekun lé ɓa Abrakam un ne Isaak ar Ala loo gə́ Ala aḭ ne mée lé. Ŋgonee gə́ kára ba jia’g, nɛ yeḛ un aree. To ŋgon gə́ ndukun lə Ala ɓa d’ojee ne ləm#Gn 22.1-14, 18Ala kara ulá ta wɔji ne dəa ləm tɔ pana: Gin Isaak ɓa i a kiŋga ne ŋgakaije gə́ rii a ɓar dɔ dee’g lé#Gn 1.12. 19Abrakam lé ə̰ji to gə́ Ala to njesiŋgamoŋ gə́ askəm kar dəwje d’unda loo teḛ dan njé gə́ d’wəi’g. Yee ɓa yeḛ iŋga ne Isaak gogo asəna gə dəw gə́ teḛ loo-yoo’g tɔ.
20Meekun lé ɓa Isaak tɔr ne ndia dɔ Jakob gə Esawu’g, wɔji ne dɔ néje gə́ a gə ree#Gn 27.27-29,39-40.
21Meekun lé ɓa loo gə́ Jakob a gə kwəi ndá yeḛ tɔr ne ndia dɔ ŋgan Jisəb’g kára-kára lai. Yeḛ gəd rəa dɔ kag-tɔs’g ləa wa ne Ala mée’g#Gn 47.31–48.20.
22Meekun lé ɓa loo gə́ Jisəb gə́ a gə kwəi ndá yeḛ pata gə́ wɔji ne dɔ Israɛlje gə́ d’a gə kunda loo mee ɓee gə́ Ejiptə teḛ ləm, yeḛ un ndia ar dee wɔji ne dɔ sḭgareaje ləm tɔ#Gn 50.24-25, Tr 3.19.
23Meekun lé ɓa njékoji Moyisje d’unee ne ndɔ kojee’g d’iya ne as naḭ munda mbata deḛ d’ée gə́ ŋgon gə́ maji péd-péd ləm, deḛ ɓəl godndu mbai el ləm tɔ#Tr 2.2, 1.22.
24Meekun lé ɓa loo gə́ Moyis tɔg kaŋ-kaŋ ndá yeḛ mbad kar dee ɓaree ŋgolə ŋgon Parao̰ gə́ dené#Tr 2.10-12. 25Karee nai gə ŋgan-Alaje dan nékəmndoo’g lə dee lé yee ɓa yeḛ oo gə́ né gə́ maji unda kisi dan kaiya’g waga. 26Yeḛ oo rɔkul lə Kristi lé gə́ nébao gə́ ur dɔ nébaoje gə́ Ejiptə’g lai mbata yeḛ orè kəmee ndəŋ dɔ nékoga-dɔ-jia’g lé.
27Meekun lé ɓa yeḛ ya̰ ne Ejiptə, dəa to̰ ne kəw dɔ oŋg’g lə mbai el, yeḛ wa mée kɔgərɔ mbata yeḛ oo yeḛ gə́ dumkoo#Tr 2.15. 28Meekun lé ɓa yeḛ ra naḭ Pag saga ne məs takəi’g, mba kar njetuji dəwje ɔrɔ ne rɔ ŋgandər Israɛlje el#Tr 12.21-30.
29Meekun lé ɓa deḛ d’unda ne dan baa-boo gə́ kas dana gaŋg asəna gə loo gə́ tudu kurum-kurum bèe. Njé gə́ Ejiptə gə́ naa mán mba kuru teḛ goo dee’g ya nɛ deḛ nai keneŋ wo̰d#Tr 14.21-31.
30Meekun lé ɓa ndògo-bɔrɔ gə́ d’ilá gugu ne dɔ Jeriko unda ne naŋg loo gə́ deḛ njaa gugu ne dəa as ndɔ siri lé#Juj 6.12-21. 31Meekun lé ɓa Rahab gə́ to kaiya-dené tuji ne na̰’d gə njékaltaje el, mbata yeḛ ra njéŋgəmlooje mbá bur-bur#Juj 2.1-21, 6.22-25.
32See ta ɗi ɓa m’a pa tɔɓəi wa, Gedeo̰ ləm, gə Barak ləm, gə Samso̰ ləm, gə Jepte ləm, gə Dabid ləm gə Samel ləma, gə njéteggintaje ləm tɔ lé m’oo loo pata kwɔji ne dɔ dee el#NR 6.11–8.32, 4.6–5.31, 13.2–16.31, 11.1–12.7, 1Sam 16.1–1Mb 2.11, 1Sam 1.1–25.1 . 33Meekun lé ɓa deḛ neelé d’un ne baŋga dɔ ɓeeko̰je’g ləm, d’ɔr ne kəmta lə koso-dəwje ləm, d’iŋga ne ndukun gə́ wɔji dɔ dee ləma, ndèm ne ta toboḭje sud-sud ləm tɔ#LkD 6.1-27. 34Deḛ neelé tɔl pər gə́ o̰ bilim-bilim misi ləm, deḛ teḛ ta kiambas gə́ adə làm-làm’g ləm, lé d’oso gə rɔko̰ pid-pid kara d’aji ne kədərə ləma, d’wa rɔ dee kɔgərɔ loo-rɔ’g ləma, tuba ne njéboo-rɔje gə́ dɔ ɓeeje gə́ raŋg lé ləm tɔ#LkD 3.1-30. 35Denéje d’iŋga ŋgaw deeje gə ŋgan deeje gə́ teḛ ta yoo’g gogo. Njé gə́ raŋg lé ra sə dee néurtije gə́ to ɓəl nɛ dee d’ɔr rɔ dee keneŋ el mbata deḛ ndigi kiŋga loo-teḛ-dɔkumbwa gə́ maji gə́ ur dɔ maree’g#1Mb 17.17-24, 2Mb 4.25-37. 36Njé gə́ raŋg lé deḛ ndaji ndu dee ləm, kunda dee gə ndəi ləma, d’wa dee daŋgai gə kúla lar ləm tɔ#1Mb 22.26-27, 2SgI 18.25-26, Jer 20.2, 37.15, 38.6. 37Deḛ tila dee gə kɔri-ər ləm, gaŋg dee dana gə kiambas ləma, ra sə dee néurti ləm tɔ. Njé gə́ raŋg d’wəi yoo-kiambas ləm, d’aḭ wur-wur d’ula ndar badje gə ndar bya̰je rɔ dee’g ləm, néje lə deḛ lai tuji pugudu-pugudu ləma, d’ula pər kudu dee’g ra sə dee kədərə yaa̰ ləm tɔ#2SgI 24.21. 38Njé gə́ naŋg nee d’askəm kas sə dee el, deḛ lé d’aw wur-wur ndag-looje’g ləm, gə dɔ mbalje’g ləm, gə mee bolè mbalje’g ləma, gə kəm godə wəlje’g gə́ dɔ naŋg nee ləm tɔ.
39Deḛ lai neelé ri meekun lə dee ɓar mḭ, nɛ ndukun gə́ Ala un ar dee lé d’iŋga née el ɓəi. 40Ala nja wɔji-kwɔji kar sí né gə́ maji unda nje gə́ kédé mba kar jeḛ sə deeje na̰’d ɓa j’a tel to ne dəwje gə́ maji j’ɔr njoroŋ ɓəi.
Currently Selected:
Ǝbrəje 11: SBA2015
Highlight
Copy
Compare
Share
Want to have your highlights saved across all your devices? Sign up or sign in
Ngambai Bible © Alliance Biblique du Tchad 1989, 2015.
