Gḭ-Néje 4
4
Kaḭ gə Abel
1Adam gər Ebe gə́ dené ləa ndá yeḛ əskèm oji ne Kaḭ. Yeḛ pana: Njesigənea̰ la səm am m’iŋga ne dəw gə́ diŋgam. 2Yeḛ oji ŋgokea̰ Abel gogo ɓəi.
Abel lé to njekulbadje nɛ Kaḭ to njendɔ-ndɔ tɔ. 3Gée gə́ gogo gə kuree ndá Kaḭ un kandə néje gə́ mee ndɔ’g ləa gə́ nékarnoji ar Njesigənea̰. 4Abel kara ree gə ŋgandər nékulje gə́ mbuna nékulje’g ləa gə ubu dee tɔ. Abel gə nékarnoji ləa taa kəm Njesigənea̰ rəgm . 5Nɛ yeḛ un kəmee rəw dɔ Kaḭ’g gə dɔ nékarnoji’g ləa. Yen ŋga mee Kaḭ ḭ səa pu ndá ar kəmee mas mbidi-mbidi. 6Njesigənea̰ dəji Kaḭ pana: See ban ɓa məəi ḭ səi pu wa. See ban ɓa i mi mbidi-mbidi bèe wa. 7Tɔgərɔ ya, ɓó lé i ra maji ndá i a kun dɔi tar gogo ɓəi. Nɛ ɓó lé i ra majel ndá kaiya to takəi’g ləi, yee ndiŋga rəa gə mba kwai nɛ i lé maji kari dum dəa ɓa.
8Nɛ Kaḭ pa gə ŋgokea̰ Abel ta. Loo gə́ deḛ d’aar na̰’d mee ndɔ’g ndá Kaḭ ḭ ur dɔ ŋgokea̰ Abel’g tɔlee .
9Njesigənea̰ dəji Kaḭ pana: See ŋgokɔḭ Abel lé aar ra wa.
Yeḛ tel ilá keneŋ pana: Ma m’gər el. See ma m’to njekaa dɔ ŋgokɔm lé wa.
10Ala dəjee pana: See ɗi ɓa i ra bèe wa. Kaa məs ŋgokɔḭ gə́ ɓar naŋg lé aw njal teḛ rɔm’g ya . 11Ɓasinè, ndɔl a kwa dɔi dɔ naŋg nee, yee gə́ teḛ təa taa ne məs ŋgokɔḭ jii’g lé. 12Loo gə́ i ndɔ-ndɔ ndá dɔ naŋg a kari né ti el. I a to njekaḭta ləm, gə njekilatar mbir-mbir dɔ naŋg’d nee ləm tɔ.
13Kaḭ ula Njesigənea̰ pana: Bo̰ néram lé al dɔm sula. 14Aa oo, ɓogənè i tubam dɔ naŋg nee. I a k’un kəmi rəw dɔm’g ləm, m’a to njekaḭta ləma, gə njekilatar mbir-mbir dɔ naŋg nee ləm tɔ. Bèe ɓa nana ɓa gə́ a kiŋgam lé a tɔlm ya.
15Njesigənea̰ ulá pana: Ɓó lé dəw a tɔl Kaḭ ndá d’a dal bea̰ gɔl siri.
Togə́bè Njesigənea̰ ra nétɔji rɔ Kaḭ’g mba kar nana ɓa gə́ iŋgá ndá a tɔlee el. 16Yen ŋga Kaḭ saa rəa aw əw gə Njesigənea̰ ndá yeḛ ra ɓee dɔ naŋg gə́ Nod mbɔr Edḛ gə́ bər lé.
Ŋgaka Kaḭ
17Kaḭ gər dené ləa. Yeḛ taa kèm oji ne Enok. Gée gə́ gogo yeḛ ra ɓee-boo ndá yeḛ unda ri ŋgonee Enok ɓa dɔ ɓee-boo’g neelé. 18Enok oji Irad, Irad oji Mehujael, Mehujael oji Metusael, Metusael oji Lemek.
19Lemek taa denéje joo, yeḛ gə́ kára ria lə Ada, yeḛ gə́ raŋg ria lə Sila. 20Ada oji Jabal, yeḛ to bɔ deḛ gə́ d’isi kəi-kubuje’d gə́ to mbɔr boo-nékulje’g. 21Ŋgokea̰ lé ria lə Jubal, yeḛ to bɔ deḛ lai gə́ to njékim kṵdu ko̰déje gə buulaje tɔ. 22Sila kara oji Tubal-Kaḭ, yeḛ to njekɔr gə́ ra nékadje lai gə larkas gə larndul tɔ. Konan Tubal-Kaḭje lé ria lə Naaman.
23Lemek ula denéje ləa pana:
Ada gə Sila, urje mbi sí ooje ne ndum!
Denéje lə Lemek, urje mbi sí ooje ne ta ləm!
Ma m’tɔl dəw kára mbata doo gə́ ma m’iŋga,
Ma m’tɔl ŋgon kára mbata doo gə́ to rɔm’g lé tɔ.
24Kaḭ lé d’a dal ba̰ ləa gɔl siri,
Nɛ Lemek lé kea̰-yeḛ a to gɔl rɔ-siri-giree-siri .
25Adam gər dené ləa gɔl kára tɔɓəi ndá yeḛ oji ne ŋgon gə́ diŋgam unda ria lə Set mbata yeḛ pana: Ala am ŋgon gə́ diŋgam gə́ raŋg tor Abel gə́ Kaḭ tɔlee lé.
26Set lé oji ŋgon gə́ diŋgam ndá unda ria lə Enɔs. Yen ŋga mee ndəa’g neelé dəwje d’un kudu ɓar ri Njesigənea̰ ŋga.
Currently Selected:
Gḭ-Néje 4: SBA2015
Highlight
Share
Copy
Want to have your highlights saved across all your devices? Sign up or sign in
Ngambai Bible © Alliance Biblique du Tchad 1989, 2015.