Esdras 4

Njéba̰je lə Jibje d’ar kula kunda kəi gə́ to gə kəmee lé aar naŋg

1Njéba̰je lə Judaje gə Bḛjamije d’oo ta lə deḛ gə́ d’ḭ ɓee ɓee-ɓər’g tel ree lé d’unda kəi gə́ to gə kəmee d’ar Njesigənea̰ Ala lə Israɛlje. 2Ndá deḛ ree rɔ Jorobabel’g gə rɔ deḛ gə́ to mbai dɔ gel-bɔje lə dee lé, d’ula dee pana: Jeḛ ndigi ra sə sí kəi gə́ seḭ aw raje lé na̰’d. Mbata jeḛ kara j’wa Ala meḛ sí’g to gə́ seḭ raje bèe ləm, jeḛ j’inja nékinjanéməsje j’aree ləm tɔ, un kudee mee ndəa gə́ Esar-Hado̰, mbai gə́ Asiri ree ne sə sí loo gə́ nee’g lé#2Mb 17.24-41.

3Nɛ Jorobabel gə Juje gə mbai dɔ gel-bɔje lə Israɛlje gə́ nai lé tel d’ila dee keneŋ pana: Jeḛ sə síje j’a kasjekəm kɔrè na̰ mba ra kəi-Ala lə sí el. Jeḛ nja gə kar sí ba j’a ra kəi neelé kar Njesigənea̰ Ala lə Israɛlje to gə́ Sirus, mbai gə́ Persə un ne ndia ar sí lé ya.

4Yen ŋga dəw-mee-ɓeeje ra né d’ar ji dəwje gə́ Juda wəi njururu ləm, d’ar dee ɓəl dɔ ra kəi gə́ neelé ləm tɔ. 5Deḛ d’odo lar d’uga ne dəwje gə́ njékwɔji takəmkàrje mba kar dee tuji ne gin kula lə dee lé. Deḛ ra togə́bè mee ndəa gə́ Sirus, mbai gə́ Persə si ne gə kəmee ɓəi ləm, saar teḛ mee ndəa gə́ Darius tel to ne mbai gə́ Persə ləm tɔ.

6Mee ləb ko̰ɓee’g lə Asuerus, loo gə́ yeḛ un kudu ko̰ɓee lé ndá deḛ ndaŋg maktub səg ne dəwje gə́ d’isi Juda ləm gə Jerusalem ləm tɔ#Est 1.1.

7Tɔɓəi mee ndəa’g lə Artajerjɛs kara Bislam, gə Mitredat, gə Tabeel gə ges kuramar deeje lé ndaŋg maktub d’ar Artajerjɛs, mbai gə́ Persə lé. Maktub neelé deḛ ndaŋg gə goso ndaŋg maktub lə Aramje tɔɓəi deḛ telee gə ta Aram ya tɔ.

8Rehum gə́ njeguburuɓee ləm, gə Simsai, njendaŋ-maktub ləm tɔ lé, deḛ kara ndaŋg maktub səg ne njé gə́ Jerusalem no̰ mbai Artajerjɛs’g tɔ. Ta gə́ pa mee maktub’g lé ɓa nee:

9Rehum gə́ njeguburuɓee ləm, gə Simsai, njendaŋ-maktub ləm, gə ges kuramar deeje gə́ d’ḭ ɓeeje gə́ Dḭ, gə Arparsatak, gə Tarpel, gə Aparas, gə Erek, gə Babilɔn, gə Susə, gə Deha, gə Elam ləma, 10gə ges koso-dəwje gə́ raŋg gə́ Osnapar, dəw gə́ boo gə́ to njeriɓar lé wa dee gə́ ɓər ree sə dee unda dee mee ɓee-boo’d gə́ Samari gə looje gə́ raŋg gə́ to kel tura-baa’g nee ləm tɔ.

11Ta gə́ ndaji mee maktub gə́ d’ula ne d’ar mbai Artajerjɛs lé ɓa nee:

Kuraje ləi gə́ to dəwje gə́ kel tura-baa gə́ nee...

12Maji kar mbai gər gao to gə́ Jibje gə́ d’ḭ rəa’g ree mbuna síjeḛ gə́ Jerusalem lé d’isi d’unda ɓee-boo gə́ to ɓee-kalta gə ɓee gə́ yèr lé gogo ləm, deḛ tel gɔl ndògo-bɔrɔje ləa d’aree to tar gogo ləma, deḛ tel tum gelee gogo ləm tɔ. 13Maji kar mbai gər gao, ɓó lé deḛ tel d’unda ɓee-boo lé gogo ləm, ɓó lé deḛ gɔl ndògo-bɔrɔje ləa gogo ləm tɔ ndá d’a kuga nékoga-dɔ-rɔ-dee el ləm, d’a kuga négədɓee el ləma, d’a kuga rəw mba dəs ne el ləm tɔ. Bèe ndá lar-gədɓeko̰ lə mbai lé a keḭ el. 14Bèe ɓa to gə́ mee kəi lə mbai lé to gə́ loo sɔ né lə sí ndá jeḛ j’oo to gə́ kila rɔkul gə́ togə́bè dɔ mbai’g lé to né gə́ kəm ra el. Yee ɓa j’ulaje ne gə taje nee j’ar mbai mba karee oo taree gəd ya. 15Bèe ndá maji kar dee saŋg mee maktub nékolé-mee’g lə bɔbije-je d’oo. Yee ɓa i a koo ne ta gə́ wɔji dɔ ɓee neelé mee maktubee’g lé ya. Yee ɓa i a gər ne to gə́ ɓee-boo neelé to ɓee-kalta ləm, dəwje neelé d’oo mbaije gə dəb ɓeeko̰je neelé gə́ né gə́ əḭ kəm dee’g el ləm tɔ. Yee ɓa gə́ gelee gə́ ɓee neelé tuji ne kédé gə mbəa. 16Ta neelé j’ulaje mbai gə mba kari gər gao, ɓó lé deḛ ra ɓee-boo neelé gogo ləm, ɓó lé d’unda ndògo-bɔrɔje ləa tar gogo ləm tɔ ndá né gə́ to kaḭ a to kel tura-baa gə́ nee el ŋga tɔ.

17Ta gə́ mbai lé tel ula Rehum gə́ njeguburuɓee ləm, gə Simsai, njendaŋ-maktub ləma, gə ges kuramar deeje gə́ d’isi Samari gə kel tura-baa’g nee ləm tɔ lé ɓa nee: Lapia ɓòo!

18Maktub gə́ seḭ ulaje ne ar síjeḛ lé deḛ tura njai-njai d’am m’oo ya. 19Ma m’un ndum m’ar dee gə mba kar dee saŋg taree ndá d’iŋga to gə́ un kudee ləw-ləw ba lé dəwje gə́ mee ɓee-boo’g neelé d’ḭ gə mbaije ləm, d’ula rɔ dee ndubu mba tuji ɓeeko̰ ləma, deḛ d’ɔs ta lə njéko̰ɓeeje rəw ləm tɔ. 20Kédé lé mbaije gə́ to njésiŋgamoŋje ɓa d’isi Jerusalem d’o̰ loo lai gə́ kel tura-baa gə́ nu ndá d’ar dəwje d’uga dɔ rɔ dee ləm, gə négədɓee ləma, d’ar dee d’uga rəw ɓa dəs ne ləm tɔ. 21Gelee gə́ nee ɓa ɓasinè maji kar sí unje ndu sí arje dəwje neelé mba kar dee d’əw rɔ dee ra kula neelé ləm, kar dee tel gɔl ɓee-boo neelé el ləm tɔ saar kam m’un ndum m’ar dee ɓa. 22Undaje kəmkàr dɔ rɔ sí’g gə mba lal ra né neelé el nà banelə né gə́ majel a kḭ ra mbaije gə́ kédé-kédé.

23Léegəneeya gə́ deḛ tura maktub lə mbai Artajerjɛs lé no̰ Rehum, njeguburuɓee’g, gə no̰ Simsai gə́ to njendaji-maktub’g, gə no̰ kuramar deeje’g ndá deḛ d’ɔd gə tɔg dee d’aw Jerusalem rɔ Jibje’g. Deḛ ra sə dee né gə́ kərm-kərm ləm, gə nésiŋgamoŋje ləm tɔ ɓa d’ɔg dee ne loo ra kula neelé.

Tel dɔ kula kunda kəi gə́ to gə kəmee’g lé gogo

24Togə́bè ɓa deḛ d’əw ne rɔ dee ra kula gə́ wɔji dɔ kəi-Ala gə́ to Jerusalem lé d’ya̰ gée saar ləb ko̰ɓee gə́ njekɔm’g joo lə Darius, mbai gə́ Persə lé tɔ#Aje 1.1, Jak 1.1 .

Currently Selected:

Esdras 4: SBA2015

Highlight

Copy

Compare