Ejekel 8
8
Némḭdi gə́ wɔji dɔ magə-poleje gə́ mee kəi Ala’d gə́ Jerusalem
1Mee ləb gə́ njekɔm’g misa̰ lé naḭ gə́ njekɔm’g misa̰ ra ndɔ mi loo gə́ ma m’isi mee kəi’g ləm ləm, ŋgatɔgje gə́ Juda d’isi nɔm’g ləm tɔ ndá Mbaidɔmbaije gə́ Njesigənea̰ ila jia dɔm’g. 2Ma m’aa loo gərərə ndá aa oo, né teḛ asəna gə dəw bèe, un kudee rḛgee’g saar teḛ naŋg lé to asəna gə pər ləm, un kudee rḛgee’g saar teḛ tar to asəna gə né gə́ ndɔḭ wər-wər to gə́ larkas gə́ d’usu d’aree ndɔḭ bèe ləm tɔ#Ejk 1.27. 3Yeḛ ula né gə́ tana gə ji dəw bèe naŋg wa ne yiŋga dɔm. Ndil lé unm naŋg aw səm mbuna naŋg gə dara’g ndá yeḛ unm dan némḭdije gə́ ḭ rɔ Ala’g lé aw səm Jerusalem, tarəw gə́ mee kəi gə́ to par gə́ kel dɔgel, loo gə́ magə-kəmkəḭ gə́ ɔs gel kəmkəḭ lə Njesigənea̰ lé to keneŋ. 4Aa oo, rɔnduba lə Ala lə Israɛlje teḛ lée’g neelé to gə́ m’oo dan némḭdi’g mee wəl-loo’g lé#Ejk 1.28. 5Yeḛ ulam pana: Ma ŋgon-dəw lé maji kam m’un kəm par gə́ dɔgel!
Ma m’un kəm par gə́ dɔgel lé ya tɔ ndá aa oo, magə-kəmkəḭ neelé to par gə́ dɔgel mbɔr tarəwkəi’d gə́ aw par gə́ loo-nékinjaməs gə́ to loo-kandə-kəi’g. 6Ndá yeḛ ulam pana: Ma ŋgon-dəw lé see m’oo né gə́ deḛ ra gə́ to boo-néje gə́ mina̰ gə́ gel-bɔje lə Israɛl d’isi ra loo gə́ nee’g gə mba kar neḛ n’ya̰ ne loo lə neḛ gə́ to gə kəmee neelé wa. Nɛ m’a koo boo-néraje gə́ mina̰ gə́ raŋg ya tɔɓəi.
7Yen ŋga yeḛ ɔr nɔm aw səm tarəw kandə mee ndògo’d. Ma m’aa loo gərərə ndá aa oo, kaar ndògo-bɔrɔ mbudu. 8Ndá yeḛ ulam pana: Ma ŋgon-dəw lé maji kam m’ɔs kəm ndògo-bɔrɔ mbudu.
Ma m’ɔs kəm ndògo-bɔrɔ lé mbudu ya tɔ ndá aa oo, tarəwkəi to keneŋ. 9Yeḛ ulam pana: Maji kam m’andə kəi m’oo némajelje lə dee gə́ to néje gə́ mina̰ gə́ deḛ ra loo gə́ nee’g lé.
10Ma m’andə keneŋ m’aa loo gərərə ndá aa oo, m’oo néje lai gə́ ra ndaji ne ndil néje gə́ d’ag naŋg ləm, gə daje gə́ mina̰ ləma, gə magəje lə gel-bɔje lə Israɛlje lai gə́ ndaji dee kaar ndògo-bɔrɔ’g gugu dəa sub. 11Dəwje rɔ-siri mbuna ŋgatɔgje’g lə gel-bɔje lə Israɛl lé d’aar no̰ magəje’g neelé gə bai roo né gə́ ə̰də sululu lé ji dee’g ji dee’g ar Jaasania, ŋgolə Sapan aar dan dee’g ndá sa néje gə́ ə̰də sululu lé tuu udu loo lus-lus. 12Ndá yeḛ dəjim pana: Ma ŋgon-dəw lé see m’oo né gə́ ŋgatɔgje lə gel-bɔje lə Israɛl d’aw ra loondul’g, nana kara mee kəi’g ləa-ləa gə́ néndajije taa ne loo pəl-pəl lé wa. Mbata deḛ pana: Njesigənea̰ oo sí el, Njesigənea̰ uba ɓee lé ya̰ gə kya̰.
13Yeḛ ulam pana: M’a koo boo-néje gə́ raŋg gə́ mina̰ jɔmri-jɔmri gə́ deḛ d’aw ra ya ɓəi.
14Yeḛ ɔr nɔm aw səm tarəw kandə mee kəi’g lə Njesigənea̰ gə́ to par gə́ dɔgel. Ndá aa oo, denéje d’isi naŋg keneŋ d’aw no̰ yoo magə-Tamuj. 15Yeḛ dəjim pana: Ma ŋgon-dəw lé see m’oo ya wa. M’a koo néje gə́ mina̰ gə́ raŋg gə́ boo ur dɔ njé gə́ nee gə́ deḛ ra ya ɓəi.
16Tɔɓəi yeḛ ɔr nɔm aw səm mee gadloo’g mee kəi’g lə Njesigənea̰. Ndá aa oo, dəwje d’as rɔ-joo-gir-dee-mi d’aar tarəw kandə mee kəi’g lə Njesigənea̰ mbuna gel jala’g gə loo-kḭjanéməs’g. Deḛ tel gir dee d’ila d’ar kəi lə Njesigənea̰ ndá tel kəm dee par gə́ bər. Deḛ d’unda barmba par gə́ bər dəb kəm dee naŋg no̰ kàr’g. 17Yeḛ dəjim pana: Ma ŋgon-dəw lé see ma m’oo ya wa. Kar gel-bɔje lə Juda ra néje gə́ mina̰ togə́bè loo gə́ nee’g lé see to né gə́ lam ba wa. See kəm kar dee ra néje gə́ kərm-kərm d’aree taa mee ɓee pəl-pəl ləm, kar dee d’əw rɔ dee kar mee neḛ ḭ ne sə neḛ jugugu ləm tɔ el ya ɓəi wa. Aa oo, d’isi rəm gə barkəm kag lé gə́ əm dee’g. 18Neḛ kara n’a ra né gə goo boo-oŋg ləm, kəm neḛ a kas ŋgɔgərɔ dɔ dee’g ləma, n’a koo kəmtondoo lə dee nda̰ el ləm tɔ. Loo gə́ d’a no̰ wəl mbi neḛ’g kara n’a kun mbi neḛ rəw dɔ’g ya tɔ.
Currently Selected:
Ejekel 8: SBA2015
Highlight
Copy
Compare
Share
Want to have your highlights saved across all your devices? Sign up or sign in
Ngambai Bible © Alliance Biblique du Tchad 1989, 2015.
