Ejekel 46

Godndu gə́ wɔji dɔ mbai gə́ njeɓee lé

1Mbaidɔmbaije gə́ Njesigənea̰ pa togə́bè pana: Tarəw kandə mee gadloo gə́ kəi kɔrɔg gə́ to par gə́ bər lé a to gə loo kudee mee ndɔje gə́ misa̰ gə́ to ndɔ ra kula lé, nɛ ndɔ-kwa-rɔ ndá təa a to tag ləm, ndɔ gə́ naḭ teḛ sigi kara təa a to tag ləm tɔ. 2Mbai gə́ njeɓee a kandə gə rəw gə́ loo-kandə-kəi gə́ wɔji dɔ tarəw gə́ raga ndá yeḛ a kaar mbɔr kag-tarəwje’g dəb, njékinjanéməsje d’a kinja nékinjaməs ləa gə́ ka̰ roo ləm, gə nékinjanéməsje ləa gə́ ka̰ ra oiyo ləm tɔ, yeḛ a kunda barmba no̰ tarəwkəi’g tɔɓəi yeḛ a teḛ raga ndá d’a kudu tarəw el saar kar kàr uru naŋg jigi. 3Koso-dəwje gə́ mee ɓee’g d’a kunda barmba no̰ Njesigənea̰’g tarəwkəi’g neelé ndɔ-kwa-rɔje’g ləm, gə ndɔje gə́ naḭ teḛ sigi ləm tɔ.

4Nékinjaməs gə́ ka̰ roo gə́ mbai gə́ njeɓee a kinja kar Njesigənea̰ ndɔ-kwa-rɔ’g lé a to ŋgan badje misa̰ gə́ rɔ dee maji péd-péd ləm, gə bàl badə kára gə́ rəa maji péd-péd ləm tɔ, 5tɔɓəi nékarje ləa a to kó-wa as nékwɔji kwɔi-lə-né rɔ-munda mbata lə bàl badə ləm, gə kó-wa to gə́ mée ndigi mbata lə ŋgan badje lé ləm tɔ gə ubu as litər misa̰ na̰’d gə goo kó-wa gə́ nékwɔji kwɔi-lə-né rɔ-munda-munda lé. 6Ndɔ gə́ naḭ teḛ sigi lé yeḛ a kinja bɔ maŋg gə́ rəa maji péd-péd kára ləm, gə ŋgan badje misa̰ gə bàl badə kára gə́ rɔ dee maji péd-péd ləm tɔ, 7tɔɓəi yeḛ a kar nékar gə́ to kó-wa as nékwɔji kwɔi-lə-né rɔ-munda mbata lə bɔ maŋg kára-kára gə bàl badə kára-kára lé ləm, gə kó-wa to gə́ mée ndigi mbata lə ŋgan badje lé ləm tɔ gə ubu as litər misa̰ na̰’d gə goo kó-wa gə́ nékwɔji kwɔi-lə-né rɔ-munda-munda lé. 8Loo gə́ mbai gə́ njeɓee a gə kandə kəi ndá a kandə gə rəw gə́ loo-kandə-kəi gə́ to tarəw’g ləm, yeḛ a kunda loo teḛ raga gə rəw neelé ləm tɔ. 9Nɛ loo gə́ koso-dəwje gə́ mee ɓee’g d’a gə ree kaar no̰ Njesigənea̰’g ndɔ ra naḭje gə́ to gə kəmee gə́ to ka̰ Njesigənea̰ ndá dəw gə́ a kandə kəi gə tarəw gə́ to par gə́ dɔgel mba kunda barmba ndá a kunda loo teḛ raga gə tarəw gə́ par gə́ dɔkɔl, dəwje d’a tel teḛ raga gə rəw gə́ d’andə ne kəi lé el nɛ tarəw gə́ to wɔji dɔ na̰ njoroŋ-njoroŋ ɓa d’a teḛ ne raga. 10Mbai gə́ njeɓee a kandə sə dee na̰’d loo gə́ d’a kandə kəi ləm, yeḛ a kunda loo teḛ raga loo gə́ d’a teḛ raga ləm tɔ.

Godndu gə́ wɔji dɔ nékinjanéməsje ɓəd-ɓəd

11Loo ra naḭje gə loo ra naḭje gə́ to gə kəmee gə́ to ka̰ Njesigənea̰ lé nékar gə́ to kó-wa a kas nékwɔji kwɔi-lə-né rɔ-munda mbata lə bɔ maŋg kára-kára gə bàl badə kára-kára ləm, gə kó-wa to gə́ mee dəw ndigi mbata lə ŋgan badje lé ləm tɔ gə ubu as litər misa̰ na̰’d gə goo kó-wa gə́ nékwɔji kwɔi-lə-né rɔ-munda-munda lé.

12Ɓó lé mbai gə́ njeɓee ḭ gə mée un nékinjaməs gə́ ka̰ roo əsé ḭ gə mée un nékinjaməs gə́ ka̰ ra oiyo ar Njesigənea̰ ndá d’a kɔr tarəwkəi gə́ to par gə́ bər karee, bèe ɓa yeḛ a kun nékinjanéməsje ləa gə́ ka̰ roo gə ka̰ ra oiyo to gə́ yeḛ ra gə ndɔ-kwa-rɔ lé, tɔɓəi yeḛ a kunda loo teḛ raga ndá d’a kudu tarəw gée’g loo gə́ yeḛ unda loo teḛ raga lé,

13Ndɔje kára-kára lai lé d’a kwa ŋgon badə gə́ ra ləb kára gə́ rəa maji péd-péd gə́ nékinjaməs gə́ ka̰ roo kar Njesigənea̰, d’a kinja gə ndɔ rad-rad. 14Nékar gə́ gə ndɔ rad-rad gə́ d’a korè na̰’d gə ŋgon badə lé a to kó-wa as nékwɔji kwɔi-lə-né mi gə́ d’a podé gə ubu as litər joo. Yee ɓa to nékar mba kar Njesigənea̰ gə́ to godndu gə́ to njaŋg gə no̰. 15Gə ndɔ rad-rad lai lé d’a kinja nékinjaməs gə́ ka̰ roo gə́ to gə no̰ gə́ to ŋgon badə ləm, gə nékar gə́ to kó-wa gə́ podé gə ubu na̰’d ləm tɔ kar Njesigənea̰ ya.

Ta lə nénduba gə́ mbai gə́ njeɓee a kar ŋganeeje

16Mbaidɔmbaije gə́ Njesigənea̰ pa togə́bè pana: Ɓó lé mbai gə́ njeɓee un dəb loo nénduba ləa gə́ nékarnoji ar ŋgonee kára mbuna mareeje’g ndá loo neelé a to né ka̰ ŋgan mee ŋgoneeje neelé ləm, a to nénduba lə dee gə́ to ka̰ dee-deḛ ya ləm tɔ. 17Nɛ ɓó lé mbai gə́ njeɓee un dəb loo nénduba ləa gə́ nékarnoji ar ɓər ləa kára mbuna mareeje’g ndá loo neelé a to kea̰ ya saar ləb kɔr ɓər dəa’g ɓa loo neelé a tel to ka̰ mbai gə́ njeɓee ya gogo ɓəi, ŋganeeje ya gə kar dee ba ɓa né gə́ yeḛ ar dee gə́ nénduba lé a to ka̰ dee#Ləb 25.10. 18Mbai gə́ njeɓee a taa nénduba lə koso-dəwje kára kara el ləm, néje gə́ to né ka̰ dee lé yeḛ a buguru dee dɔ’g el ləm tɔ, nénduba gə́ yeḛ a kai ŋganeeje lé a kḭ ne mbuna néje gə́ to kea̰ ya ɓó a kɔs dəw kára kara mbuna koso-dəwje’g lə neḛ rəw dɔ né gə́ to né kea̰’g lé el.

Kəi-ndiri-né gə́ wɔji dɔ kəi gə́ to gə kəmee

19Yeḛ aw səm par gə́ rəw kandə mee kəi’d gə́ to mbɔr tarəw’g teḛ səm mee ŋgan kəije gə́ d’unda dee gə kəmee mbata lə njékinjanéməsje par gə́ dɔgel lé. Ndá aa oo, loo kára to duu-loo’g par gə́ dɔ-gó. 20Yeḛ ulam pana: Lée neelé ɓa njékinjanéməsje d’a kar dee ndiri dakas nékinjanéməsje gə́ ka̰ kɔr ta kaiya gə ka̰ kuga dɔ kaiya keneŋ ləm, lé neelé ɓa d’a ndiri nékarje gə́ ka̰ ndiri keneŋ ləm tɔ ɓó d’a kodo néje neelé kaw ne mee gadloo gə́ raga loo gə́ d’unda koso-dəwje gə kəmee keneŋ lé el.

21Yeḛ ɔr nɔm aw səm mee gadloo gə́ raga am m’njaa par gə́ dɔ kum looje gə́ sɔ lé. Ndá aa oo, dɔ kum looje neelé gadloo to keneŋ kára-kára lai. 22Dɔ kum gadlooje gə́ sɔ neelé gadlooje gə́ wɔji dɔ deḛ gə́ ŋgal dee as kəmkil dəw rɔ-sɔ ləm, tad dee as kəmkil dəw rɔ-munda ləm tɔ to keneŋ, dee sɔ lai ŋgal dee gə tad dee d’asəna. 23Ndògo-bɔrɔ gugu dɔ dee gə loo dee gə́ sɔ lai tɔɓəi dee ra kəi-ndiri-néje kaar ndògo-bɔrɔ’g lé gugu ne dəa sub tɔ. 24Yeḛ ulam pana: To kəi-ndiri-néje gə́ kuraje gə́ njéra kula mee kəi’gje lé d’a ndiri dakas nékinjanéməsje gə́ koso-dəwje d’ar dee keneŋ.

Currently Selected:

Ejekel 46: SBA2015

Highlight

Compare

Copy