Ejekel 1

Ejekel oo rɔnduba lə Njesigənea̰

1Mee ləb gə́ njekɔm’g rɔ-munda lé gə ndɔ mi lə naḭ gə́ njekɔm’g sɔ lé ndá, loo gə́ m’isi mbuna ɓərje’g mbɔr baa’d gə́ ria lə Kebar lé ndá, kəm dara teḛ am m’oo némḭdije gə́ d’ḭ rɔ Ala’g lé#LkJ 19.11. 2Loo gə́ naḭ ra ndɔ mi lé, ləbee neelé to ləb gə́ njekɔm’g mi gə́ d’aw ne gə mbai Jojakḭ ɓee-ɓər’g lé ndá#2Mb 24.10-16, 2SgI 36.9-10, 3Njesigənea̰ ula Ejekiel, ŋgolə Buji gə́ njekinjanéməs lé ta, mee ɓee’g lə Kaldeje mbɔr Kebar’g. Lée gə́ neelé ɓa ji Njesigənea̰ to dəa’g keneŋ ya.

4Ma m’aa loo gərərə ndá aa oo, lel ḭ gigigi ləm, gə kil-lə-ndi gə́ ḭ udu loo pḛ-pḛ ləma, gə pər gə́ tɔ na̰ ar ndogó ləa ɔr loo jol-jol ləm tɔ lé ḭ par gə́ dɔgel ree. Ŋgaw danee ndɔḭ to gə́ larkas gə́ d’usu d’aree ndɔḭ wər-wər gə́ ḭ dan pər’d bèe. 5Loo gə́ dana bab lé nékundaje sɔ gə́ d’aw kəmba gə́ to tana gə dəwje teḛ keneŋ#LkJ 4.6. 6Deḛ kára-kára lai lé loo gə́ kəm dee’g lé tɔ loo sɔ-sɔ ləm, bag dee kara yee sɔ-sɔ ləm tɔ. 7Gɔl dee aar dana ɗigi-ɗigi ləm, dabla gɔl dee to asəna gə ka̰ ŋgon maŋg bèe ləma, deḛ ndɔḭ to gə́ larkas gə́ d’usu d’aree ndɔḭ wər-wər bèe ləm tɔ. 8Dəb rɔ deḛ gə́ sɔ-sɔ lé deḛ d’uba ji dee to gə́ ji dəw bèe gel bag dee’g bag dee’g keneŋ, deḛ sɔ lai lé kəm dee gə bag dee to keneŋ-keneŋ tɔ. 9Bag dee wa na̰ rib-rib, loo gə́ d’aw njaa lé, deḛ turu rɔ dee el, nɛ nana kara njaa njoroŋ gə́ nea̰’g ya. 10Deḛ lai lé loo gə́ kəm dee’g to tana gə kəm dəw bèe ləm, deḛ sɔ lai lé loo gə́ kəm dee gə́ dɔkɔl to tana gə kəm toboḭ bèe ləm, deḛ sɔ lai lé loo gə́ kəm dee gə́ dɔgel to tana gə kəm bɔ maŋg bèe ləma, deḛ sɔ lai lé loo gə́ kəm dee gə́ kára to tana gə kəm niŋgatə̰də bèe ləm tɔ#Ejk 10.14, LkJ 4.7. 11Loo gə́ kəm dee’g gə loo tuga bag dee lé pən-loo gə́ par gə́ tar to keneŋ, bag dee gə́ joo-joo wa na̰ rib-rib ləm, njé gə́ joo d’o̰ ne rɔ dee ləm tɔ. 12Nana kara njaa dana njoroŋ gə́ nea̰’g-nea̰’g, deḛ d’aw loo gə́ ndil ɓa ɔs dee gə́ keneŋ ndá loo gə́ d’aw njaa lé deḛ turu rɔ dee el. 13Kunda rɔ lə nékundaje neelé to asəna gə kɔr pər gə́ taa gəgəgə bèe ləm, to asəna gə pərŋgelje bèe ləm tɔ ndá pər neelé aw mbuna nékundaje’d gə́ yo gə́ nee, ndogó ləa tèl wərə-wərə tɔ. 14Nékundaje lé d’aḭ yo gə́ nee to gə́ ndi gə́ tèl wərərə-wərərə bèe.

15Ma m’aa nékundaje neelé gərərə ndá aa oo, gɔl pusuje to naŋg mbɔr nékundaje’g lé no̰ kəm deeje gə́ sɔ-sɔ’g lé#Ejk 10.9-13. 16Gɔl pusuje neelé ndɔḭ lə dee to to gə́ ka̰ jər gə́ ɓaree krijɔlitə bèe ləm, deḛ sɔ lai lé to d’asəna ləma, loo kunda rɔ dee gə kuburu rɔ dee lé to asəna gə gɔl pusu gə́ tula mee na̰’d ləm tɔ. 17Loo gə́ d’aḭ tar ndá d’aḭ kəm dee gə́ kédé gə dəb deḛ gə́ sɔ lé lai ɓó turu rɔ dee el. 18Gɔl pusuje neelé kəm kəi dee gə ŋgal dee gə́ tar to ɓəl kədm-kədm ləm, kəm kəi deḛ gə́ sɔ lé né gə́ asəna gə kəm dəw gə́ ndɔḭ bèe gugu sub-sub ləm tɔ#LkJ 4.8. 19Loo gə́ nékundaje lé d’ɔd d’aw njaa tar ndá gɔl pusuje lé nduburu mbɔr dee’g mbɔr dee’g tɔ, tɔɓəi loo gə́ nékundaje lé d’uba naŋg d’ḭ tar ndá gɔl pusuje lé kara d’uba naŋg d’ḭ sə dee tar na̰’d tɔ. 20Deḛ d’aw loo gə́ ndil ɓa ɔs dee ar dee d’aw keneŋ, ndá gɔl pusuje lé d’aw sə dee na̰’d mbata gɔl pusuje lé d’aw gə goo ndil nékundaje neelé. 21Loo gə́ d’aw njaa tar ndá gɔl pusuje nduburu sə dee na̰’d, loo gə́ d’aar naŋg ndá deḛ kara d’aar naŋg tɔ, loo gə́ d’uba naŋg d’ḭ tar ndá gɔl pusuje lé kara d’ḭ sə dee tar na̰’d tɔ, mbata gɔl pusuje d’aw gə goo ndil nékundaje neelé.

22Loo gə́ dɔ nékundaje’g neelé né gə́ to asəna gə dara gə́ ndɔḭ mbənənə-mbənənə to keneŋ asəna gə jər gə́ ria lə kristal bèe ndá un loo dɔ dee’g tar lad-lad#LkJ 4.6 . 23Gin dara’g neelé bag dee to dana njoroŋ-njoroŋ wɔji dɔ na̰-na̰ ləm, deḛ kára-kára lai lé bag dee gə́ joo-joo ɔn dɔ dee ləm, bag dee gə́ joo-joo lé ɔn dɔ rɔ dee ləm tɔ. 24Ma m’oo kaa bag dee gə́ ɓar loo gə́ d’aw njaa lé asəna gə kaa mán-kaw bèe əsé asəna gə ndu Bao-siŋgamoŋ gə́ ɓar, to ndu gə́ ɓar birim-birim to gə́ kaa njérɔje bèe, loo gə́ d’aar naŋg ndá deḛ rəm gə bag dee gə́ naŋg tɔ#LkJ 1.15, 19.6. 25Loo gə́ deḛ d’aar naŋg ləm, rəm gə bag dee gə́ naŋg ləm tɔ ndá, kaa né gə́ ɓar ḭ mee dara gə́ ɔn dɔ dee lad-lad. 26Dɔ dara gə́ tar gə́ ɔn dɔ dee lé né kára to keneŋ tana gə mbal gə́ ɓaree sapir gə́ ndajee gə́ kalimbai, tɔɓəi dɔ né gə́ ndajee gə́ kalimbai lé né teḛ keneŋ asəna gə dəw gə́ d’unda dɔ’g tar ndoi bèe#Ejk 10.1, LkJ 4.2-3. 27Tɔɓəi ma m’oo né gə́ to asəna gə larkas gə́ d’usu d’aree ndɔḭ wər-wər to gə́ pər bèe ndá dəw neelé si danee’g aree ndogó gugu dəa sub, un kudee loo gə́ to asəna gə rḛgee bèe par gə́ tar ləm, gə loo gə́ to asəna gə rḛgee bèe par gə́ naŋg lé ma m’oo né gə́ to asəna gə pər bèe ləm, gə né gə́ ndogó ɔr jol-jol ləm tɔ gugu dəa sub#Ejk 8.2. 28Né gə́ ndogó ɔr jol-jol gə́ gugu dəa sub lé kunda rɔ ləa to asəna gə ŋgaoburandi gə́ teḛ dan kil-lə-ndi ndɔ kər’g lə ndi bèe, yee ɓa to né gə́ ndaji rɔnduba lə Njesigənea̰. Loo gə́ m’oo né neelé ndá m’oso m’dəb kəm naŋg ləm, m’oo ndu dəw gə́ pa ne ta ləm tɔ.

Currently Selected:

Ejekel 1: SBA2015

Highlight

Copy

Compare