Teḛ-Raga 7
7
1Njesigənea̰ ula Moyis pana: Oo, ma m’ari to asəna gə Ala mbata lə Parao̰, ŋgokɔḭ Aaro̰ lé to njekun ta gə́ tai’g kula dəwje tɔ. 2I lé a pa taje lai gə́ m’a kun ne ndum kari lé, tɔɓəi ŋgokɔḭ gə́ Aaro̰ a kun taree ndaji kar Parao̰ mba karee ya̰ ne Israɛlje ar dee d’unda ne loo mee ɓee’g ləa teḛ raga. 3Ma lé m’a kar mee Parao̰ ndər, tɔɓəi m’a kar nétɔjije ləm, gə némɔrije ləm d’ḭ dɔ maree’g gə́ kédé-kédé mee ɓee gə́ Ejiptə#NNk 7.36. 4Parao̰ a koo ta lə sí el. M’a kula jim ndiŋ dɔ Ejiptə’g ndá m’a kar koso-dəwje ləm gə́ to Israɛlje lé d’unda loo mee ɓee gə́ Ejiptə teḛ gə goo rəwta-gaŋgje gə́ boo-boo lé ya. 5Loo gə́ m’ula jim ndiŋ dɔ Ejiptə’g ləm, gə m’ar Israɛlje d’unda loo teḛ dan dee’g ləm tɔ ndá Ejiptəje lé d’a gər gao to gə́ ma lé m’to Njesigənea̰ ya.
6Moyis deḛ gə Aaro̰ ra né gə́ Njesigənea̰ un ne ndia ar dee gə mba kar dee ra lé ndá deḛ ra togə́bè ya. 7Loo gə́ deḛ pata d’ar Parao̰ lé, ləb koji Moyis aḭ rɔ-jinaijoo ləm, ka̰ Aaro̰ kara aḭ rɔ-jinaijoo-giree-munda ləm tɔ.
Parao̰ udu mbia dɔ ta’g lə Moyis gə Aaro̰
8Njesigənea̰ ula Moyis gə Aaro̰ pana: 9Ɓó lé Parao̰ ula sí pana: Raje némɔri arje neḛ n’oo ndá i Moyis lé a kula Aaro̰ pana: Un kag-tɔs ləi, ila naŋg no̰ Parao̰’g. Ndá kag lé a tel to li.
10Moyis gə Aaro̰ d’aw rɔ Parao̰’g tɔɓəi deḛ ra né gə́ Njesigənea̰ un ne ndia ar dee gə mba kar dee ra lé tɔ. Aaro̰ ila kag-tɔs ləa naŋg no̰ Parao̰’g gə no̰ kuraje’g ləa ndá kag lé tel to li ya tɔ. 11Nɛ Parao̰ ula kula ɓar njékəmkàrje gə njésukəm mar deeje ləm tɔ, tɔɓəi njéra némɔrije gə́ Ejiptə lé némɔrije lə dee-deḛ kara ar dee ra togə́bè tɔ. 12Deḛ lai d’ɔm kag-tɔsje lə dee naŋg ndá deḛ tel to lije tɔ. Nɛ kag-tɔs lə Aaro̰ lé turu kag-tɔsje lə dee-deḛ lé mée’g mag-mag ya. 13Mee Parao̰ ndər aree oo ta lə Moyis gə Aaro̰ el, gə goo ta gə́ Njesigənea̰ pa kédé lé tɔ.
Nékɔb gə́ dɔtar: Man gə́ tel məs
14Njesigənea̰ ula Moyis pana: Mee Parao̰ ndər yaa̰, yeḛ mbad kya̰ loo kar dəwje neelé d’aw. 15Aw rɔ Parao̰’g gə ndɔ rad, loo gə́ yeḛ a gə teḛ mba kaw mbɔr mán’g ndá i a teḛ kaar nea̰’g ta baa’g. Tɔɓəi i a kwa kag-tɔs gə́ tel to li kédé lé jii’g kaw ne, 16ndá i a kula Parao̰ pana: Njesigənea̰, Ala lə Ǝbrəje ulam rɔi’g gə mba kam m’ulai m’pana: Ya̰ dəwje lə neḛ ar dee d’aw gə mba kar dee pole neḛ dɔdilaloo’g. Nɛ aa oo, saar ɓasinè i un mbii dɔ’g rəw. 17Togə́bè ɓa Njesigənea̰ pana: Gə né gə́ togə́bè lé i a gər ne to gə́ neḛ n’to Njesigənea̰ ya. Kag-tɔs gə́ to jim’g nee lé m’a kunda ne mán baa ndá manje lé d’a tel to məs#LkJ 16.4. 18Ka̰jije gə́ to mee baa’g lé d’a kwəi ləm, mán baa kara a ndum ləm tɔ, tɔɓəi njé gə́ Ejiptə lé d’a ndiŋga rɔ dee gə mba kai mán baa ya nɛ d’a ndiŋga pi.
19Njesigənea̰ ula Moyis pana: Ula Aaro̰ pana: Un kag-tɔs ləi ndá ula jii ndiŋ dɔ manje’g lə njé gə́ Ejiptə lé dɔ baaje’g lə dee ləm, dɔ kəm-rəw-manje’g lə dee ləm, dɔ duu-manje’g lə dee ləma, gə dɔ kəm-mán-ɓarje’g lə dee ləm tɔ. Manje neelé d’a tel to gə́ məs, tɔɓəi məs lé a to gə looje lai mee ɓee gə́ Ejiptə ya, mee nékaimanje gə́ ra gə kag əsé gə mbal ləm tɔ.
20Moyis deḛ gə Aaro̰ ra né gə́ Njesigənea̰ un ndia dɔ’g mba kar dee ra lé. Aaro̰ un kag-tɔs gə́ tar unda ne mán baa kəm Parao̰’g ləm, gə kəm kuraje’g ləa ləm tɔ, ndá mán baaje lai lé tel to məs. 21Ka̰jije gə́ mee baa’g neelé d’wəi ləm, mán baa kara ndum ləm, njé gə́ Ejiptə d’askəm kai mán baa neelé el ŋga ləma, məs neelé kara to gə looje lai mee ɓee gə́ Ejiptə ləm tɔ.
22Nɛ njéra némɔrije gə́ Ejiptə lé deḛ kara ra togə́bè gə goo némɔrije lə dee tɔ. Mee Parao̰ ndər tɔɓəi yeḛ udu mbia dɔ ta’g lə Moyis gə Aaro̰, gə goo ta gə́ Njesigənea̰ pa kédé lé ya. 23Parao̰ tel aw mee kəi’g ləa, nɛ yeḛ ar ta néje neelé kára kara wa mée el. 24Njé gə́ Ejiptə lai lé d’uru bwa mbɔr baa’g gə mba kiŋga ne mán-kai, mbata d’askəm kai mán baa neelé el.
25Ndɔ dəs siri orè goo ndɔ gə́ Njesigənea̰ unda ne baa lé.
Nékɔb gə́ njekɔm’g joo: Kurkuduje
26Njesigənea̰ ula Moyis pana: Aw rɔ Parao̰’g ndá i a kulá pana: Njesigənea̰ pa bèe pana: Ya̰ dəwje lə neḛ ar dee d’aw mba kar dee pole neḛ. 27Ɓó lé i mbad kya̰ loo kar dee d’aw ndá n’a kunda ɓeeko̰ ləi kar kurkuduje taa loo keneŋ pəl-pəl. 28Baa a teḛ gə kurkuduje gə́ bula dèm-dèm, d’a tal ndá d’a kandə mee kəi-mbai’g ləi ləm, mee kəi-toi’g ləm, dɔ tira-toi’g ləm, mee kəi’g lə kuraje ləi gə ka̰ dəwje lai ləm, mee pilje’g ləi ləma, gə mee birije’g ləi ləm tɔ. 29Kurkuduje neelé d’a tal si dɔi’g ləm, gə dɔ dəwje’g ləi ləma, gə dɔ kuraje’g ləi lai-lai ləm tɔ.
Currently Selected:
Teḛ-Raga 7: SBA2015
Highlight
Share
Copy
Want to have your highlights saved across all your devices? Sign up or sign in
Ngambai Bible © Alliance Biblique du Tchad 1989, 2015.
