Teḛ-Raga 34
34
Bəgərə mbalje gə́ sigi gə́ joo
1Njesigənea̰ ula Moyis pana: I nja gə́ tɔl bəgərə mbalje joo asəna gə njé gə́ kédé lé ndá ta gə́ to bəgərə mbalje gə́ i təd njigi-njigi kédé lé m’a tel ndaŋg gogo ɓəi. 2Wa dɔ gɔl rɔi ndá bèlè gə ndɔ i a kuba dɔ mbal gə́ Sinai, bèe ɓa i a kaar tar nɔm’g dɔ sém mbal’g tar lé tɔ. 3Maji kar dəw kára kara al aw səi na̰’d el ləm, dəw kára kara a teḛ kaar dɔ mbal’g neelé el ləm tɔ, badje gə maŋgje kara d’a ko̰ mu mbɔr mbal’g neelé el tɔ.
4Moyis tɔl bəgərə mbalje joo to gə́ kédé lé ndá yeḛ ḭta gə ndɔ rad ɓa al aw dɔ mbal gə́ Sinai gə goo ndukun gə́ Njesigənea̰ un ne ndia aree tɔɓəi yeḛ odo bəgərə mbalje gə́ joo neelé jia’g tɔ. 5Njesigənea̰ risi uru dan mum’g ree aar mbɔree’g dəb ndá yeḛ ɔr ndia gə́ tar wəl teg ne gin ria gə́ to Njesigənea̰ lé. 6Njesigənea̰ dəs no̰ Moyis’g pa gə ndia gə́ boi wəl pana: Njesigənea̰, Njesigənea̰, Ala gə́ njemeekoso lemsé ləm gə njekookəmtondoo ləm, yeḛ gə́ oŋg ḭ səa kalaŋ el ləma, meemaji gə kankəmta lé yeḛ nja to gə́ babeeje ya ləm tɔ#Tr 20.5-6, BI 14.18, TtG 5.9-10, 7.9-10, 7meenoji ləa to saar-saar mbata lə ŋgaka deeje gə́ tɔl-dɔg-loo kára ləm, yeḛ ar mée oso lemsé dɔ deḛ gə́ néra dee to gə goo rəbee el ləm, gə dɔ njékal dɔ godnduje ləma, gə dɔ kaiya ra dee’g ləm tɔ, nɛ dəw gə́ ta wa dəa mba̰ lé yeḛ a kée gə́ njegelgodo el ləm, a kar bo̰ néra gə́ gə goo rəbee el lə bɔ ŋganje ɔs ta ŋgan deeje’g ləm, gə ŋgan meḛ ŋgan deeje ləm tɔ saar teḛ ne dɔ ŋgakadɔg deeje’g loo munda əsé loo sɔ bèe ya.
8Léegəneeya Moyis rəm yèm gə́ naŋg ləm, yeḛ unda barmba ləm tɔ. 9Yeḛ pana: Mbaidɔmbaije, ɓó lé ma m’taa kəmi rəgm ndá ma m’ra ndòo rɔi’g mba kari orè sə sí rəw na̰’d més mbata dəwje neelé to njégwɔbkelkwɔije ya, ar məəi oso lemsé dɔ néra sí gə́ gə goo rəbee’g el ləm, gə dɔ kaiya ra síjeḛ’g ləm tɔ ndá wa sí gə́ rɔi’g gə́ nédɔjije ləi ya.
Manrɔ gə́ njekɔm’g gɔl joo
10Njesigənea̰ ilá keneŋ pana: Aa oo, manrɔ ləm-ma ɓa nee: Némɔrije gə́ m’a gə ra kəm koso-dəwje’g ləi lai lé dəw oo garee mee ɓee gə́ raŋg’d kára kara el ləm, əsé mbuna ginkoji dəwje’g kára kara el ləm tɔ, dəwje lai gə́ gugu dɔi sub lé d’a koo kula ra Njesigənea̰ mbata né gə́ to ɓəl yaa̰ gə́ m’a gə ra sə sí lé#Tr 23.14-19, TtG 7.1-5, 16.1-17.
11Unda kəmkàr dɔ rɔi’g dɔ né gə́ m’un ne ndum ɓogənè m’ari mba kari ra lé. Aa oo, m’a tuba Amɔrje, gə Kana̰je, gə Hetje, gə Peresje, gə Hebje, gə Yebusje nɔḭ’g ya. 12Məəi dɔ rɔi’g mba kari mán rɔi gə mba kɔm na̰’d gə njéɓeeje gə́ i a gə kandə mbuna dee’g lé nà d’a tel to gə́ gum kwai tɔ. 13Né gə́ kəm ra ɓa to nee: Seḭ a tɔsje loo-nékinjanéməsje lə dee tilaje ləm, a tədje néje lə dee gə́ tɔl gə́ néndajije ləma, a janéje magəje lə dee ləm tɔ#TtG 16.21. 14Seḭ a kundaje barmba no̰ magə’d el, mbata Njesigənea̰ lé ria lə kəmkəḭ ləm, yeḛ to Ala gə́ kəmee əḭ dɔ koso-dəwje’g ləa ləm tɔ. 15Meḛ sí dɔ rɔ sí’g mba kar sí manje rɔ sí gə mba kɔm na̰’d gə njéɓeeje neelé, nà loo gə́ deḛ pole magəje lə dee d’inja néməs d’ar dee ndá d’a ɓar sí ɓar nésɔ mba kar sí sɔje néje gə́ deḛ d’inja dee gə́ məs lé tɔ, 16nà banelə seḭ a taaje ŋgan deeje gə́ dené kar ŋgan síje gə́ diŋgam ndá ŋgan deeje gə́ dené lé loo gə́ d’ya̰ rɔ dee dan néje gə́ mina̰’g d’ar magəje lə dee lé d’a ndɔr ŋgan síje gə́ diŋgam kar dee-deḛ kara d’ya̰ rɔ dee dan néje gə́ mina̰’g d’ar magəje lə dee lé tɔ.
17Seḭ a lḛ̀je lar ndajije né magə lə sí el#Tr 20.4, Ləb 19.4, TtG 5.8, 27.15.
18Seḭ a tɔsje kəm sí dɔ naḭ gə́ wɔji dɔ muru gə́ əm-tiné godo keneŋ lé, as ndɔ sí siri, mee ndɔje gə́ d’wɔji mee naḭ Abib’g lé seḭ a ko̰je muru gə́ əm-tiné godo keneŋ to gə́ ma m’un ne ndum m’ar sí lé mbata mee naḭ Abib’g lé ɓa seḭ undaje ne loo mee ɓee gə́ Ejiptə teḛje ya#Tr 12.14-20, Ləb 23.6-8, BI 28.16-25.
19Ŋgandər dəwje lai-lai lé to kamaje ya, dan nékulje’g lə sí lai lé, yee gə́ rara gə́ d’ojee dɔtar lé, lé to bɔ maŋg əsé bàl badə kara to kama ya tɔ#Tr 13.2. 20Ŋgondər mulayḛ̀je lé seḭ a kogaje dəa gə ŋgon badə. Ɓó lé seḭ a kogaje dəa el ndá seḭ a tədje gina gwɔbee ya. Seḭ a kogaje dɔ ŋgandər ŋgan síje gə́ diŋgam lai ya: dəw kára kara a teḛ kaar nɔm’g gə jia kari kari-kari el#Tr 13.13.
21Seḭ a raje kula ndɔ sí misa̰ ndá ndɔ gə́ njekɔm’g siri lé seḭ a kwaje rɔ sí, lé to naḭ ndɔ əsé naḭ kinja kó kara seḭ a kwaje rɔ sí keneŋ ya#Tr 20.9-10, 23.12, 31.15, 35.2, Ləb 23.3, TtG 5.13-14.
22Seḭ a raje naḭ gə́ wɔji dɔ ndɔje gə́ siri-siri gɔl siri loo kinja dɔ kó gə́ dɔtar ləm, gə naḭ kinja kó gə́ to rudu ləb lé ləm tɔ#Ləb 23.15-21,39-43, BI 28.26-31.
23Gɔl munda-munda mee ləbje kára-kára lé diŋgamje lai d’a teḛ kaar no̰ Njesigənea̰ Ala lə Israɛlje’g. 24Mbata m’a tuba ginkoji dəwje gə raŋg no̰ sí’g ləm, m’a kila tad dɔ naŋg ɓee lə sí maree’g ləm tɔ, bèe ɓa loo gə́ seḭ a tugaje loo kawje gə mba kaarje no̰ Njesigənea̰ Ala’g lə sí gɔl munda-munda mee ləbje kára-kára lé ndá dəw kára kara a ra kəmkəḭ dɔ ɓee’g lə sí el.
25Muru gə́ əm-tiné to keneŋ lé seḭ a reeje ne na̰’d gə məs nékul gə́ seḭ injaje gə́ məs ulaje ne rɔnduba dɔm’g lé el, nékinjaməs gə́ ka̰ ra naḭ Pag lé seḭ a ŋgəmeeje loondul’g saar kar loo àr dɔ’g el tɔ#Tr 12.10. 26Dɔ kó gə́ dɔtar gə́ seḭ iŋgaje mee ndɔ’g lə sí lé seḭ a reeje ne kəi lə Ala lə sí gə́ Njesigənea̰ ya. Seḭ a ndirije ŋgon bya̰ gə mbà kea̰je el#TtG 14.21, 26.2.
27Njesigənea̰ ula Moyis pana: Maji kari ndaŋg taje neelé, mbata to gə goo taje gə́ neelé ɓa ma mán ne rɔm m’ari-i gə Israɛlje.
28Moyis nai rɔ Njesigənea̰’g ndəa rɔ-sɔ dan kàrá gə loondul’g. Yeḛ o̰ muru el ləm, yeḛ ai mán el ləm tɔ. Njesigənea̰ ndaŋg ta manrɔ dɔ bəgərə mbalje’g, to godnduje gə́ dɔg lé ya.
Moyis ḭ dɔ mbal’g risi ur naŋg
29Moyis ḭ dɔ mbal gə́ Sinai risi ur naŋg ndá bəgərə mbalje gə́ joo gə́ ka̰ kɔrgoota lé to jia’g loo gə́ yeḛ risi uru naŋg lé, kwɔji gə́ Moyis wɔji ta gə Njesigənea̰ lé ar dɔ kəmee ndɔḭ ne wər-wər nɛ yeḛ gər el tɔ#2Kɔr 3.7-16. 30Aaro̰ gə Israɛlje lai d’aa kəm Moyis ndá aa oo, dɔ kəmee ndɔḭ wər-wər, togə́bè ɓa deḛ ɓəl ɓó rəm pər gə́ rəa’g el. 31Moyis ɓar dee, ndá Aaro̰ gə mbaije lə koso-dəwje lai lé d’aw rəa’g ɓa yeḛ ula dee ta ɓəi. 32Gée gə́ gogo Israɛlje lai rəm pər gə́ rəa’g ndá yeḛ ar dee ndukunje lai gə́ yeḛ taa ta Njesigənea̰’g dɔ mbal gə́ Sinai’g lé tɔ.
33Loo gə́ Moyis tɔl ta gə́ ula dee lé bém mba̰ ndá yeḛ wa kubu on ne kəmee tɔ. 34Loo gə́ Moyis aw aar no̰ Njesigənea̰’g gə mba kulá ta ndá yeḛ wa kubu gə́ on ne kəmee lé ɔr saar yeḛ unda ne loo teḛ raga, tɔɓəi loo gə́ yeḛ teḛ raga mba̰ ndá yeḛ ula Israɛlje taje lai gə́ Ala un ne ndia aree lé tɔ. 35Israɛlje lé d’aa kəm Moyis d’oo ndá, deḛ d’oo to gə́ kəmee lé ndogó jol-jol, bèe ɓa Moyis wa kubu lé tel ɔn ne kəmee gogo saar yeḛ tel aw ne mba kwɔji ne ta gə Njesigənea̰ gogo ɓəi.
Currently Selected:
Teḛ-Raga 34: SBA2015
Highlight
Share
Copy
Want to have your highlights saved across all your devices? Sign up or sign in
Ngambai Bible © Alliance Biblique du Tchad 1989, 2015.
