Teḛ-Raga 28
28
Kubu kula njékinjanéməsje
1Maji kari ar ŋgokɔḭ Aaro̰ gə ŋganeeje gə́ diŋgam rəm pər gə́ rɔi’g ndá ɔr dee mbuna Israɛlje’g mba kunda dee gə kəmee gə mba karee ra kula gə́ wɔji dɔ nékinjaməs kam. Aaro̰ gə ŋganeeje gə́ diŋgam gə́ Nadab, gə Abihu, gə Eləajar, gə Itamar tɔ. 2I a ra kubuje gə́ to gə kəmee mbata lə ŋgokɔḭ Aaro̰ mba kula ne rɔnduba dəa’g ləm, mba kundá ne gə kəmee ləm tɔ. 3I a kula deḛ lai gə́ to njégosokulaje lé, deḛ gə́ m’ar ndil gə́ ka̰ gosonégər rusu meḛ dee lé, deḛ nja d’a ra kubuje lə Aaro̰ gə mba kundá ne gə kəmee kam ləm, gə mba karee ra ne kula gə́ wɔji dɔ nékinjaməs kam ləm tɔ. 4Aa oo, kubuje gə́ d’a ra ɓa to nee: ɓɔl kubu gə́ tɔ kaar dee’g ləm, épod ləm, kubu gə́ ŋgal yududu ləm, gə kubu gə́ gel maree’d gə́ d’ɔs gə ŋgaŋgee béréré-béréré ləm, gə dɔgugu ləma, gə gagəra ləm tɔ. D’a ra kubuje gə́ to gə kəmee mbata lə ŋgokɔḭ Aaro̰ gə ŋganeeje gə́ diŋgam mba kar dee ra ne kula gə́ wɔji dɔ nékinjaməs lé kam. 5Kubuje neelé d’a ra gə kubu gə́ d’ṵji gə kúla palégal gə́ sorè ləma, gə kúla gə́ ra gə larlɔr ləm tɔ.
Kubu épod
6D’a ra kubu épod lé gə kúla gə́ ra gə larlɔr ləm, gə kúla gə́ ndul piro-piro gə́ kas gəḭ gə kas njir-njir ləma, gə kubu gə́ ra gə kúla palégal gə́ sorè ləm tɔ: d’a kɔsee gə ŋgaŋgee béréré-béréré ləm tɔ. 7D’a ra kubu gə́ ka̰ kula dɔ bageeje’g joo mba kwa ne teaje gə́ joo na̰’d, bèe ɓa d’a kwa ne na̰’d kára ba ya. 8Gagəra lé d’a ra asəna gə épod bèe ləm, d’a tɔ dɔ’g ləm tɔ, d’a ra gə kúla larlɔr ləm, gə kúla gə́ ndul piro-piro gə kas gəḭ gə kas njir-njir ləma, gə kúla palégal gə́ sorè ləm tɔ. 9D’a kodo jər onikis joo ndá d’a kinja ri Israɛlje gə́ diŋgam keneŋ. 10Ri dee-deḛ gə́ misa̰ lé a kinja dɔ jər gə́ kára’g ləm, ri deḛ gə́ misa̰ gə́ raŋg lé a kinja dɔ jər gə́ njekɔm’g joo’g ləm tɔ gə goo koji dee gə́ d’orè ne goo na̰ bèe ya. 11D’a kinja ri Israɛlje gə́ diŋgam dɔ jərje gə́ joo’g lé to gə́ ra ne nétorjije bèe ləm tɔ, d’a ra néməmə dɔ jərje’g lé gə larlɔr gə mba kwa dee ne na̰’d. 12D’a tula jərje gə́ joo neelé dɔ kubu gə́ dɔ bag épod’d gə mba karee to nékolé-mee dɔ Israɛlje’g, bèe ɓa a to asəna gə nékolé-mee bèe gə́ Aaro̰ a kodo ne ri dee no̰ Njesigənea̰’g dɔ bageeje’d gə́ joo’g lé. 13D’a ra néməməje dɔ jərje’g gə larlɔr gə́ mba kwa dee ne ləm, 14gə yeŋgəreje joo gə́ ra gə larlɔr gə́ àr ŋgad-ŋgad gə́ d’unda dee kəm na̰’d asəna gə kúla bèe ləm tɔ ndá yeŋgəreje gə́ d’unda dee kəm na̰’d lé a tuga dɔ néməmə jərje’g lé tɔ.
15D’a ra ɓɔl kubu gə́ tɔ kaar dee’g gə́ ka̰ gaŋg-rəwta gə́ d’a kɔsee gə ŋgaŋgee béréré-béréré tɔ, d’a ra to gə́ épod bèe ya, d’a rəa gə kúla gə́ ra gə larlɔr ləm, gə kúla gə́ ndul piro-piro, gə kas gəḭ, gə kas njir-njir ləma, gə kubu kúla palégal gə́ sorè ləm tɔ. 16Ɓɔl kubu gə́ tɔ kaar dee’g neelé a to dɔmbul ləm, a to kubuje joo gə́ d’unda dee na̰’d ləm tɔ, ŋgalee a kas tad mbuna ko̰ ji dəw gə ŋgon jia gə́ rudu kára ləm, tadee kara a kas tad mbuna ko̰ ji dəw gə ŋgon jia gə́ rudu kára ləm tɔ. 17D’a tɔs néməmə jərje dɔ kubu’g neelé ndá d’a tula jərje keneŋ goo na̰’d ŋgen-ŋgen loo sɔ, rəbee gə́ dɔtar a to jərje gə́ ri dee lə sardoinə, gə topajə, gə emerodə, 18rəbee gə́ njekɔm’g joo a to eskarbuklə, gə sapir, gə diama̰, 19rəbee gə́ njekɔm’g munda a to opal, gə agatə, gə ametistə, 20rəbee gə́ njekɔm’g sɔ a to krijɔlitə, gə onikis, gə jaspə. Jərje neelé d’a kwa dee gə néməmə deeje gə́ ra gə larlɔr lé. 21Jərje neelé d’a kas dɔg-gir-dee-joo gə goo ri Israɛlje gə́ diŋgam tɔ, d’a tḭja dee to gə́ tḭja ne nétorjije bèe, jər kára wɔji dɔ gin koji Israɛl kára-kára bèe ya saar as gin dee gə́ dɔg-gir-dee-joo lé.
22D’a ra kúla yeŋgəreje gə larlɔr gə́ àr ŋgad-ŋgad ndá d’a kunda dee kəm na̰’d to gə́ kúla bèe mbata lə ɓɔl kubu gə́ tɔ kaar dee’g. 23D’a léḛ larlɔr gə́ ra gə́ ŋgamaje joo mbata lə ɓɔl kubu gə́ tɔ kaar dee’g neelé ndá d’a t’ula ŋgamaje gə́ joo neelé dɔ kum ɓɔl kubu gə́ tɔ kaar dee’gje gə́ joo gə́ tar ya. 24D’a kula kúla yeŋgəre gə́ ra gə larlɔr joo mee ŋgamaje gə́ joo gə́ to dɔ kum ɓɔl kubu gə́ tɔ kaar dee’gje gə́ joo neelé, 25Ta kúla yeŋgəreje gə́ joo neelé d’a tuga dee ta néməmə dɔ jərje’d gə́ joo gə́ d’wa dɔ bag épod lé gə́ par gə́ nea̰’g kédé. 26D’a léḛ larlɔr gə́ ra gə́ ŋgamaje gə́ raŋg joo ndá d’a tula dee dɔ kum ɓɔl kubu gə́ tɔ kaar dee’gje’d gə́ joo gə́ to mée’g kəi gə́ wa dɔ épod par gə́ tar. 27D’a léḛ larlɔr gə́ ra gə́ ŋgamaje joo gə́ raŋg gə mba tuga gin kubu’g dɔ bag épodje gə́ joo’g ləm, no̰ kubu’g loo gə́ ta dee iŋga na̰ keneŋ par gə́ dɔ gagəra’g ləm tɔ. 28D’a tuga ŋgamaje lə ɓɔl kubu gə́ tɔ kaar dee’g gə ŋgamaje lə épod na̰’d gə kúla kubu gə́ ndul piro-piro bèe mba kar ɓɔl kubu gə́ tɔ kaar dee’g to ne tar dɔ gagəra’g lə épod ləm, gə mba karee ya̰ ne épod yag el ləm tɔ.
29Loo gə́ Aaro̰ a kandə loo gə́ to gə kəmee’g ndá yeḛ a kodo ne ri Israɛlje gə́ diŋgam dɔɓəŋgəree’g, ri dee gə́ d’inja dɔ ɓɔl kubu gə́ tɔ kaar dee’g gə́ ka̰ gaŋg rəwta’g lé, a ra togə́bè mba karee to ne nékolé mee no̰ Njesigənea̰’g ta-ta. 30D’a tula urim gə tumim mee ɓɔl kubu gə́ tɔ kaar dee’g gə́ ka̰ gaŋg rəwta’g lé ndá d’a to dɔɓəŋgərə Aaro̰’g loo gə́ yeḛ a gə teḛ kaar no̰ Njesigənea̰’g. Togə́bè ɓa Aaro̰ a kodo ne rəwta-gaŋg gə́ wɔji dɔ Israɛlje dɔɓəŋgəree’g loo gə́ yeḛ a teḛ kaar no̰ Njesigənea̰’g lé#BI 27.21, TtG 33.8, Esd 2.63, Neh 7.65.
Kubuje gə́ raŋg gə́ to gə kəmee
31D’a ra kubu gə́ ŋgal yududu gə́ wɔji dɔ épod lé ndá a to kubu gə́ ndul piro-piro ya goo kára ba. 32D’a ra kəmee gə́ askəm kula dɔ dəw keneŋ loo gə́ dana bab ndá d’a kɔs təa gə kúla lar karee ndər kiŋ-kiŋ mba k’ar kubu neelé a til ne el. 33Gel kubu’g par gə́ bər neelé d’a ndaji né asəna gə kandə dḭ bèe gə́ ndul piro-piro, gə kas gəḭ, gə kas njir-njir ndá ŋgan ma̰dje gə́ ra dee gə larlɔr d’a gaŋg mbuna dee mbuna dee. 34Ŋgon ma̰də gə́ ra gə larlɔr kára ləm, gə kandə dḭ kára ləm tɔ, gugu ne dɔ gel kubu gə́ ŋgal yududu neelé sub. 35Aaro̰ a kula kubu neelé rəa’g loo gə́ yeḛ aw gə mba ra kula, ndá loo gə́ yeḛ a kandə loo gə́ to gə kəmee’g no̰ Njesigənea̰’g əsé loo gə́ yeḛ a k’unda loo teḛ raga kara d’a koo kaa ma̰dje gə́ ɓar ləm, yeḛ a kwəi ne el ləm tɔ.
36D’a léḛ larlɔr gə́ àr ŋgad-ŋgad ndá d’a tḭja né keneŋ to gə́ tḭja ne nétorjije bèe pana: TO GƎ KƎMEE KAR NJESIGƎNEA̰. 37D’a tɔ mbɔr neelé gə kúla gə́ ndul piro-piro dɔ dɔgugu’g, no̰ dɔgugu gə́ kédé ɗao. 38Mbɔr lé to ŋgono̰ Aaro̰’g mba kar Aaro̰ taa ne ta kaiya ra Israɛlje dəa’g loo gə́ yeḛ odo nékarje lə deḛ lai gə́ to gə kəmee aar ne, mbɔr lé a tɔ ŋgonea̰’g ta-ta no̰ Njesigənea̰’g mba kar Njesigənea̰ wa dee ne gə́ rəa’g.
39D’a ra kubu gə́ dɔ maree’d gə kúla palégal, d’a ra dɔgugu gə kubu kúla palégal tɔ, tɔɓəi d’a ra gagəra gə́ d’ɔs gə ŋgaŋgee béréré-béréré ya tɔ.
40D’a ra kubuje gə́ dɔ maree’g mbata ŋgalə Aaro̰ gə́ diŋgam ləm, d’a ra gagəraje ləma, gə jɔgje ləm tɔ, gə mba kula ne rɔnduba dɔ dee’g ləm, kunda dee ne gə kəmee ləm tɔ.
41I Moyis a kula kubuje neelé rɔ ŋgokɔḭ Aaro̰’d gə rɔ ŋganeeje gə́ diŋgam’g səa na̰’d. D’a kwa dɔ dee gə ubu ləm, i a kɔr dee kunda dee ɓəd mbata lə Ala ləma, i a kunda dee gə kəmee doi ləm tɔ ndá d’a si gə mba ra kula gə́ wɔji dɔ nékinjaməs lé kam ya. 42Maji kari ra kubu bulaa gə kubu gə́ d’ṵji gə palégal mbata lə dee mba karee ɔn dɔ rɔ dee ndá kubu neelé a kḭ reŋ dee’g kaw njal teḛ biŋ dee’g tɔ. 43Aaro̰ gə ŋganeeje gə́ diŋgam d’a kula kubuje neelé rɔ dee’g loo gə́ d’a kandə mee kəi-kubu-si-Ala’g əsé loo gə́ d’a rəm pər gə́ loo-nékinjaməs’g mba ra kula gə́ wɔji dɔ loo gə́ to gə kəmee, togə́bè ɓa d’a kar ta wa ne dɔ dee el ləm, d’a kwəi ne el ləm tɔ. Yee neelé to godndu gə́ a to gə no̰ mbata lə Aaro̰ gə ŋgakadɔgeeje tɔ.
Currently Selected:
Teḛ-Raga 28: SBA2015
Highlight
Share
Copy
Want to have your highlights saved across all your devices? Sign up or sign in
Ngambai Bible © Alliance Biblique du Tchad 1989, 2015.
