Este 5

Este aw rɔ mbai’g lé

1Ndɔ gə́ njekɔm’g munda lé Este ula kubu-mbai rəa’g ndá aw aar ne mee gadloo’g mee kəi’g lə mbai, no̰ kəi’g lə mbai. Mbai lé si dɔ kalimbai ko̰ɓee’g ləa mee kəi-mbai’g no̰ loo kandə kaw mee kəi’g. 2Loo gə́ mbai oo Este, dené ləa gə́ aar tar gadloo’g lé ndá yeḛ taa kəmee rəgm. Yen ŋga mbai ula kag-mbai gə́ ra gə larlɔr gə́ to jia’g lé ndiŋ wɔji ne dɔ Este. Este aw pər gə́ kédé aw ɔrɔ rɔ gel kag-mbai neelé. 3Mbai lé dəjee pana: Este, see ɗi ɓa i ndigi wa, əsé see ɗi ɓa i dəji wa. Ɓó lé to gə́ dəb ɓeeko̰ kara m’a kari ya.

4Este tel ilá keneŋ pana: Ɓó lé mbai oo gə́ né gə́ maji kəm ra ndá maji kar mbai ree ɓogənè gə Aman loo muru-gad gə́ m’gɔl gə mbata ləa lé ya.

5Yen ŋga mbai pana: Awje ɓasinè ya aw saŋgje Aman to gə́ Este pa lé. Togə́bè ɓa mbai gə Aman ree loo muru-gad gə́ Este gɔl lé tɔ. 6Loo gə́ deḛ d’o̰ né lai mba̰ ndá mbai dəji Este pana: Né gə́ i dəji lé see to ɗi wa. M’a kari ya. See ɗi ɓa i ndigi wa. Ɓó lé to gə́ dəb ɓeeko̰ kara m’a kari ya.

7Este tel ilá keneŋ pana: Aa oo, né gə́ m’dəji gə né gə́ m’ndigi lé ɓa nee: 8Ɓó lé m’taa kəm mbai rəgm ləm, ɓó lé rɔ mbai lelee gə mba ndigi səm dɔ nédəji’g ləm gə mba kam né gə́ m’ndigi ləm tɔ ndá maji kar mbai gə Aman ree loo muru-gad gə́ m’a gə gɔl mbata lə dee lé ndá bèlè ɓa m’a tel kila mbai keneŋ gə goo ndukun ləa ɓəi.

Aman saŋg loo mba kar Mardose udu

9Aman teḛ raga mee ndəa’g neelé gə rɔlel gə meendakaḭ. Nɛ loo gə́ yeḛ oo Mardose tarəwkɔg’d lə mbai nɛ Mardose lé ḭta el ləm, ndəb yèr nea̰’g el ləm tɔ ndá oŋg ti mée paŋ-paŋ dəa’g. 10Lé bèe kara yeḛ udu oŋg mée’g ɔd aw kəi ləa. Tɔɓəi yeḛ ula kula ɓar baokuraje ləa ləm, gə Jeres, dené ləa ləm tɔ. 11Aman tura goo nébaoje ləa gə́ bə̰dərə bə̰ ləm, gə bula lə ŋganeeje gə́ diŋgam ləma, gə néje lai gə́ mbai ra ula ne dɔmoŋ dəa’g aree to gə́ ŋgaw-ta ŋgan-mbaije gə kuraje lə mbai ləm tɔ ar dee d’oo.

12Tɔɓəi yeḛ ila ta kára keneŋ pana: Ma nja kára ba ɓa Este, dené lə mbai ɓarm gə mbai na̰’d loo muru-gad gə́ yeḛ gɔl lé tɔɓəi yeḛ ɓarm gə mba kam m’aw kəi ləa bèlè gə mbai na̰’d ya ɓəi tɔ. 13Nɛ néje neelé ma m’oo gə́ né gə́ kari ba kəm’g loo gə́ m’oo Mardose gə́ to Jip gə́ si tarəwkɔg’d lə mbai lé.

14Jeres gə́ dené ləa, gə baokuraje ləa lai d’ulá pana: Maji kari ar dee gɔl kag d’ar ŋgalee as kəmkil dəw rɔ-mi ndá bèlè gə ndɔ maji kari dəji mbai gə mba kar dee ɗar Mardose dɔ’g. Yen ɓa i a kaw gə rɔlel gə mbai lé ɓəi.

Currently Selected:

Este 5: SBA2015

Highlight

Copy

Compare