Njé gə́ Epesə 2
2
Noji ɓa j’ajije ne
1Seḭ wəije yoo-kalta lə sí ləm gə yoo-kaiyaje#Kol 2.13 2gə́ seḭ ya̰je rɔ sí keneŋ yag kédé loo gə́ seḭ taaje kila gɔl dəwje gə́ dɔ naŋg nee, ndolèje ne goo mbai gə́ njeko̰ɓee gə́ pən dara gə́ to ndil gə́ ra kula ɓasinè meḛ njékaltaje’g lé ləm tɔ. 3Jeḛ lai kara j’ɔm sə dee na̰’d tɔ ndá kédé lé jeḛ n’tɔlje ne mal né gə́ ra darɔ sí bém ləm, n’raje ne né gə́ darɔ sí gə meḛ sí ɓa wɔji ləma, n’toje ne ŋganje gə́ oŋg ɓa wɔji dɔ sí to gə́ njé gə́ raŋg lé ləm tɔ.
4Nɛ Ala gə́ to bao-meekɔrjol lé boo-meenoji ləa aree unda sí ne dan kəmee’g 5ɓa loo gə́ jeḛ j’wəi yoo-kalta lə sí lé ɓəi ndá yeḛ ar sí n’tel j’isi kəmba gə Kristi na̰’d (noji ɓa seḭ ajije ne.) 6Mbɔl dɔ Kristi lé yeḛ ar sí j’unda loo teḛ loo-yoo’g na̰’d ar sí j’isi ne səa na̰’d loo gə́ dara. 7Meemaji gə́ yeḛ ra sə síjeḛ gə́ j’ɔm na̰’d gə Jeju Kristi lé yeḛ nduba ne noji ləa gə́ dum dɔ loo gə́ raga, gə ləbee-ləbee saar gə no̰. 8Tɔgərɔ ya, noji ɓa seḭ ajije ne goo meekun’g lə sí. To né gə́ Ala ɓa ar sí ɓó to né gə́ ḭ rɔ sí-seḭ’g el. 9To kula ra dəw ɓa el, bèe ndá dəw kára kara a nduba ne rəa el. 10Mbata jeḛ gə́ j’ɔm na̰’d gə Kristi lé jeḛ n’toje nékundaje lə Ala gə́ yeḛ unda sí mba kar sí n’ra ne néraje gə́ maji gə́ Ala nja wa dəa gɔl-gɔl kédé mba kar sí n’raje.
Kag-dəs lé ɔm Jibje gə njépole-magəje na̰’d
11Bèe ndá arje meḛ sí olé dɔ ta nee: Seḭ gə́ kédé toje njépole-magəje gə goo darɔ sí ar deḛ gə́ d’inja tamɔd dee lé ɓar sí njélal kinja tamɔd deeje mbata ji dəw ɓa goré tamɔd dee-deḛ lé 12mee ndəaje’g neelé seḭ lalje Kristi ləm, d’ɔg sí loo ra ɓee mee ɓee gə́ Israɛl ləm, ndukun gə́ Ala ar dee lé seḭ toje njékwagireeje ləm, nékunda-mee-yel dɔ’g lə sí godo ləma, Ala kara seḭ toje njékwagireeje ya ləm tɔ. 13Nɛ mbɔl dɔ Jeju Kristi ɓa seḭ gə́ ləw lé seḭ sije ne ŋgərəŋ lé ɓasinè məs Jeju Kristi ɓa rəm sə sí wər gə́ rəa’g. 14Mbata yeḛ nja gə́ njegɔl sí kɔm sí na̰’d, yeḛ nja ɓa wa sí joo bɔr orè sí na̰’d ləm, ndògo gə́ kai sí dana lé yeḛ unda naŋg rab, udu ne kəm ba̰ lə sí lé ləm tɔ. 15Dakasrea-yeḛ ɓa yeḛ wa gaŋg ne rəw godndu gə́ ndukunje gə tornduje tɔ keneŋ mba kunda ne koso-dəwje gə́ kudu joo lé kar dee d’ɔm na̰’d to ne gin dəw gə́ sigi kára ba ginee-yeḛ’g ya#Kol 2.14. 16Kag-dəs ləa ɓa yeḛ orè dee ne na̰’d joo bɔr ar dee to ne dəwje gə́ gin kára ba gə́ d’ɔm na̰’d gə Ala lé ləm, yeḛ udu ne kəm ba̰ lə dee jigi ləm tɔ#Kol 1.20. 17Yeḛ ree ila mber ta gə́ wɔji dɔ kɔm na̰’d yəg ar sí-seḭ gə́ sije ŋgərəŋ ləm, gə deḛ gə́ d’isi dəb lé ləm tɔ#Esa 57.19. 18Mbata mbɔl dəa ɓa jeḛ joo bɔr jeḛ j’oo ne loo kaw pər gə́ rɔ Bɔ síje’g gin Ndil’g loo kára ba tɔ.
19Bèe ndá seḭ toje njékwagirlooje el ŋga ləm, seḭ toje gə́ raga ga̰dəra el ləm tɔ. Nɛ seḭ toje gə́ kojikəije gə njémeendaje na̰’d ləm, seḭ toje kojikəije lə Ala ləm tɔ. 20Seḭ toje kəi gə́ deḛ rɔd dɔ njékaḭkulaje gə njéteggintaje gə́ to gin kəi ləm, Jeju Kristi lé to mbal gə́ moŋg kəi gə́ d’unda ne dɔ kum kəi lé ləm tɔ. 21Mbɔl dəa ɓa kəi gə́ rɔd ta na̰’d to ne tar gəd-gəd mba to ne kəi-si Ala gə́ to gə kəmee gin Mbaidɔmbaije’g lé. 22Seḭje kara yeḛ rɔd sí ta na̰’d ar sí toje ne tar gəd-gəd mba kar sí toje kəi gə́ Ndil Ala a si keneŋ tɔ.
Currently Selected:
Njé gə́ Epesə 2: SBA2015
Highlight
Share
Copy
Want to have your highlights saved across all your devices? Sign up or sign in
Ngambai Bible © Alliance Biblique du Tchad 1989, 2015.
