Njekillamber 3
3
Néje lai lé ndɔ gə́ wɔji dɔ dee dɔ dee to keneŋ
1Néje lai lé dɔkurloo gə́ wɔji dɔ dee dɔ dee to keneŋ ləm, néje lai dɔ naŋg neelé kara kàree gə́ wɔji dɔ dee dɔ dee to keneŋ ləm tɔ. 2Ndɔ koji dəw to keneŋ ləm, ndɔ kwəi lə dəw to keneŋ ləm tɔ, ndɔ dubu né to keneŋ ləm, ndɔ tɔr né gə́ dubu lé to keneŋ ləm tɔ, 3ndɔ tɔl dəwje to keneŋ ləm, ndɔ kaji dəwje to keneŋ ləm tɔ, ndɔ tɔ kəi to keneŋ ləm, ndɔ tel kunda kəi gogo to keneŋ ləm tɔ. 4Ndɔ no̰ to keneŋ ləm, ndɔ kogo to keneŋ ləm tɔ, ndɔ ndiŋga-rɔ to keneŋ ləm, ndɔ ndam to keneŋ ləm tɔ. 5Ndɔ tila kɔri-ərje to keneŋ ləm, ndɔ mbo̰ kɔri-ərje dɔ na̰’d to keneŋ ləm tɔ. Ndɔ kwa na̰ sud to keneŋ ləm, ndɔ kɔs na̰ rəw to keneŋ ləm tɔ . 6Ndɔ saŋg né to keneŋ ləm, ndɔ kar né igi to keneŋ ləm tɔ, ndɔ ŋgəm né to keneŋ ləm, ndɔ kila né kɔrɔ to keneŋ ləm tɔ, 7ndɔ til né to keneŋ ləm, ndɔ kuru né to keneŋ ləm tɔ. Ndɔ sí dɔ-mundu to keneŋ ləm, ndɔ pata to keneŋ ləm tɔ. 8Ndɔ ndigi na̰ to keneŋ ləm, ndɔ kḛji na̰ bəḭ-bəḭ to keneŋ ləm tɔ, ndɔ rɔ to keneŋ ləm, ndɔ si gə meelɔm to keneŋ ləm tɔ.
9See ɗi ɓa gə́ nédɔji gə́ dəw gə́ ra kula a kiŋga loo kula rɔ ndubu’g ləa lé wa . 10Ma m’oo kula gə́ wɔi gə́ Ala unda dɔ dəwje’g ar dee ra lé ya. 11Yeḛ ra néje lai ar dee maji mee ndɔje’d gə́ wɔji dɔ dee dɔ dee, yeḛ ar takə̰ji si kəmba gə no̰ kara to meḛ dee’g, nɛ lé bèe kara dəw lé askəm gər né gə́ Ala ra kédé gə́ dɔtar saar ndɔ gə́ rudu lé el. 12Ma m’gər gao to gə́ né gə́ raŋg gə́ a lel dee yaa̰ kunda k’ya̰ rɔ dee yag dan kal rɔ dee’g ləm, gə dan si maji’g loo gə́ d’isi ne kəmba dɔ naŋg nee lé godo ya. 13Nɛ ɓó lé dəw sɔ gə ai al ne rəa dɔ si dan maji’g loo-kulaje’g ləa gə́ yeḛ ra lé ndá yee neelé to nénoji gə́ Ala ɓa aree ya. 14Ma m’gər gao néje lai gə́ Ala ra dee lé d’a to saar gə no̰ ya, né kára gə́ gə mba kila dɔ’g godo ləm, né kára gə́ gə mba kɔr keneŋ godo ləm tɔ. Bèe ɓa Ala ra togə́bè gə mba kar dəwje d’oso ne kul nea̰’g ya. 15Né gə́ to keneŋ ɓasinè lé to keneŋ kédé mba̰ ya ləm, né gə́ a gə ree lé kara to keneŋ kédé mba̰ ya ləm tɔ. Ala ya ar né gə́ dəs mba̰ lé tel ree tɔ.
Rudu néje lai lé to gə́ yoo
16Ma m’oo né gə́ raŋg dɔ naŋg nee ya tɔɓəi: Loo-gaŋg-rəwta’g lé meeyèr ɓa taa loo keneŋ pəl-pəl ləm, loo ra né gə́ gə dɔ najee lé meeyèr ɓa taa pəl-pəl ləm tɔ. 17Ma m’pa məəm’g m’pana: Ala a gaŋg rəwta dɔ njera né gə́ gə dɔ najee ləm, gə dɔ njemeeyèr’g ləm tɔ, mbata néje lai ləm, gə kulaje lai ləm tɔ lé ndəa gə́ wɔji dɔ dee dɔ dee to keneŋ ya. 18Ma m’pa məəm’g m’wɔji ne dɔ dəwje m’pana: Ala a gə naa dee koo ndá kar dee gər gao to gə́ deḛ nja kara to d’asəna gə daje ya tɔ. 19Mbata né gə́ wɔji dɔ dəw gə né gə́ wɔji dɔ da to asəna kára ba, to gə́ yeḛ gə́ kára wəi ndá yeḛ gə́ raŋg kara wəi bèe ya tɔ, deḛ joo bɔr ndá kur gə́ dəw ur dɔ da’g lé to né el, mbata néje lai to néje gə́ gə mḭdé ba ya. 20Deḛ lai d’aw gə́ loo gə́ kára ba’g ya, deḛ lai lé nduji naŋg ɓa ra dee ne ndá d’a tel to nduji naŋg ya gogo tɔ. 21See na̰ gər to gə́ ndil dəw aw tar ŋga ndil da ɓa aw naŋg wa. 22Bèe ɓa ma m’oo to gə́ né gə́ maji unda kar dəw al rəa gə né gə́ iŋga loo kula’g ləa lé godo. Yee ɓa gə́ né gə́ wɔji dəa, mbata see na̰ ɓa a karee oo né gə́ a gə ree gée’g lé ɓəi wa.
Currently Selected:
Njekillamber 3: SBA2015
Highlight
Share
Copy
Want to have your highlights saved across all your devices? Sign up or sign in
Ngambai Bible © Alliance Biblique du Tchad 1989, 2015.