Tel tura Godndu 32

1I dara lé, kɔd mbii ila tag ndá m’a kulai ta,

I naŋg lé ur mbii oo ne taje tam’g.

2Maji kar ta ndoo ləm taa loo pəl-pəl asəna gə ndi gə́ ər bèe ləm

Ta ləm tɔ asəna gə mán-tàl

Gə́ wa dɔ naŋg bèe ləm

Asəna gə ndi dodaŋ

Gə́ ər dɔ mu gə́ idi lururu’g ləma

Asəna gə mán ndi

Gə́ ula kəŋgəŋ-kəŋgəŋ dɔ mu’g bèe ləm tɔ!

3Mbata m’a kila mber gə ri Njesigənea̰.

Maji kar sí ulaje rɔnduba dɔ Ala’g lə sí.

4Yeḛ to gə́ mbal.

Kula reaje maji ɔr njoroŋ

Mbata rəw-kabeeje lai to danasur

Yeḛ to Ala gə́ njemeenda londoŋ

Gə́ néra gə́ kori-kori godo rəa’g

Yeḛ to njemeekarabasur ləm

Gə njera né gə́ gə goo rəbee ləm tɔ.

5Ɓó lé deḛ d’oso dan kaiya’g ndá

To ta ləa-yeḛ el

Rɔkul neelé to ka̰ ŋganeeje

Deḛ to gə́ ginkoji dəwje

Gə́ njékaw kori-korije

Gə njéndɔji pɔdɔdɔje.

6Mbə-dəwje gə́ kəmkàr na sí tas

See néraje gə́ togə́bè ɓa

Seḭ waje ilaje dɔ Njesigənea̰’g wa.

See yeḛ to bɔ síje gə́ njekunda sí el wa.

See yeḛ nja ɓa gə́ njekunda sí

Kar sí síje kəmba lé el wa.

7Arje meḛ sí olé dɔ ndɔje gə́ ləw’d

Gə́ dəs lé ləm,

Ǝ̰jije goo ləbje

Gə́ orè goo na̰ goo na̰ lé ləm,

Dəjije bɔ síje ndá d’a ndoo sí ləma,

Dəjije ɓugaje lə sí ndá d’a kula sí ləm tɔ.

8Loo gə́ Njesisémdara’g ar ginkoji dəwje gə raŋg nénduba ləm,

Loo gə́ yeḛ kai ŋgalə dəwje ɓəd-ɓəd ləm tɔ lé ndá,

Yeḛ wɔji rəw-nim dɔ naŋg lə koso-dəwje-dəwje

Gə goo bula lə Israɛlje#NNk 17.26 .

9Mbata né lə Njesigənea̰ lé

To koso-dəwje ləa,

Jakob lé ɓa to nénduba ləa tɔ.

10Yeḛ iŋga dee dɔdilaloo’g,

Dan ndu no̰’g lə daje gə́ wala gə́ to ɓəl,

Yeḛ aḭ bada dɔ dee’g ləm

Yeḛ aa dɔ dee kər-kər ləm tɔ,

Yeḛ tɔs kəmee dɔ dee’g

Asəna gə ŋgonkəmee bèe,

11To gə́ niŋgatə̰də aar ne dɔ ŋganeeje’g

Tuga bagee kəb dee ne ləm,

Naji bagee ndoo dee ne né ləma,

Odo dee gə bèl bageeje ləm tɔ.

12Njesigənea̰ nja kára ba

Ɓa gə́ njekɔrno̰ koso-dəwje ləa,

Ɓó magə dɔɓee gə́ a korè dəa’g godo.

13Yeḛ aw sə dee dɔ sém loo’g

Gə́ duu dɔ ɓee ndá,

Israɛlje d’ul rɔ dee rəa’g

Gə kandə néje gə́ mee ndɔje’g

Yeḛ ar dee ubu tə̰ji

Gə́ unda kaar mbal’g ləm

Yeḛ ar ubu teḛ mee kɔr mbal’d

Gə́ kədərə kaw-kaw ləm

14Gə ubu mbà-maŋgje gə mbà-badje

Na̰’d gə ubu ŋgan badje,

Gə ka̰ bàl badje gə́ Basan

Gə bàl bya̰je ləm tɔ,

Yeḛ ar dee gum kó gə́ maji dum lé tɔ.

Tɔɓəi seḭ aije mán-nduú gə́ mḭ

Gə́ to asəna gə məs bèe.

15Israɛlje lé tel d’ər ndɔl-ndɔl ndá

Deḛ gad kudu dee gə́ gogo ləm

Deḛ tel boo ləm

Gə tel d’ər ndɔl-ndɔl ləm tɔ!

Ndá deḛ d’uba Ala d’yá̰

Yeḛ gə́ to njekunda dee ləm

Mbal gə́ to gin kaji lə dee lé

Deḛ d’ée gə́ né el ləm tɔ.

16Deḛ d’ar kəmkəḭ lə Njesigənea̰ ḭ dɔ maree’d gə́ kédé-kédé mbata lə magəje gə́ dɔɓee’g,

Deḛ d’ar mée ḭ səa pu gə néje gə́ mina̰ tɔ.

17Deḛ d’inja néməs d’ar magəje gə́ to Ala el ləm

Deḛ d’ar magəje gə́ deḛ gər dee el ləma

Deḛ gə́ sigi gə́ ree ɓasinè ɓəi

Gə́ bɔ síje-je ɓəl dee el ləm tɔ#1Kɔr 10.20.

18Seḭ ubaje kɔr mbal gə́ oji sí lé yá̰je ləm

Seḭ arje meḛ sí unda pudum dɔ Ala’d

Gə́ to ginkoji sí lé ləm tɔ.

19Njesigənea̰ oo né neelé ndá

Rea lelee el ləm

Mée ḭ səa jugugu dɔ ŋganeeje gə́ diŋgam

Gə njé gə́ dené’g ləm tɔ.

20Yeḛ pana:

M’a kar dee d’oo kəm el,

M’a koo ne see rudu néra dee

See a to to gə́ ban wa,

Mbata deḛ to ginkoji dəwje

Gə́ njékaw kori-korije ləm,

Deḛ to ŋganje gə́ njékaltaje ləm tɔ.

21Deḛ d’ar kəm əḭ dɔ dee’g

Mbata lə né gə́ to gə́ Ala el ləm

Deḛ d’ar məəm ḭ səm jugugu

Mbata lə magə-poleje lə deḛ gə́ kari ba ləm tɔ

Ndá m’a kara m’a kar kəm dee əḭ

Mbata lə ginkoji dəwje gə́ kari ba ləm

M’a kar meḛ dee o̰ dee

Mbata lə ginkoji dəwje gə́ to mbə-dəwje ləm tɔ#1Kɔr 10.22, Rɔm .

22Mbata pər oŋg ləm mbudu o̰ ndá

A ko̰ saar teḛ rudu loo-si njé gə́ d’wəi’g

A roo naŋg nee gə kandə néje gə́ d’uba keneŋ ləm,

A kaw saar teḛ gel mbalje’g naŋg ləm tɔ.

23M’a mbo̰ némajelje ɓəd-ɓəd kɔm dɔ dee’g ləm,

M’a tur dee gə ɓandaŋgje ləm ləm tɔ.

24Ɓó a tudu dee kurum-kurum ləm,

Rɔko̰ rɔnuŋga gə rɔko̰je gə́ to ɓəl kədm-kədm

D’a kula kəm dee ndòo ləm tɔ.

M’a kula gə daje gə́ majel

Gə́ mee wala’g ləm,

Gə mas lije ləm tɔ dɔ dee’g.

25Loo gə́ raga lé d’a kwəi

Yoo-kiambas ləm,

Loo gə́ kəi kara d’a kwəi

Yoo-ɓəl ləm tɔ:

A to togə́bè mbata lə basaje

Gə ŋgama̰dje ləm,

Mbata ŋganje gə́ ta mbà’g

Gə ɓugaje ləm tɔ.

26M’a m’ula m’pana:

M’a gə sané dee gə lel tam ləm,

M’a gə kar ri dee udu

Mbuna dəwje’g ləm tɔ!

27Nɛ ma m’ɓəl dɔ ta rɔkul’g lə njéba̰je ləm ləm,

Ma m’ɓəl nà njékoma̰ sə deeje

D’a ti rɔ dee pa ne pana:

Ji síjeḛje ya ɓar mèr-mèr,

Ɓó Njesigənea̰ ɓa ra néje neelé el.

28Deḛ to ginkoji dəwje

Gə́ takə̰ji lə dee gə́ maji godo ləm,

Gosɔkəmkàr lə dee kara godo ləm tɔ.

29Ɓó lé deḛ to njékəmkàrje ndá

Aa oo, né gə́ d’a gər ɓa nee:

D’a kḛji dɔ né gə́ a gə teḛ dɔ dee’g ya.

30Ɓó lé yeḛ gə́ to mbal lə dee

Uba dee ya̰ dee el ləm,

Ɓó lé Njesigənea̰ ya̰ dee ji dee’g el ləm tɔ ndá,

See dəw kára ba a tuba goo dəwje gə́ tɔl-dɔg (1.000) to gə́ ban wa,

Esé see dəwje joo ba d’a kar dəwje gə́ tɔl-dɔg-loo-dɔg (10.000) d’aḭ to gə́ ban wa.

31Mbata yeḛ gə́ to mbal lə dee lé

To asəna gə yeḛ gə́ to mbal lə síjeḛ el,

Njéba̰je lə sí ya kara

To gə́ njékɔr géeje ya tɔ.

32Nɛ kag-nduú lə dee

Ḭ mee loo-ndɔ-nduú’d gə́ Sɔdɔm ləm,

Ḭ mee loo-ndɔ’d gə́ Gɔmɔr ləm tɔ,

Kandə nduúje lə dee

D’a to kandə nduúje gə́ ka̰ yel dəw ləm,

Kul nduúje lə dee kara

D’adə ləm tɔ,

33Man-nduúje lə dee gə́ mḭ

To to gə́ mas lije gə́ boi bèe ləm,

To asəna gə mas li-meewaije

Gə́ tɔl dəw bèe ləm tɔ.

34See ta néje neelé ŋgəm dee rɔm’g dəb

Esé to gə kəmee mbuna nébao’g ləm el wa

35Dalba̰ gə bo̰ néra lé wɔji dɔm ma nja,

Loo gə́ gɔl dee a gə kunda ndolé,

Mbata ndɔ nékəmndooje lə dee nai dəb ləm,

Né gə́ to ŋgina dee lé kara

A tila gə́ tila el ləm tɔ#Rɔm 12.19, Ǝbr 10.30.

36Njesigənea̰ a gaŋg rəwta dɔ koso-dəwje’g ləa,

Nɛ yeḛ a koo kəmtondoo lə kuraje ləa

Loo gə́ yeḛ oo to gə́ siŋga dee godo lé

Ar ɓər əsé dəw gə́ to ŋgonkoji kara godo tɔ#Pak 135.14.

37Yeḛ a pana:

See magəje lə dee lé d’əd ra ɓəi wa.

See kɔr mbal gə́ to loo-kula-dɔ lə dee lé

To ra ɓəi wa.

38To magəje nee gə́ d’usɔ ubu nékinjanéməsje lə dee ləm,

Gə d’ai mán-nduúje gə́ mḭ lə dee

Gə́ ka̰ tər naŋg ləm tɔ.

Maji kar dee d’ḭta la ne sə sí ləm,

Maji kar dee d’ɔn dɔ sí

Ŋgəm sí ne ləm tɔ!

39Maji kar sí gərje gao

To gə́ ma nja m’to Ala,

Yeḛ gə́ raŋg gə́ njekorè dɔm’g godo,

M’ar dəw si kəmba ləm

M’ar dəw wəi ləm tɔ.

M’ar dəw doo ləm

M’ar doo ləa ər kəmsə ləm tɔ.

Ɓó dəw kára kara askəm kɔree jim’g el.

40Mbata m’odo jim par gə́ dara ndá,

Ma m’pana:

M’isi kəmba gə ləbm ləbm

Saar-saar gə no̰.

41Ɓó lé m’ɔl ta kiambas ləm gə́ ndɔḭ pèl-pèl ləm,

Ɓó lé m’wa rəwta-gaŋg gə́ gə dɔ najee jim’g ləm tɔ ndá,

M’a dal ba̰ gə njéba̰je ləm ləm,

M’a kar bo̰ néra dee

Gə́ njékḛjim bəḭ-bəḭje ɔs ta dee’g ləm tɔ.

42Kiambas ləm a gaŋg dakasrɔ dee mbidi-mbidi ndá

M’a kar kandə ɓandaŋgje ləm d’ai məs dee,

Məs dee gə́ d’iŋga dooje ləm

Gə ɓərje ləma,

Gə yiŋga dɔ njéba̰je ləm lé ləm tɔ.

43Seḭ ginkoji dəwje gə raŋg ɔsje pa

Ulaje ne rɔnduba dɔ koso-dəwje’g ləa!

Mbata Njesigənea̰ dal ba̰ məs kuraje ləa ləm,

Yeḛ dal ba̰ né gə́ njéba̰je ləa

Ra ləm tɔ ndá

Yeḛ uga dɔ ɓee ləa ləm

Gə dɔ koso-dəwje ləa ləm tɔ#Rɔm 15.10, LkJ 19.2.

44Moyis ree pa taje lai gə́ to mee pakɔs’g neelé kəm koso-dəwje’g, Juje gə́ ŋgolə Nun kara, aar səa keneŋ na̰’d tɔ.

45Loo gə́ Moyis tɔl ta taje nee gə́ yeḛ pa no̰ Israɛlje’g lai ndá, 46Yeḛ ula dee pana: Taje lai gə́ m’a man sí ne ɓogənè lé maji kar sí waje dɔɓəŋgərə sí’g mba ndoo ŋgan síje gə mba kar dee d’aa ne dɔ taje lai gə́ to mee godndu’g neelé mba ra née. 47Mbata to ta gə́ lam ba bèe mbata lə sí el, nɛ mbɔl dəa ɓa ndɔje lə sí d’a bula ne gə kuree gə́ əw mee ɓee gə́ seḭ a kaw taaje gə́ ka̰ sí loo gə́ seḭ a gaŋgje ne baa gə́ Jurdɛ̰ lé.

48Mee ndəa’g neelé ya Njesigənea̰ ula Moyis pana#BI 27.12-14, TtG 3.23-27: 49Tuga dɔ mbal gə́ Abarim neelé aw dɔ mbal gə́ Nebo nu, ɓee gə́ Moab gə́ wɔji dɔ Jeriko njoroŋ ndá aa loo oo ɓee gə́ Kana̰ gə́ m’ar Israɛlje gə́ né ka̰ dee lé. 50Dɔ mbal gə́ i a gə kaw tuga lé ɓa i a kwəi keneŋ ndá i a kaw rɔ dəwje’g ləi to gə́ ŋgokɔḭ Aaro̰ wəi ne dɔ mbal gə́ Hɔr ɓa aw ne rɔ dəwje’g ləa bèe lé tɔ, 51mbata seḭ raje kaiya ɔsmje ne rəw mbuna Israɛlje’g mbɔr manje gə́ Meriba, mee ɓee gə́ Kades, dɔdilaloo gə́ Sin ləm, seḭ ṵdamje gə kəmee mbuna Israɛlje’g el ləm tɔ. 52I a koo ɓee neelé nɔḭ’g ya, nɛ i a kaw mee ɓee’g nee gə́ ma m’ar Israɛlje lé el.

Currently Selected:

Tel tura Godndu 32: SBA2015

Highlight

Copy

Compare