2 Njé gə́ Tesalonikə 3
3
Raje tamaji
1Ŋgakɔmje, ges ta gə́ nai lé ɓa nee: Raje tamaji mbata lə sí mba kar ta lə Mbaidɔmbaije oso ne gə loo mbidi-mbidi nduba ne rəa gə́ raga, to gə́ yee ra ɓee lə sí bèe 2gə mba kar sí n’kida rɔ sí n’sa ne rɔ sí ji njémeeyèrje’g gə njḛ́juma̰je’g, mbata deḛ lai to njémeekunje el.
3Nɛ Mbaidɔmbaije lé to njemeenda londoŋ ya ndá yeḛ a kar sí ŋgəŋje ne ləm, yeḛ a kaa dɔ sí mba kar njetakori tibi mbɔr sí el ləm tɔ. 4Mbaidɔmbaije ɓa ar meḛ sí oso naŋg po̰ dɔ sí’g ar sí n’gər gao, ta gə́ jeḛ ndəji sí lé seḭ raje mba̰ ləm, seḭ a raje kəm sí gə́ kédé ɓəi ləm tɔ.
5Maji kar Mbaidɔmbaije ɔr no̰ sí dan meenoji’g lə Ala ləm, ar meekai sam-sam lə Kristi taa meḛ sí pəl-pəl ləm tɔ.
Raje kula gə meendakaḭ
6Ŋgako̰ síje, jeḛ ndəji sí gə ri Mbaidɔmbaije lə sí Jeju Kristi mba kar sí saaje rɔ sí rɔ ŋgoko̰ sí gə́ rara kara gə́ gər kwa dɔ gɔl rəa el lé ləm, əsé gə njaa goo ta gə́ jeḛ ndoo sí lé el ləm tɔ. 7Seḭ nja seḭ gərje né gə́ seḭ a raje ndajije ne kəm síjeḛ lé gao, mbata kisi gə́ jeḛ j’isi mbuna sí’g lé jeḛ j’wa dɔ gɔl rɔ sí jəb-jəb ya. 8Jeḛ j’usɔ né lə dəw kára kara kari ba el, nɛ jeḛ n’ra kula dan kàrá gə loondul’g, j’ula ne rɔ sí ndubu keneŋ n’dao ne mba kar dəw kára kara oo ne ndòo mbata lə sí el. 9J’askəm dəji sí né ya, nɛ jeḛ j’ɔg rɔ sí dɔ’g mba kar sí ndajije ne kəm síjeḛ tɔ. 10Mbata loo gə́ jeḛ nai rɔ sí’g ɓəi lé jeḛ j’ula sí təsərə m’pana: Lé nana ɓa mbuna sí’g ndigi ra kula el ndá nésɔ a kuba təa ndag el.
11Nɛ jeḛ j’oo to gə́ njé gə́ na̰je mbuna sí’g d’wa dɔ gɔl rɔ dee el ləm, ra kula el ləm tɔ nɛ né gə́ wɔji dɔ dee el ɓa d’ḭ bàl d’uru keneŋ. 12Deḛje neelé, jeḛ m’ɓar dee ndəji dee gə ri Mbaidɔmbaije Jeju Kristi mba kar dee d’wa kula lə dee peb ra ɓó gə d’usɔ kée.
13Ŋgako̰ síje, néra maji lə sí gə́ seḭ raje lé raje kəm sí gə́ kédé ɓó arje meḛ sí ila kas dɔ’g el. 14Ɓó lé nana ɓa ra torndu sí gə́ jeḛ j’ula sí taree mee maktub’g neelé el ndá maji kar sí oreeje kəm sí dəa’g ndəŋ, saaje rɔ sí rəa’g mba kar rəa kul ne. 15Ndəjeeje to gə́ ŋgoko̰ sí bèe ɓó éeje gə́ njeba̰ lə sí el.
Lapia gə́ ra dee
16Maji kar Mbaidɔmbaije gə́ njeyelko meelɔm lé yel kó meelɔm meḛ sí’g gə lée-lée ləm, gə kəmee-kəmee ləm tɔ. Maji kar Mbaidɔmbaije nai sə sí lai-lai tɔ.
17Ma Pool lé lapia gə́ m’ra sí lé m’ra sí gə jim ya. To tor jim-ma ya gə́ ma m’ndaŋg mee maktubje’g ləm lai, tor jim-ma lé to togə́bè ya.
18Maji kar noji lə Mbaidɔmbaije Jeju Kristi nai sə sí lai ya.
Currently Selected:
2 Njé gə́ Tesalonikə 3: SBA2015
Highlight
Share
Copy
Want to have your highlights saved across all your devices? Sign up or sign in
Ngambai Bible © Alliance Biblique du Tchad 1989, 2015.