2 Samel 5
5
D’unda Dabid gə́ mbai lə Israɛlje
1SgI 11.1-3
1Ginkoji Israɛlje lai d’aw rɔ Dabid’g mee ɓee gə́ Ebro̰ d’ulá pana: Aa oo, jeḛ n’toje sḭgarɔije ləm, gə darɔije ləm tɔ. 2Kédé gə́ ləw lé loo gə́ Sawul to ne mbai lə sí lé ya kara to i ɓa ɔr no̰ Israɛlje aw sə dee raga ləm, gə tel sə dee ɓée ləm tɔ. Tɔɓəi Njesigənea̰ ulai pana: I a kul koso-dəwje lə neḛ gə́ Israɛl ləm, i a to mbai dɔ Israɛlje’g ləm tɔ.
3Togə́bè ɓa ŋgatɔgje gə́ Israɛl lai ree rɔ mbai’g mee ɓee gə́ Ebro̰ ndá mbai Dabid lé man rəa ar dee no̰ Njesigənea̰’g mee ɓee’d gə́ Ebro̰. Deḛ d’wa dəa gə ubu d’undá ne gə́ mbai lə Israɛlje. 4Ləb Dabid aḭ rɔ-munda ɓa yeḛ tel to mbai ndá yeḛ o̰ ɓee as ləb rɔ-sɔ tɔ#1Mb 2.11, 1SgI 3.4, 29.27. 5Yeḛ si Ebro̰ o̰ ɓee dɔ Judaje’g as ləb siri gə naḭ misa̰ ləm, yeḛ si Jerusalem o̰ ɓee dɔ Israɛlje’g gə dɔ Judaje as ləb rɔ-munda-giree-munda ləm tɔ#Tr 19.18.
Dabid taa ɓee gə́ Jerusalem
1SgI 11.4-9, 14.1-2
6Mbai gə njé’g ləa d’ɔr rɔ d’aw Jerusalem mba rɔ gə Yebusje gə́ d’isi mee ɓee’g neelé. Deḛ lé d’ula Dabid pana: I a ree loo gə́ nee’g pai godo. Njékəmtɔje gə njémədje ya kara d’a kɔsi rəw.
To asəna gə deḛ ndigi pana: Dabid a ree loo gə́ nee’g pai godo#Juj 15.63, NR 1.21. 7Nɛ Dabid taa kəi-kaar-kɔgərɔ gə́ Sio̰ lé. Yee ɓa to ɓee-boo lə Dabid tɔ. 8Mee ndəa’g neelé Dabid pana: Nana ɓa gə́ ndigi dum dɔ Yebusje ndá a kaw teḛ kəm-rəw-mán’g ləm, nana ɓa gə́ a tɔl njémədje gə njékəmtɔje nee gə́ to njéba̰je lə Dabid ləm tɔ ndá, gelee gə́ nee ɓa deḛ pa ne pana: Njékəmtɔje gə njémədje d’a kandə mee kəi’g el.
9Dabid si kəi-kaar-kɔgərɔ’d gə́ ɓaree ɓee-boo lə Dabid lé. Yeḛ unda kəi-ŋgəm-looje gugu ne dɔ Milo dəb loo gə́ kəi’g ləm, gə debee gə́ raga’g ləm tɔ.
10Dabid tel to dəw gə́ boo gə́ kédé-kédé mbata Njesigənea̰, Ala gə njeboo-néje lé nai səa ya.
11Iram, mbai gə́ Tir lé ula njékaḭkulaje rɔ Dabid’g gə kag-sɛdrəje ləm, gə njéra-kula-kagje ləma, gə njétɔl kɔr mbalje ləm tɔ ar dee ra ne kəi d’ar Dabid. 12Dabid gər to gə́ Njesigənea̰ ya ɓa undá gə́ mbai lə Israɛlje ləm, ar ɓeeko̰ ləa ḭ dɔ maree’d gə́ kédé-kédé mbata lə koso-dəwje ləa gə́ Israɛl ləm tɔ.
Ŋgalə Dabid gə́ yeḛ oji dee Jerusalem
1SgI 3.5-9, 14.3-7
13Dabid taa denéje gə́ raŋg ya tɔɓəi ləm, gə denéje gə́ Jerusalem ləm tɔ goo kḭ gə́ ḭ Ebro̰ ree lé, ndá d’oji gə Dabid ŋganje gə́ diŋgam ləm gə njé gə́ dené ləm tɔ. 14Aa ooje, ri dee-deḛ gə́ yeḛ oji dee Jerusalem lé ɓa nee: Samua, gə Sobab, gə Natan, gə Salomo̰, 15gə Jibar, gə Elisua, gə Nepeg, gə Japia, 16gə Elisama, gə Eliada, gə Elipelet tɔ.
Dabid un baŋga dɔ Pilistije’g
1SgI 14.8-16
17Pilistije d’oo to gə́ d’wa dɔ Dabid gə ubu d’undá gə́ mbai dɔ Israɛlje’g ndá deḛ lai d’ḭ d’aw saŋgee. Loo gə́ Dabid oo taree ndá yeḛ ḭ aw mee kəi-kaar-kɔgərɔ’g. 18Pilistije ree taa loo pəl-pəl mee wəl-loo gə́ Repayim. 19Dabid dəji Njesigənea̰ pana: See m’a kḭ kaw rɔ gə Pilistije wa. See i a kya̰ dee jim’g ya wa.
Ndá Njesigənea̰ ila Dabid keneŋ pana: Aw ya mbata m’a kya̰ Pilistije neelé jii’g ya.
20Dabid teḛ Baal-Perasim ndá lé gə́ neelé yeḛ dum dɔ dee keneŋ ya. Ndá yeḛ pana: Njesigənea̰ tuji njéba̰je ləm nɔm’g to gə́ manje gə́ d’ula dɔ ndaa’g bèe.
Gelee gə́ bèe ɓa deḛ d’unda ne ri loo neelé lə Baal-Perasim. 21Lée neelé deḛ d’ya̰ magə-poleje lə dee naŋg ndá Dabid gə njé’g ləa d’odo d’aw ne.
22Pilistije d’ḭ tel ree gɔl kára ya tɔɓəi ndá deḛ taa loo pəl-pəl mee wəl-loo gə́ Repayim ya ɓəi. 23Dabid dəji Njesigənea̰ ndá Njesigənea̰ ulá pana: I a kaw el, nɛ turu rɔi goo dee’g gogo ndá i a kiŋga dee no̰ kag-kɔlje’g. 24Loo gə́ i oo kaa gɔl dəw gə́ ɓar dɔ sém kag-kɔlje’g ndá ɔs rɔi ɓad mbata to Njesigənea̰ ɓa njaa nɔḭ’g mba tuji njérɔje lə Pilistije lé ya.
25Dabid ra to gə́ Njesigənea̰ un ne ndia aree lé ndá yeḛ tuji Pilistije un kudee Geba saar teḛ Gejer tɔ.
Currently Selected:
2 Samel 5: SBA2015
Highlight
Copy
Compare
Share
Want to have your highlights saved across all your devices? Sign up or sign in
Ngambai Bible © Alliance Biblique du Tchad 1989, 2015.
