2 Samel 24

Tel tura bula dee gə yoo-koso gə́ oso dɔ dee’g

1SgI 21.1-6

1Oŋg lə Njesigənea̰ ḭ səa pu dɔ Israɛlje’g ndá yeḛ ɔs Dabid ɓɔḭ-ɓɔḭ gə́ dɔ dee’g pana: Aw tura bula lə Israɛlje gə Judaje. 2Mbai lé ula Joab gə́ to ɓé-njérɔje gə́ aar mbɔree’g dəb lé pana: Ɔd ɓasinè ya aw mbuna ginkoji Israɛlje’g lai, un kudee Dan saar teḛ Beer-Seba, maji kari tura bula lə koso-dəwje am m’oo see d’as ka̰da wa.

3Joab ula mbai lé pana: Maji kar Ala ləi gə́ Njesigənea̰ ar bula lə koso-dəwje ḭ dɔ maree’g as gɔl tɔl (100) ləm, maji kar kəm mbai ləm oo bèe ya ləm tɔ! Nɛ see gelee ban ɓa mbai ləm lé ndigi ra togə́bè wa.

4Nɛ mbai lé aar njaŋg dɔ ndukun’g ləa gə́ yeḛ un ar Joab ləm gə ɓé-njérɔje ləa ləm tɔ. Bèe ɓa Joab gə ɓé-njérɔje lé d’ḭ rɔ mbai’g gə mba kaw tura bula lə koso-dəwje gə́ Israɛl lé. 5Deḛ gaŋg baa gə́ Jurdɛ̰ ndá d’aw d’isi Aroer gə́ to gə́ dɔkɔl lə ɓee-boo gə́ to mee wəl-loo gə́ Gad mbɔr Jajer’g dəb. 6Deḛ d’aw Galaad ləm, gə mee ɓee gə́ Tahtim-Hodsi ləm tɔ. Deḛ d’aw Da̰-Jaa̰ gə looje gə́ gugu dɔ Sido̰ tɔ. 7Deḛ d’aw kəi-kaar-kɔgərɔ gə́ Tir ləm, gə mee ɓee-booje lai gə́ to ka̰ Hebje gə Kana̰je ləm tɔ. Deḛ tɔl təa dɔgel lə Juda gə́ to Beer-Seba. 8Deḛ d’aw ra togə́bè ya mee ɓeeje’g lai ndá deḛ ra naḭ jinaikara gə ndɔ rɔ-joo ɓa tel ree Jerusalem ɓəi. 9Joab ar mbai lé oo bula lə koso-dəwje gə́ tura lé ndá mee ɓee’d gə́ Israɛl lé njérɔ gə kiambasje d’as tɔl-dɔg-loo-tɔl-jinaijoo (800.000) ləm, Judaje d’as tɔl-dɔg-loo-tɔl-mi (500.000) ləm tɔ.

Ala ar bo̰ néra majel lə Dabid ɔs təa’g

10Gée gə́ gogo goo tura gə́ Dabid ar dee tura bula lə koso-dəwje lé ndá kaaree ɓar ɗigi-ɗigi. Bèe ɓa yeḛ ula Njesigənea̰ pana: Ma m’ra kaiya gə́ boo loo gə́ m’ra né neelé. Ǝi Njesigənea̰, ɓasinè ar məəi oso lemsé dɔ néra kori-kori’g lə kura ləi mbata né gə́ m’ra lé to némbə ya.

11Bèlè lookàree loo gə́ Dabid ḭ tar ndá ta lə Njesigənea̰ oso mbi Gad’d gə́ to njetegginta gə njenékoo lə Dabid pana: 12Aw ula Dabid pana: Njesigənea̰ pa togə́bè pana: N’unda nékəmndooje munda nea̰’g. Maji karee mbər yee gə́ kára dan dee’g ndá n’a kula ne kəmee ndòo wa lé.

13Gad aw rɔ Dabid’g ulá ta néje neelé pana: See i ndigi kar ɓoo-boo o̰ mee ɓee’g ləi ləb siri əsé i ndigi kaḭ no̰ njéba̰je’g ləi as naḭ munda əsé i ndigi kar yoo-koso ɓa oso mee ɓee’g ləi as ndɔ munda wa. Ɓasinè, maji kari mbər yeḛ gə́ i ndigi mba kam m’tel m’aw m’ula yeḛ gə́ njekulam lé.

14Dabid tel ila Gad keneŋ pana: Ma m’isi dan boo-nékəmndoo’g. Wai, maji kar sí j’oso meḛ ji Njesigənea̰’g ɓa mbata meekaw taḭ-taḭ ləa al dɔ loo sula, nɛ maji kam m’oso meḛ ji dəwje’g ɓa el!

15Njesigənea̰ ula gə yoo-koso mee ɓee gə́ Israɛl un kudee mee ɓee gə́ Dan saar teḛ Beer-Seba ar dəwje d’wəi d’as tɔl-dɔg-loo rɔ-siri (70.000) mbuna koso-dəwje’g lé. 16To gə́ kura gə́ dara ula jia ndiŋ gə́ dɔ Jerusalem’d gə mba tujee ne ndá Njesigənea̰ ar goo takə̰ji ləa yɔr dɔ némajel’g neelé ndá yeḛ ula kura gə́ dara gə́ ar koso-dəwje tuji lé pana: As ŋga! Rəm gə jii gə́ rɔi’g ɓasinè.

Kura lə Njesigənea̰ gə́ dara lé aar mbɔr loo-kunda-kó’g lə Arabna, dəw gə́ Yebus. 17Loo gə́ Dabid oo kura gə́ dara gə́ tɔl koso-dəwje lé ndá yeḛ ula Njesigənea̰ pana: Aa oo, ma nja m’ra kaiya. Ma nja taree wa dɔm nɛ badə-kosoje neelé ɗi ɓa deḛ ra wa. Maji kar jii wɔi dɔm-ma gə dɔ njémeekəije’g lə bɔm ɓa.

Dabid ra loo-nékinjaməs ar Njesigənea̰

1SgI 21.18-26

18Mee ndəa’g neelé Gad aw rɔ Dabid’g ulá pana: Ḭ aw ra loo-nékinjaməs ar Njesigənea̰ loo-kunda-kó’g lə Arabna, dəw gə́ Yebus lé.

19Dabid ḭ aw gə goo ta gə́ Gad ulá to gə́ Njesigənea̰ un ne ndia aree lé tɔ. 20Arabna aa loo oo ndá yeḛ oo mbai gə kuraje ləa gə́ d’isi d’aw gə́ rəa’g. Ndá Arabna unda loo teḛ tɔɓəi yeḛ unda barmba dəb kəmee naŋg no̰ mbai’g lé. 21Arabna dəjee pana: See gelee ban ɓa mbai ləm ree ne rɔ kura’g ləa wa. Dabid ilá keneŋ pana: Mba ndogo səi loo-kunda-kó gə mba ra loo-nékinjaməs keneŋ kar Njesigənea̰ mba kar yoo-koso ɔr ne dɔ koso-dəwje’g ya.

22Arabna ula Dabid pana: Maji kar mbai ləm gə́ to mbai lé taa loo-kunda-kó lé ya ləm, maji karee inja nékinjanéməsje gə́ taa kəmee lé keneŋ ləm tɔ, aa oo, bɔ maŋgje d’a to nékinjaməs gə́ ka̰ roo ləm, pusuje gə kageeje lé d’a to gə́ kir ləm tɔ. 23Néje lai neelé Arabna ar mbai. Ndá Arabna ula mbai lé pana: Maji kari taa kəm Njesigənea̰, Ala ləi ya.

24Nɛ mbai lé ula Arabna pana: Wah! Ma m’ndigi ndogo gə lar ɓa ɓó m’a kinja nékinjaməs gə́ ka̰ roo gə́ lal laree kar Njesigənea̰, Ala ləm el.

Togə́bè ɓa Dabid aree larnda rɔ-mi ndogo ne loo-kunda-kó lé ləm gə bɔ maŋgje lé ləm tɔ. 25Lée neelé Dabid ra loo-nékinjaməs keneŋ ar Njesigənea̰ ndá yeḛ inja nékinjanéməsje gə́ ka̰ roo ləm, gə nékinjanéməsje gə́ ka̰ kɔm na̰’d ləm tɔ. Togə́bè ɓa Njesigənea̰ ar mée oso né lemsé dɔ ɓee’g ndá yeḛ ar yoo-koso lé əw rəa dɔ Israɛlje’g tɔ.

Currently Selected:

2 Samel 24: SBA2015

Highlight

Copy

Compare