2 Samel 16

Dabid gə Siba

1Loo gə́ Dabid dəs dɔ sém mbal’g lam bèe ndá aa oo Siba, kura lə Mepiboset teḛ aar nea̰’g gə mulayḛ̀je-je joo gə́ tɔ nésɔje as bèe dɔ dee’g: pil muru tɔl-joo (200) ləm, gə kul nduú gə́ tudu tɔl (100) ləm, gə kandə kagje gə́ naḭkuli tɔl (100) ləma, gə ku mán-nduú kára ləm tɔ#2Sam 9.9-10. 2Mbai dəji Siba pana: See ɗi ɓa i ndigi ra gə néje neelé wa.

Siba tel ilá keneŋ pana: Mulayḛ̀je lé to mbata njémeekəije lə mbai ləm, pil muru gə kandə kagje gə́ naḭkuli to mba kar basaje d’usɔ ləma, mán-nduú to mba tɔl ne kunda lə dee gə́ d’a gə dao dɔdilaloo’g ləm tɔ.

3Mbai lé dəjee pana: See ŋgolə ɓéije si ra wa.

Siba tel ila mbai’g lé pana: Aa oo, yeḛ nai Jerusalem mbata yeḛ pana: Ɓogənè ya ginkoji Israɛlje d’a tel gə ɓeeko̰ lə bɔ neḛje kar neḛ.

4Mbai ula Siba pana: Aa oo, néje lai gə́ to ka̰ Mepiboset lé to kaḭ-i ya#2Sam 19.27-28.

Ndá Siba pana: Ma m’dəb kəm naŋg nɔḭ’g ya! Ǝi mbai ləm, maji kam m’taa kəmi rəgm ya!

Simei ila ndɔl dɔ Dabid’g

5Dabid ree saar ta ɓee gə́ Bahurim ndá, aa oo, dəw kára gə́ to gə́ ginkoji’g lə njémeekəije lə Sawul ria lə Simei, ŋgolə Gera unda loo mee ɓee’g teḛ. Yeḛ aw pər gə́ rɔ Dabid’g pa taje ila ne ndɔl dəa’g ləm, 6yeḛ tila Dabid gə kuraje lə mbai Dabid lai gə kɔri-ərje ləm tɔ loo gə́ koso-dəwje lai gə bao-rɔje d’aar dɔkɔl gə dɔgel mbai’g lé. 7Taje gə́ Simei pa ila ne ndɔl dəa’g ɓa nee: Aw gə́ nu, aw gə́ nu, i dəw gə́ njekilaməs gə njemeeyèr. 8Njesigənea̰ ar məs njémeekəije lə Sawul lai tel ɔm dɔi’g ya, yeḛ gə́ i taa kalimbai ləa lé ndá Njesigənea̰ tel gə ɓeeko̰ lé ɔm ji Absalɔm gə́ to ŋgoni’g, bèe ɓa i si ne dan némeeko̰’d gə́ wɔji dɔi ya mbata i to dəw gə́ njekilaməs ya.

9Yen ŋga Abisai, ŋgolə Seruja dəji mbai pana: See gelee ban ɓa yoo-bisi nee aar ila ndɔl dɔ mbai’g bèe wa. Ya̰ loo am m’aw m’tuga dəa m’gaŋg.

10Nɛ mbai lé pana: Seḭ ŋgalə Seruja lé see ta ɗi lə sí to keneŋ wa. Ɓó lé yeḛ ila ndɔl dɔm’g ndá to mbata Njesigənea̰ ulá pana: Ila ndɔl dɔ Dabid’g! Ŋga see na̰ ɓa a dəjee pana: See ban ɓa i ra togə́bè wa. 11Dabid ula Abisai gə kuraje ləa lai pana: Aa ooje, ŋgon məəm ya ndigi tɔlm, nɛ ɓəd ɓa dəw gə́ Bḛjami nee ɓəi wa! Yá̰je areeje ila ndɔl dɔm’g mbata Njesigənea̰ ɓa ulá gə mba karee ra bèe ya. 12Banelə Njesigənea̰ a koo kəmtondoo ləm gə mba ra səm meemaji tor ndɔlje gə́ d’ila dɔm’g ɓogənè ɓəi.

13Dabid gə njé’g ləa d’aw dɔ dee gə́ kédé. Bèe ɓa Simei njaa kaar mbal gə́ mbɔr Dabid’g ndá yeḛ ila ndɔl dəa’g ləm, tilá gə kɔri-ərje ləma, tuga kor ɔm dəa’g ləm tɔ. 14Mbai lé deḛ gə koso-dəwje lai gə́ d’aw səa lé ree Ajepim ndá lée neelé ɓa d’wa rɔ dee keneŋ ya.

Husai tel aw iŋga Absalɔm

15Absalɔm gə koso-dəwje gə́ to Israɛlje lai lé d’andə mee ɓee gə́ Jerusalem, tɔɓəi Ahitopel nai gə Absalɔm. 16Loo gə́ Usai, dəw gə́ Arki gə́ to baokura lə Dabid lé teḛ rɔ Absalɔm’g ndá yeḛ ulá pana: Maji kar mbai si kəmba ya! Maji kar mbai si kəmba ya.

17Absalɔm dəji Usai pana: Aa oo, see loo kɔm gə́ i ɔm na̰’d gə baokura ləi lé ŋga ɓa nee wa. See gelee ban ɓa i aw gə baokura ləi na̰’d el wa.

18Usai ila Absalɔm’g pana: Né gə́ ma m’ndigi lé to gə mba to ka̰ dəw gə́ Njesigənea̰ gə koso-dəwje gə́ Israɛl lai d’ɔree d’unda gə kəmee lé ya, debee neelé ɓa ma m’ndigi nai səa ya. 19Ta gə́ raŋg ya ɓəi, see na̰ ɓa m’a ra kula karee ɓəi wa. See m’a ra kula kar ŋgonee el wa. To gə́ m’ra kula m’ar bɔbije lé m’a ra kari-i togə́bè ya tɔ.

20Absalɔm dəji Ahitopel pana: Ar sí j’wɔji na̰ ta, see ɗi ɓa kəm kar sí n’raje wa.

21Ahitopel ula Absalɔm pana: Maji kari aw to gə gamla-denéje lə bɔbije gə́ yeḛ ya̰ dee ar dee d’isi mba ŋgəm kəi lé, togə́bè ɓa Israɛlje lai d’a koo to gə́ néraije lé ɓa ari tel to ne né gə́ to kḛji kəm bɔbije’g, yee ɓa deḛ lai gə́ d’aw səi lé ji dee a ɓar ne mèr-mèr ya.

22Deḛ la kəi-kubu mbata lə Absalɔm dɔ kəi’g tar ndá Absalɔm aw to gə gamla-denéje lə bɔbeeje lé kəm Israɛlje’g lai ya#2Sam 12.11-12.

23Takwɔji-kəmkàrje lə Ahitopel gə́ mee ndəa gən lé d’oo asəna gə ta gə́ d’aw dəji ne Ala bèe. Takwɔjije lə Ahitopel lé lé to mbata lə Dabid əsé to mbata lə Absalɔm kara d’oo togə́bè ya.

Currently Selected:

2 Samel 16: SBA2015

Highlight

Copy

Compare