2 Mbaije 6
6
Elije ar kandə tina nun dɔ mán’g
1Koso njéteggintaje d’ula Elije pana: Aa oo, loo gə́ j’isije keneŋ nɔḭ’g neelé tad as sí el. 2Ar sí j’awje baa gə́ Jurdɛ̰ nu, lé gə́ neelé nana kara a tuŋga kunda kag kára-kára gə mba ra ne kəi-si sí ya.
Elije ila dee keneŋ pana: Awje ya.
3Nɛ dəw kára mbuna dee’g pana: Maji kari aw gə kuraje ləi na̰’d ɓa.
Ndá yeḛ ilá keneŋ pana: M’a kaw ya.
4Yen ŋga yeḛ ɔd aw sə dee na̰’d tɔ. Loo gə́ deḛ teḛ baa gə́ Jurdɛ̰ ndá deḛ tuga kagje lé. 5Nɛ loo gə́ yeḛ gə́ kára mbuna dee’g aw tuga kunda kag lé bèe-bèe ndá kandə tina ləa ɔr oso mán. Yeḛ ra né wəl pana: Ai-i! mbai ləm, tina lé m’ndima gə́ ndima.
6Dəw lə Ala pana: See oso ra wa.
Ndá yeḛ ulá lé tɔ. Togə́bè ɓa Elije tuga ŋgəw kag unda ila lée’g neelé ndá kandə tina lé ḭ gel mán’g teḛ nun dɔ mán’g.
7Tɔɓəi yeḛ ulá pana: Maji kari un!
Ndá yeḛ ula jia un ya tɔ.
Elije unda Aramje gə kəm libi
8Mbai gə́ Siri aw rɔ gə Israɛlje ndá yeḛ mbo̰ kuraje ləa dɔ na̰’d oo takə̰ji lə dee ndá ula dee pana: Loo gə́ bèe ɓa kəm ra loo-sim keneŋ ya. 9Nɛ dəw lə Ala ar dee d’ula mbai gə́ Israɛl pana: Məəi dɔ rɔi’g na̰ a teḛ lée’g neelé, mbata Aramje d’umi keneŋ ya.
10Bèe ɓa mbai gə́ Israɛl lé ula dəwje ar dee d’aw d’aar gə mba koo loo gə́ dəw lə Ala pa taree lé ləm, gə tɔji dee lé ləm tɔ.
Né neelé teḛ as gɔl bula. 11Mee mbai gə́ Siri to kərm, ndá yeḛ ɓar kuraje ləa dəji dee pana: See seḭ a kulamje təsərə kamje m’gər see na̰ ɓa mbuna sí’g nee ɓa un dɔ sí ar mbai gə́ Israɛl lé wa.
12Kura ləa kára mbuna mareeje’g ilá keneŋ pana: Ǝi mbai ləm, dəw gə́ raŋg el! Nɛ Elije gə́ to njetegginta gə́ si Israɛl lé ɓa pata néje nee gə́ i pa taree mee kəi-toi’g lé ar mbai gə́ Israɛl ya.
13Togə́bè ɓa mbai lé pana: Aw ooje loo-siée ndá m’a kula dee kar dee d’aw d’wá.
Deḛ ree d’ulá taree pana: Aa oo, yeḛ lé si Dotan. 14Yeḛ ula gə kundaje ləm, gə pusu-rɔje ləma, gə boo-njérɔje ləm tɔ ar dee teḛ keneŋ loondul’g d’aḭ dɔ ɓee-boo neelé sub tɔ.
15Kura lə dəw lə Ala unda loo teḛ gə ndɔ rad ndá, yeḛ oo boo-njérɔje, gə kundaje, gə pusu-rɔje, gə́ d’aḭ ne dɔ ɓee-boo neelé sub. Yen ŋga kura lé ula dəw lə Ala pana: Ai-i, mbai ləm, see j’a ra ban wa.
16Yeḛ ilá keneŋ pana: Ɓəl el mbata njé gə́ d’aar sə síjeḛ lé bula yaa̰ d’unda njé gə́ d’aar sə dee-deḛ ɓəi.
17Elije ra tamaji pana: Mbaidɔmbaije, maji kari ar kəmee inja aree oo dee ne. Ndá Njesigənea̰ ar kəm kura lé inja aree oo ne kundaje, gə pusu-rɔje gə́ ndɔḭ wər-wər to gə́ pər bèe dɔ mbal’g gugu dɔ Elije sub lé tɔ.
18Loo gə́ njérɔje gə́ Siri d’aw gə́ rɔ Elije’g lé ndá, yeḛ ra tamaji ta Njesigənea̰’g pana: Maji kari ila kəm libi dɔ ginkoji dəwje’g neelé!
Ndá Njesigənea̰ ila kəm libi dɔ dee’g gə goo ta gə́ Elije dəjee lé ya tɔ. 19Elije ula dee pana: Loo gə́ nee ɓa to rəbee el ləm, gə yee ɓa to gə́ ɓee-boo lé el ləm tɔ, ɔdje gə́ goom’g nee ndá m’a kɔr no̰ sí kaw sə sí rɔ dəw gə́ seḭ aw sa̰geeje lé.
Nɛ yeḛ ɔr no̰ dee aw sə dee Samari. 20Loo gə́ deḛ teḛ Samari mba̰ ndá Elije pana: Njesigənea̰, ar kəm dəwje neelé inja ar dee d’oo loo!
Bèe ɓa Njesigənea̰ ar kəm dee inja ya tɔ ndá deḛ d’oo to gə́ deḛ d’aar dan mee ɓee gə́ Samari ya.
21Loo gə́ mbai gə́ Israɛl oo dee ndá yeḛ dəji Elije pana: See m’tɔl dee wa, bɔm. See m’tɔl dee wa.
22Elije ilá keneŋ pana: I a tɔl dee el, see deḛ gə́ i wa dee gə́ ɓərje mba̰ lé see a tel tɔl dee gə kiambas gə ɓandaŋg ləi tɔɓəi wa. Maji kari ar dee muru gə mán gə mba kar dee d’o̰ gə d’ai ɓa ar dee tel d’aw rɔ ɓée deeje’g ɓəi.
23Mbai gə́ Israɛl ar dee ra muru-gad d’ar dee d’o̰ gə d’ai, tɔɓəi yeḛ ya̰ dee ar dee tel d’aw rɔ ɓée deeje’g ɓəi. Yen ŋga kudu njérɔje gə́ Siri lé tel ree dɔ naŋg ɓee gə́ Israɛl’g gogo el ya saar tɔ.
Ɓoo-boo oso mee ɓee gə́ Samari’g
24Gée gə́ gogo, Ben-Adad, mbai gə́ Siri mbo̰ njérɔje ləa lai ndá aw aḭ ne dɔ Samari sub. 25Ɓoo-boo oso Samari’g, deḛ d’udu dee jigi-jigi d’ar dɔ mulayḛ̀ kára ba ya ndá askəm larnda rɔ-jinaijoo ləm, mee né kwɔji siḭ dərje gə́ as dəb kilo gə́ kai dana loo joo lé askəm larnda mi ləm tɔ.
26Loo gə́ mbai gə́ Israɛl dəs dɔ ndògo-bɔrɔ’g ndá dené kára no̰ dəa’g wəl pana: Ǝi, mbai ləm! Maji kari la səm ya kari.
27Yeḛ ilá keneŋ pana: Ɓó lé Njesigənea̰ la səi el ndá see ɗi ɓa m’a ra gə mba la ne səi wa. See m’a la səi gə kandə kó gə́ ḭ loo-kunda’g əsé mán-nduú gə́ ḭ loo-mbula’g wa.
28Tɔɓəi mbai lé dəjee pana: See ɗi ɓa i ndigi wa.
Yeḛ tel ilá keneŋ pana: Dené kára neelé ulam pana: Ar sí ŋgoni j’usɔ ɓogənè ndá, bèlè j’a sɔ ka̰ ma tɔ. 29Jeḛ ndiri ŋgonəm lé j’usɔ pal. Bèlè ndá m’ulá m’pana: Ar sí j’usɔ ŋgonee lé ŋga. Nɛ yeḛ iya ŋgonee lé#NnJ 4.10.
30Loo gə́ mbai oo tapa dené neelé ndá yeḛ til kubuje ləa ɔd njaa dəs dɔ ndògo-bɔrɔ’g tɔ. Loo gə́ dəwje d’ée ndá dee pana: Aa ooje, yeḛ ula kubu-kwa-ndòo ɓa rəa’g. 31Mbai lé pana: Ɓó lé ɓogənè dɔ Elije, ŋgolə Sapat gaŋg el ɓəi ndá maji kar Ala ra səm nédɔkudu ya. 32Nɛ Elije si mee kəi’g ləa gə njé gə́ tɔgje na̰’d. Ndá mbai ula dəw kára rəa’g. Nɛ kédé ɓa gə mba kar dəw neelé ree ɓəi ndá, Elije ula njé gə́ tɔgje neelé pana: See seḭ ooje to gə́ ŋgolə njetɔl-dəw neelé ula dəw kára mba karee ree gaŋg dɔm ya wa. Ooje, loo gə́ njekula neelé a ree ndá maji kar sí uduje rəw dəa’g, tɔɓəi ɔseeje ne gə́ raga: See dəw a koo kaa gɔl ɓéeje gə́ a ɓar gée’g el wa.
33Yeḛ ar pata ar dee ya ɓəi ndá léegəneeya njekula lé ree rəa’g ulá pana: Aa oo, tuji neelé ḭ rɔ Njesigənea̰’g ŋga see ɗi tɔɓəi ɓa m’a kunda ne məəm yel dɔ Njesigənea̰’g gə mbəa ɓəi wa.
Currently Selected:
2 Mbaije 6: SBA2015
Highlight
Copy
Compare
Share
Want to have your highlights saved across all your devices? Sign up or sign in
Ngambai Bible © Alliance Biblique du Tchad 1989, 2015.
