2 Mbaije 3

Joram, mbai gə́ Israɛl

1Joram, ŋgolə Akab gə́ si Samari lé un kudu ko̰ɓee dɔ Israɛlje’g mee ləb ko̰ɓee’g lə Josapat, mbai gə́ Juda gə́ njekɔm’g dɔg-giree-jinaijoo lé ndá yeḛ o̰ ɓee keneŋ ləbee dɔg-giree-joo. 2Yeḛ ra né gə́ majel kəm Njesigənea̰’g nɛ to gə́ bɔbeeje gə kea̰je ra el mbata néndaji magə-Baalje gə́ bɔbeeje ra lé yeḛ tɔs dee tilá dee ya. 3Nɛ yeḛ ula rəa mbiriri dan kaiya ra Jeroboam, ŋgolə Nebat gə́ ɔs Israɛlje ar dee ra lé ɓó yeḛ ɔr rəa keneŋ el.

4Mesa, mbai gə́ Moab lé badə-kosoje ləa bula yaa̰, négədɓee gə́ yeḛ ar mbai gə́ Israɛl gə ləb kára-kára lé to ŋgan badje tɔl-dɔg-loo-tɔl (100.000) gə bàl badje tɔl-dɔg-loo-tɔl (100.000) gə bḭ dee na̰’d tɔ. 5Loo gə́ mbai Akab lé wəi ndá Mesa, mbai gə́ Moab ḭ ɔs mbai gə́ Israɛl lé rəw. 6Mbai Joram lé unda loo mee ɓee gə́ Samari teḛ ndá yeḛ mbo̰ Israɛlje lai dɔ na̰’d tən dee tura dee. 7Yeḛ ɔd aw ndá ula njékulaje rɔ Josapat, mbai gə́ Juda pana: Mbai gə́ Moab lé ḭ ɔsm ŋgərəŋ. See i a kaw səm kar sí j’aw n’rɔje gə Moabje el wa. Josapat ilá keneŋ pana: M’a kaw ya. Ma m’to gə́ i ləm, koso-dəwje ləm tɔ gə́ koso-dəwje ləi ləma, kundaje ləm kara to gə́ kundaje ləi ləm tɔ. 8Yeḛ dəjee tɔɓəi pana: See rəw gə́ ra ɓa j’a kawje ne wa. Joram tel ilá keneŋ pana: J’a kawje gə rəw gə́ dɔdilaloo gə́ Edɔm ya.

9Bèe ɓa mbai gə́ Israɛl gə mbai gə́ Juda gə mbai gə́ Edɔm d’ɔd d’aw, loo gə́ deḛ njaa as ndɔ dee siri ndá deḛ d’iŋga mán mbata njérɔje lə dee el ləm, mbata nékulje gə́ d’odo néje lə dee lé el ləm tɔ. 10Mbai gə́ Israɛl lé pa pana: Ai-i, Njesigənea̰ mbo̰ mbaije gə́ munda neelé na̰’d mba kɔm dee ji Moabje’g.

11Nɛ Josapat pana: See njetegginta lə Njesigənea̰ kára kara si keneŋ mba kar sí n’dəjije ne Njesigənea̰ ta el wa.

Kura lə mbai gə́ Israɛl kára ilá keneŋ pana: Elije, ŋgolə Sapat gə́ njeboakula lə Eli si keneŋ nee ya.

12Josapat pana: Ta lə Njesigənea̰ to təa’g ya.

Togə́bè ɓa mbai gə́ Israɛl, gə Josapat, gə mbai gə́ Edɔm lé d’aw ne rəa’g gə mbəa. 13Elije dəji mbai gə́ Israɛl pana: See ta ɗi ɓa to mbuna síjeḛ səi’g wa. Aw rɔ njéteggintaje’g lə bɔbije gə njéteggintaje’g lə kɔinje.

Mbai gə́ Israɛl ilá keneŋ pana: Wah! Bèe el mbata Njesigənea̰ ɓar mbaije gə́ munda neelé na̰’d mba kɔm dee ji Moabje’g.

14Elije pana: Njesigənea̰ gə́ njeboo-néje gə́ m’to kura ləa gə́ m’aar nea̰’g to Njesikəmba, ɓó lé ma m’oo Josapat, mbai gə́ Juda gə́ né el ndá m’a kila kəm dɔi’g el ləm, m’a kooi gə́ né el ləm tɔ. 15Ɓasinè, maji kar sí reeje gə njenékim.

Loo gə́ njenékim neelé aar im né bèe-bèe ndá Njesigənea̰ ila jia dɔ Elije’g. 16Yeḛ pa pana: Njesigənea̰ pa togə́bè pana: Uruje bwaje bula kəm wəl-loo’g neelé. 17Mbata Njesigənea̰ pa togə́bè pana: Seḭ a kooje lel el ləm, gə ndi el ləm tɔ, nɛ wəl-loo neelé mán a taa loo keneŋ pəl-pəl kar sí-seḭ aije ləm, kar koso-nékulje lə sí gə nékulje gə́ d’aw d’odo néje lə sí kara d’ai ləm tɔ. 18Nɛ né neelé to né gə́ lam ba kəm Njesigənea̰’g ɓəi, yeḛ a gə kɔm Moabje meḛ ji sí’g tɔ ndá, 19seḭ a tujije ɓee-booje lai gə́ siŋga dee to ləm, gə ɓee-booje lai gə́ maji dum ləm, seḭ a tugaje kag sɔje lai ləm, seḭ a kuduje kəm-rəw-manje lai ləma, seḭ a tujije dɔ naŋg ndɔje lai gə́ maji dum gə kɔri-mbalje pugudu-pugudu ləm tɔ.

20Yen ŋga bèlè gə́ ndɔ gə́ to kàr kun nékar ndá aa oo, mán ḭ rəw gə́ Edɔm ula ar mán taa loo mee ɓee’g pəl-pəl.

21Loo gə́ Moabje lai d’oo soree to gə́ mbaije d’ɔr rɔ d’aw gə mba rɔ sə dee ndá deḛ mbo̰ dee-deḛ lai gə́ ləb dee as kaw rɔ’g ləm, gə deḛ gə́ ləb dee undá kara ləm tɔ, d’ar dee d’aar kəm rəw-nim-ɓee’g tɔ. 22Deḛ teḛ gə ndɔ rad loo gə́ kàr ɔs dɔ manje’g ndá Moabje d’oo manje gə́ to no̰ dee’g kas to gə́ məs bèe. 23Deḛ pana, To məs! Tɔgərɔ ya, mbaije neelé d’ɔr kiambas tɔs ne na̰, ɓasinè seḭ Moabje, undaje banrɔ!

24Deḛ ree loo-si njérɔje’g lə Israɛl ndá njérɔje gə́ Israɛl d’ḭ rɔ Moabje d’ar dee d’aḭ no̰ dee’g. Deḛ d’ur mee ɓee’g tɔl Moabje tɔ. 25Deḛ tɔ ɓee-booje pɔs-pɔs, nana kara tila kɔri-mbal ləa mee ndɔje gə́ maji’g d’ar dee taa loo keneŋ pəl-pəl ləm, deḛ d’udu kəm-rəw-manje lai jigi-jigi ləma, deḛ tuga kag sɔje lai ləm tɔ.

Njérɔ gə yɔroŋ-dooje gugu dɔ ɓee gə́ Kir-Hareset sub tujee pugudu-pugudu d’ar kɔr mbalje ɓa nai. 26Mbai gə́ Moab oo to gə́ rɔ lé dum dəa ndá yeḛ ɔr njérɔje tɔl-siri (700) gə́ to njérɔ gə kiambasje mba kar dee saŋg rəw mba teḛ ne rɔ mbai gə́ Edɔm’g, nɛ deḛ d’as el. 27Yen ŋga yeḛ wa ŋgondəree gə́ a gə taa toree loo ko̰ɓee’g ya ḭjá gə́ nékinjaməs ka̰ roo dɔ ndògo-bɔrɔ’g. Meḛ Israɛlje ḭ sə dee pu ar dee d’ɔr rɔ dee rɔ mbai gə́ Moab’g lé tel d’aw ɓee lə dee tɔ.

Currently Selected:

2 Mbaije 3: SBA2015

Highlight

Copy

Compare