2 Mbaije 23
23
Jojias tel dɔ manrɔ’g lə Njesigənea̰ lé gogo
2SgI 34.29-32
1Jojias, mbai ar ŋgatɔgje gə́ Juda gə njé gə́ Jerusalem lai mbo̰ dɔ na̰ rəa’g. 2Tɔɓəi yeḛ aw mee kəi’g lə Njesigənea̰ gə koso-dəwje lai gə́ Juda gə koso-dəwje lai gə́ Jerusalem ləm, gə njékinjanéməsje ləm, gə njéteggintaje ləm, gə koso-dəwje lai un kudee dɔ deḛ gə́ gɔ-gɔ’g saar teḛ ne dɔ dəwje gə́ boo-boo’g ləm tɔ. Yeḛ tura taje lai gə́ to mee maktub manrɔ gə́ d’iŋga mee kəi’g lə Njesigənea̰ lé no̰ dee’g. 3Mbai lé aar tar dɔ loo-kuba-kaar’g man rəa no̰ Njesigənea̰’g. Yeḛ un rəa unda gə kəmee gə mba kun dɔ gɔl Njesigənea̰ ləm, gə mba kaa dɔ torndiaje gə ndukunje ləa gə godndiaje gə ŋgaw mée gə rəa bura ləma, gə mba ra néje lai gə́ taree to mee maktub manrɔ’g neelé ləm tɔ. Tɔɓəi koso-dəwje lai kara d’ɔm səa na̰’d dɔ ta manrɔ’g neelé tɔ.
D’wa dɔ gɔl rəw kwa Ala meḛ dee’g mee ɓee gə́ Juda’g
2SgI 34.3-5
4Mbai un ndia ar Hilkija, ŋgɔ-njekinjanéməs ləm, gə njékinjanéməsje gə́ njéla səaje ləma, gə njéŋgəm takəije ləm tɔ gə mba kar dee teḛ gə néje gə́ to mee kəi’g lə Njesigənea̰ gə́ deḛ ra mbata lə magə-Baal ləm, gə mbata lə magə-Astarté ləma, gə mbata lə boo-néje lai gə́ dara ləm tɔ ndá yeḛ aw roo dee gir ɓee gə́ Jerusalem mee wəl-loo gə́ Sedro̰ tɔɓəi yeḛ ar dee d’odo bu dee d’aw ne d’aw d’ɔm Betel tɔ#2Mb 21.3, 2SgI 33.3. 5Yeḛ tɔl njékinjanéməsje gə́ wɔji dɔ magəje gə́ mbaije gə́ Juda mbər dee mba kar dee roo néje gə́ ə̰də sululu dɔ looje’d gə́ ndəw-ndəw gə́ to mee ɓee-booje’d gə́ Juda ləm, gə looje gə́ gugu dɔ Jerusalem ləm tɔ. Tɔɓəi yeḛ tɔb dee gə́ njéroo néje gə́ ə̰də sululu kar magə-Baal ləm, gə kàr ləm, gə naḭ ləm, gə boo-kéréméje ləma, gə boo-néje lai gə́ dara ləm tɔ. 6Yeḛ ḭ gə magə-Astarté lé mee kəi’g lə Njesigənea̰ teḛ ne raga aw ne gir ɓee-boo gə́ Jerusalem par gə́ wəl-loo gə́ Sedro̰, yeḛ rée wəl-loo gə́ Sedro̰ aree tel to bu ndá yeḛ ɔm buee dɔɓar dəwje’g. 7Yeḛ tɔ kəi lə kaiya-diŋgamje gə́ njéra nérɔkulje gə́ to mee kəi’g lə Njesigənea̰ lé, lé neelé ɓa denéje d’isi keneŋ d’ṵji kubu gə́ wɔji dɔ magə-Astarté lé tɔ.
8Yeḛ ar njékinjanéməsje lai d’ḭ ɓee-booje gə́ Juda ree Jerusalem, yeḛ ar dɔ looje gə́ ndəw gə́ njékinjanéməsje d’aw roo néje gə́ ə̰də sululu keneŋ lé tel to né gə́ to kḛji un kudee Geba saar teḛ Beer-Seba, yeḛ tɔs dɔ looje gə́ ndəw gə́ to tarəwje’g tila dee ləm, gə yee gə́ to loo-Kandə-tarəw ɓee-boo’g lə Juje, mbai dɔ ɓee-boo tila ləma, gə yee gə́ to gə́ dɔgel lə tarəw ɓee-boo ləm tɔ. 9Nɛ njékinjanéməsje gə́ wɔji dɔ looje gə́ ndəw lé d’aw loo-nékinjaməs’g lə Njesigənea̰ gə́ to Jerusalem lé el nɛ muru gə́ nétiee godo keneŋ ɓa d’o̰ gə ŋgako̰ deeje na̰’d ya.
10Mbai ar Topet gə́ to mee wəl-loo’g lə ŋgalə Hinɔm lé tel to loo gə́ mina̰ gə mba kar dəw roo ŋgonee gə́ diŋgam əsé yeḛ gə́ dené keneŋ mba kula ne rɔnduba dɔ magə gə́ ria lə Molok’g lé el ŋga#Ləb 18.21, Jer 7.31, 19.1-6, 32.25. 11Kundaje gə́ mbaije gə́ Juda d’unda dee gə kəmee d’ar kàr gə́ d’aar takəi’g lə Njesigənea̰ gə́ to mbɔr kəi’g lə Neta̰-Melek gə́ to njeko̰ɓee gə́ si tarəw ɓee’g lé yeḛ tɔb dee ləm, yeḛ roo pusu-rɔje gə́ d’unda d’wɔji ne dɔ kàr lé ləm tɔ. 12Mbai təd loo-nékinjanéməsje gə́ d’unda dɔ kəi gə́ tar lə Akas gə́ mbaije gə́ Juda ra ləm, gə njé gə́ Manasə ra mee gadlooje gə́ joo gə́ to mee ndògo gə́ wɔji dɔ kəi lə Njesigənea̰ ləm tɔ, gée gə́ gogo loo gə́ yeḛ təd dee tɔr dee lée’g neelé mba̰ ndá yeḛ odo bu dee aw ɔm kəm-rəw-mán gə́ Sedro̰#2Mb 21.5, 2SgI 33.5. 13Looje gə́ ndəw gə́ wɔji dɔ Jerusalem njoroŋ par gə́ dɔkɔl lə mbal gə́ ria lə Loo-tuji gə́ Salomo̰, mbai ra ar magə-Astarté lé mbai ra né keneŋ ar dee tel to looje gə́ mina̰ ləm, yeḛ tuji né gə́ mina̰ gə́ njé gə́ Sido̰ ra d’ar Kemos ləm, gə né gə́ mina̰ gə́ njé gə́ Moab ra d’ar Milkɔm ləma, gə né gə́ mina̰ gə́ Amo̰je ra ləm tɔ#1Mb 11.7. 14Yeḛ təd néndaji magəje ləm, yeḛ təd magəje ləm tɔ ndá yeḛ ar siŋga dəwje ɓa taa loo keneŋ pəl-pəl.
D’wa dɔ gɔl rəw kwa Ala meḛ dee’g mee ɓee gə́ Israɛl
2SgI 34.6-7
15Loo-nékinjaməs gə́ Betel gə dɔ loo gə́ ndəw gə́ Jeroboam gə́ to ŋgolə Nebat ra ɔs ne Israɛlje ar dee ra ne kaiya lé yeḛ tɔs tila ləm, yeḛ roo loo gə́ ndəw aree tel to bu ləma, yeḛ roo magə lé ləm tɔ#1Mb 12.33.
16Jojias ɔm rəd oo dɔɓarje gə́ to dɔ mbal’g ndá yeḛ ula dəwje ar dee d’aw d’odo siŋgaje mee dɔɓarje’g tɔɓəi yeḛ roo dee dɔ loo-nékinjaməs’g aree tel to ne né gə́ to kḛji gə goo taree gə́ Njesigənea̰ pa gə ndu dəw lə Ala gə́ njepa ta néje neelé#1Mb 13.2. 17Yeḛ dəji pana: See ɗi ɓa d’uba ɓiru ɓa m’oo nee wa.
Dəwje gə́ mee ɓee’g lé tel d’ilá keneŋ pana: To dɔɓar dəw lə Ala gə́ ḭ Juda ree pata ila dɔ loo-nékinjaməs gə́ Betel lé ɓa i ya ree ra née aree aw lée’g béréré lé el wa#1Mb 13.30-32.
18Bèe ɓa yeḛ pana: Ya̰je aree tɔ, maji kar dəw kára kara ɔrɔ rɔ siŋga dəw neelé el! D’a ŋgəm siŋgáje to gə́ deḛ ŋgəm ne siŋga njetegginta gə́ ḭ Samari ree lé bèe tɔ.
19Jojias ar dee sané kəije lai gə́ to dɔ looje gə́ ndəw gə́ to mee ɓee-booje gə́ Samari gə́ mbaije gə́ Israɛl ra d’ar oŋg ḭ ne gə Njesigənea̰ pu lé, yeḛ ra aree aw na̰’d béréré gə né gə́ yeḛ ra Betel lé ya tɔ. 20Yeḛ tɔl njékinjanéməsje lai gə́ wɔji dɔ looje gə́ ndəw gə́ d’isi lée’g neelé dɔ loo-nékinjaməs’g ndá yeḛ roo siŋga dəwje dɔ’g tɔ.
Yen ŋga yeḛ tel aw Jerusalem gogo.
Judaje ra naḭ Pag
2SgI 35.18-19
21Mbai un ndia ar dəwje lai pana: Maji kar sí raje naḭ Pag mba kula ne rɔnduba dɔ Njesigənea̰ Ala’g lə sí to gə́ ndaŋg ne taree mee maktub manrɔ’g lé. 22Un kudee mee ndəa’g lə njégaŋ-rəwtaje gə́ gaŋg rəwta dɔ Israɛlje’g saar mee ndəaje’g lə mbaije gə́ Israɛl gə mbaije gə́ Juda lé dəw ra gar naḭ Pag gə́ togə́bè el. 23Mee ləb ko̰ɓee’g lə Jojias, mbai gə́ njekɔm’g dɔg-giree-jinaijoo lé ɓa deḛ ra naḭ Pag keneŋ d’ula ne rɔnduba dɔ Njesigənea̰’g mee ɓee gə́ Jerusalem ya.
Rudu ko̰ɓee lə Jojias
2SgI 35.20-27, 36.1
24Tɔɓəi Jojias sané njéɓar ndil dəwje gə́ d’wəi ləm, gə deḛ gə́ to njéndo̰-ərje ləm, gə magə-térapimje ləm, gə magəje gə́ raŋg ləma, gə néje lai gə́ mina̰ gə́ yeḛ oo dee mee ɓee gə́ Juda gə Jerusalem ləm tɔ ar dee godo gə mba kar néje lai gə́ to mee maktub godndu gə́ njekinjanéməs Hilkija iŋga mee kəi’g lə Njesigənea̰ lé aw ne lée’g béréré ya.
25Kédé ɓa kar Jojias to ne mbai ɓəi lé mbai gə́ raŋg gə́ njendigi Njesigənea̰ gə ŋgaw mée bura gə rəa bura gə siŋgarea bura gə goo taje lai gə́ godndu Moyis pa to gə́ yeḛ bèe lé godo ləm, njetana səa gə́ gée gə́ gogo kara godo ləm tɔ.
26Lée togə́bè kara Njesigənea̰ uba goo boo-oŋg ləa gə́ to asəna gə pər gə́ o̰ bilim-bilim bèe lé dɔ Judaje’g ya̰ el mbata néje lai gə́ Manasə ra ar mée ḭ ne səa pu lé. 27Bèe ɓa Njesigənea̰ pana: Judaje kara m’a kɔr dee nɔm’d gə́ raŋg to gə́ m’ɔr ne Israɛlje bèe tɔ. Tɔɓəi m’a kuba Jerusalem gə́ to ɓee-boo gə́ m’ɔree kəm’g lé kya̰ ləm, kəi gə́ m’pana: Yee ɓa rim a ɓar keneŋ lé kara m’a kuba kya̰ ləm tɔ.
Kwəi lə Jojias
28Ges sorta néraje lə Jojias gə néje lai gə́ yeḛ ra lé yee ɓa deḛ ndaŋg taree mee Maktub-sorta néraje’g lə mbaije gə́ Juda ya#2SgI 35.20–36.4. 29Mee ndəa gən lé ɓa Parao̰ Neko, mbai gə́ Ejiptə ɔr rɔ aw rɔ gə mbai gə́ Asiri mbɔr baa gə́ Epratə’g lé. Yen ŋga Jojias, mbai teḛ aw iŋgá tɔ. Leegeneeya loo gə́ kəm Parao̰ oso dəa’g ndá yeḛ tɔlee mee ɓee gə́ Megido tɔ. 30Kuraje ləa d’un ninee d’aw ne mee ɓee gə́ Megido gə pusu ndá d’aw ne Jerusalem d’aw dubee bwa-dɔɓar’g ləa. Bèe ɓa koso-dəwje gə́ mee ɓee’g d’un Joakas, ŋgolə Jojias d’wa dəa gə ubu d’undá gə́ mbai tor bɔbeeje’g tɔ.
Joakas tel to mbai gə́ Juda
2SgI 36.2-4
31Joakas lé ləbee as rɔ-joo-giree-munda ɓa yeḛ tel to mbai ndá yeḛ si Jerusalem o̰ ne ɓee as naḭ munda. Kea̰je ria lə Hamutal, ŋgolə Jeremi, dəw gə́ Libna. 32Yeḛ ra né gə́ majel kəm Njesigənea̰’g aree aw na̰’d gə ka̰ bɔbeeje-je ya béréré. 33Parao̰ Neko wá gə kúla lar mee ɓee gə́ Ribla dɔ naŋg gə́ Amat mba karee si Jerusalem o̰ ne ɓee el ŋga, yeḛ gaŋg lar-gədɓee dɔ ɓee’g as larnda nékwɔji kwɔi-lə-né tɔl-dɔg-loo-munda (3.000) ləm, gə larlɔr as nékwɔji kwɔi-lə-né rɔ-munda ləm tɔ.
34Yen ŋga Parao̰ Neko unda Eliakim, ŋgolə Jojias gə́ mbai tor bɔbeeje Jojias’g ndá yeḛ tel unda ria lə Jojakim. Yeḛ wa Joakas aw səa Ejiptə ndá yeḛ wəi keneŋ#Jer 22.11-12. 35Jojakim ar Parao̰ larnda gə larlɔr: nɛ lar gə́ d’a gə kar neelé yeḛ gaŋg dɔ dəwje gə́ mee ɓee’g gə goo ndukun lə Parao̰ ya, yeḛ wɔji ka̰ nana kara ɓa buguru dəwje taa ne larnda gə larlɔr gə́ kəm kar Parao̰ Neko lé ɓəi.
Jojakim tel to mbai gə́ Juda
2SgI 36.5-8
36Jojakim lé ləbee as rɔ-joo-giree-mi ɓa yeḛ tel to mbai ndá yeḛ si Jerusalem o̰ ne ɓee as ləb dɔg-giree-kára. Kea̰je ria lə Jebuda, ŋgolə Pedaja, dəw gə́ Ruma#Jer 22.18-19, 26.1-6, 35.19. 37Yeḛ ra né gə́ majel kəm Njesigənea̰’g aree aw na̰’d béréré gə ka̰ bɔbeeje-je ya.
Currently Selected:
2 Mbaije 23: SBA2015
Highlight
Copy
Compare
Share
Want to have your highlights saved across all your devices? Sign up or sign in
Ngambai Bible © Alliance Biblique du Tchad 1989, 2015.
