2 Sôrta Gḭka Israɛlje 4
4
1Yeḛ ra loo-nékinjaməs gə larkas, ŋgalee as kəmkil dəw rɔ-joo ləm, tadee as kəmkil dəw rɔ-joo ləma, dəree gə́ ḭ gə́ tar as kəmkil dəw dɔg ləm tɔ#Tr 25.1-2.
Bai-togo-rɔ gə́ boi gə bai-gelje gə́ ra dee gə́ larkas
1Mb 7.23-26
2Yeḛ léḛ larkas gə́ bai-togo-rɔ gə́ boi. Tea tad as kəmkil dəw dɔg ləm, to gə́ guburu yir-yir ləm, dəree gə́ tar as kəmkil dəw mi ləma, kaaree gə́ d’wɔji gə kúla as kəmkil dəw rɔ-munda ləm tɔ. 3Loo gə́ mbɔree’d gə́ to gelee’g lé deḛ ra néndaji bɔ maŋgje keneŋ, mbuna kəmkil dəw kára ndá gugu néndaji bɔ maŋgje dɔg-dɔg dɔ dura-mán’g lé sub tɔ, néndaji bɔ maŋgje lé d’ɔs dee goo na̰’d gun joo ndá deḛ léḛ dee na̰’d loo kára ba bèe. 4Bai-togo-rɔ gə́ boi lé to dɔ néndaji bɔ maŋgje dɔg-gir-dee-joo gə́ ndaji dee gə larkas ar njé gə́ munda kəm dee to par gə́ dɔgel ləm, njé gə́ munda kəm dee to gə́ par gə́ dɔ-gó ləm, njé gə́ munda kəm dee to par gə́ dɔkɔl ləma, njé gə́ munda kəm dee to par gə́ bər ləm tɔ, bai-togo-rɔ gə́ boo lé to dɔ dee’g ndá kudu deḛ lai to par gə́ mee bai-togo-rɔ gə́ boi’g lé tɔ. 5Ndər ləa as dabla ji dəw bèe, mbia to asəna gə ta ŋgo-dɔ-mán gə́ deḛ ndaji gə́ pudu nduja-kuruje keneŋ bèe. Bai-togo-rɔ gə́ boi lé mée as litər tɔl-dɔg-loo-tɔl gə dəa rɔ-joo (120.000).
6Deḛ ra bai-gelje dɔg ndá unda dee mi par gə́ dɔkɔl ləm, gə mi par gə́ dɔgel ləm tɔ gə mba togo ne néje, deḛ togo nékinjanéməsje gə́ na̰je gə́ ka̰ roo keneŋ. Man gə́ mee bai-togo-rɔ’g lé to gə mba kar njékinjanéməsje togo ne rɔ dee#Tr 30.17-31.
Tura goo néje gə́ deḛ ra gə lar lé
1Mb 7.40-51
7Yeḛ léḛ larlɔr gə́ pərndɔje dɔg, gə goo ndukun gə́ wɔji dɔ dee ndá yeḛ unda dee mee kəi gə́ to gə kəmee’g, mi dɔkɔl ləm, gə mi dɔgel ləm tɔ#Tr 25.31-40.
8Yeḛ ra tabulje dɔg ndá unda dee mee kəi gə́ to gə kəmee’g, mi dɔkɔl ləm gə mi dɔgel ləm tɔ.
Yeḛ léḛ larlɔr gə́ karmbije as dɔg#Tr 25.23-30.
9Yeḛ ra gadloo gə mbata lə njékinjanéməsje ləm, gə gadloo gə́ tad gə tarəbeeje ləm tɔ ndá yeḛ ɔr gir tabidi-rəwje lé gə larkas tɔ.
10Yeḛ unda bai-togo-rɔ gə́ boi lé par gə́ dɔkɔl lə kəi gə́ to gə kəmee par gə́ bər bèe.
11Huram ra bai-girje gə əb-kuba-pərje gə baije tɔ.
Togə́bè ɓa Huram tɔl ne kulaje lai gə́ mbai Salomo̰ aree ra mbata lə kəi lə Ala gə néje gə́ nee:
12Gajije joo gə mburṵje joo gə dɔ kuru dee gə́ to dɔ gaji’g lé ləm
D’ṵji ba̰də gə mba tula dɔ mburṵje’g joo gə́ to dɔ gajije’g tar lé ləm,
13Néndaji gə́ to asəna gə kandə dḭ bèe lé as tɔl-sɔ (400) mbata ba̰dəje gə́ joo
Gə́ deḛ tɔs néndaji gə́ to asəna gə kandə dḭ bèe lé dɔ na̰’d gun joo gə goo ba̰də lé ləm tɔ.
14Nékunda-gel-deje’g dɔg ləm,
Bai-girje dɔg to dɔ nékunda-gel-deje’g lé ləma
15Bai-togo-rɔ gə́ boi
Gə néndaji bɔ maŋgje dɔg-gir-dee-joo
To gel bai-togo-rɔ’g lé ləm,
16Bai-girje gə əb-kuba-pərje
Gə karmbi-larje gə́ ta dee tɔ ja̰-ja̰ ləm tɔ.
Nékulaje nee lai gə́ mbai Salomo̰ ar Huram-Abi ra mbata kəi lə Njesigənea̰ lé to larkas gə́ ndɔḭ wər-wər ya. 17Mbai lé ar dee léḛ dee ndag-loo’d gə́ wɔji dɔ Jurdɛ̰, dɔ naŋg a̰ji gə́ to mbuna Sukot gə Sereda’g. 18Nékulaje gə́ Salomo̰ ar dee ra lé bula yaa̰, askəm tura gée gə mba koo kwɔi lə larkas lé el.
19Nékulaje gə́ raŋg lai gə́ Salomo̰ ra togə́bè mbata kəi lə Njesigənea̰ lé as bèe:
Gə loo-nékinjaməs gə́ yeḛ ra gə larlɔr ləm,
Gə tabulje gə́ ka̰ kunda pil muru gə́ to gə kəmee dɔ’g ləm tɔ,
20Gə kag pərndɔje gə néndogóje lə dee gə́ ra gə larlɔr gə́ àr ŋgad-ŋgad
Gə mba kɔs pər keneŋ gə goo ndukun
Gə́ wɔji dɔ kəi gə́ to gə kəmee ləm,
21Gə néndaji puduje, gə néndogoje,
Gə kɔgəlɔ kun ne pərje gə́ ra dee gə larlɔr gə́ àr ŋgad-ŋgad ləm,
22Gə kiaje gə baije gə ka-larje,
Gə əb-pərje gə́ ra gə larlɔr gə́ àr ŋgad-ŋgad ləm tɔ,
Gə tabidi-rəwkəije gə́ ra dee gə larlɔr
Gə́ wɔji dɔ tarəw kəi ka̰ kandə ne mee kəi’d
Gə́ to gə kəmee ləm, gə mbata tabidi-rəwkəi
Gə́ ka̰ kandə ne mee kəi’d gə́ to gə kəmee ləm tɔ.
Currently Selected:
2 Sôrta Gḭka Israɛlje 4: SBA2015
Highlight
Copy
Compare
Share
Want to have your highlights saved across all your devices? Sign up or sign in
Ngambai Bible © Alliance Biblique du Tchad 1989, 2015.
