2 Sôrta Gḭka Israɛlje 13
13
Abija tel to mbai gə́ Juda
1Mb 15.1-8
1Mee ləb ko̰ɓee lə Jeroboam gə́ njekɔm’g dɔg-giree-jinaijoo lé ɓa Abija un kudu ko̰ɓee gə́ Juda ɓəi. 2Yeḛ si Jerusalem o̰ ne ɓee as ləb munda. Kea̰je ria lə Mikaja, ŋgolə Uriel, dəw gə́ Gibea.
Rɔ to mbuna Abija gə Jeroboam’g. 3Abija ɔr rɔ aw rɔ gə bao-rɔje gə́ to njésiŋgamoŋje gə́ d’as tɔl-dɔg-loo-tɔl-sɔ (400.000), Jeroboam ɔr rɔ gə bao-rɔje gə́ to njésiŋgamoŋje gə́ d’as tɔl-dɔg-loo-tɔl-jinaijoo (800.000) gə mba kaw rɔ ne səa tɔ.
4Abija uba dɔ sém mbal gə́ Semarayim gə́ to dəb mbal gə́ Eprayim lé aar tar ila boo-ndia naŋg wəl ar Jeroboam gə Israɛlje lai pana: Maji kar sí ooje ta ləm ɓa! 5See seḭ gərje to gə́ Njesigənea̰, Ala lə Israɛlje lé ar ɓeeko̰ lə Israɛlje to ka̰ Dabid gə ŋgakeaje saar gə no̰ gə goo manrɔ gə́ loo telee raŋg godo lé el wa. 6Nɛ Jeroboam, ŋgolə Nebat, kura lə Salomo̰ gə́ to ŋgolə Dabid lé ḭ ɔs ɓéeje lé rəw. 7Dəwje gə́ gə mḭdé ba gə́ to njéra né kori-korije mbo̰ dɔ na̰ rəa’g d’ɔsee d’ilá dɔ Roboam’d gə́ to ŋgolə Salomo̰ mbata Roboam to gə́ ŋgon gə́ nà ləm gə njeɓel gə́ siŋgá as kaar naŋg gəs no̰ dee’g el tɔ. 8Ndá ɓasinè, seḭ ə̰jije meḛ sí’g gə mba kun baŋga dɔ ɓeeko̰’g lə Njesigənea̰ gə́ to ji ŋgalə Dabid’g, mbata seḭ toje dəwje gə́ bulaje digi-digi ləm, mbata seḭ awje gə néndaji ŋgan maŋgje gə́ to larlɔr gə́ Jeroboam ra gə́ magəje ar sí lé ləm tɔ. 9See seḭ tubaje njékinjanéməsje lə Njesigənea̰ gə́ to ŋgalə Aaro̰ gə Ləbije lé el wa. See seḭ nja raje rɔ sí gə́ njékinjanéməsje to gə́ koso-dəwje gə́ ɓeeje gə́ raŋg bèe to el wa. Nana ɓa gə́ ree gə bɔ maŋg əsé bàl bya̰je siri gə mba kunda ne rəa gə kəmee lé ndá yeḛ tel to ne njekinjanéməs lə né gə́ to Ala el. 10Nɛ jeḛ lé Njesigənea̰ gə́ to Ala lə sí lé jeḛ j’ubá j’yá̰ el, njékinjanéməsje gə́ ra kula lə dee no̰ Njesigənea̰’g, deḛ gə́ to ŋgalə Aaro̰ gə Ləbije lé deḛ ra kula gə́ wɔji dɔ dee dɔ dee ya. 11Teḛ gə ndɔ gə kàrkemetag gə ndɔje kára-kára lai lé jeḛ j’injaje nékinjanéməsje gə́ ka̰ roo ləm, jeḛ n’tuuje né gə́ ə̰də sululu j’ar Njesigənea̰ ləm, jeḛ j’undaje pil muru gə́ to gə kəmee dɔ tabul’d gə́ àr ŋgad-ŋgad ləma, kàrkemetag kara jeḛ j’ɔsje pər pərndɔ’d gə́ ra gə larlɔr gə néndogóje gə́ wɔji dəa kára-kára lai ləm tɔ, mbata jeḛ lé j’aaje dɔ godndu Ala lə sí gə́ Njesigənea̰ kər-kər ya. Nɛ seḭ ɓa seḭ ubáje yá̰je tɔ. 12Aa ooje, Ala gə́ to dəw dɔ síjeḛ gə njékinjanéməsje ləa d’aw sə sí na̰’d, deḛ ɓa d’ɔr no̰ sí. Jeḛ j’aw gə to̰to̰je gə́ ɓar ŋgaw gə mba koma̰ ne sə sí. Maji kar sí rɔje gə Njesigənea̰ Ala lə bɔ síje-je el mbata seḭ a teḛje kɔr keneŋ nda̰ el tɔ.
13Jeroboam lé ar njérɔje ləa d’um dee goo dee’g ləm, ar ges dee d’aar no̰ Judaje’g ləm tɔ. 14Judaje d’ɔm rəd gə́ goo dee’g ndá deḛ rɔ dee gə́ no̰ dee’g ləm, gə goo dee’g ləm tɔ. Deḛ no̰ wəl ɓar Njesigənea̰ ləm, njékinjanéməsje d’im to̰to̰je ləm tɔ. 15Njérɔje gə́ Juda d’ɔm lul-rɔ u-u-u, tɔɓəi goo lul-rɔ’g lə Judaje’g lé Njesigənea̰ tɔl Jeroboam gə Israɛlje lai no̰ Abija’g gə Judaje’g. 16Israɛlje d’aḭ no̰ Judaje’g ndá Ala ɓa ya̰ dee meḛ ji dee’g tɔ. 17Abija gə njérɔje ləa dum dɔ dee tɔl dee bula yaa̰, deḛ tɔl bao-rɔje gə́ to njésiŋgamoŋje mbuna Israɛlje’g as tɔl-dɔg-loo-tɔl-mi (500.000). 18Mee ndəa’g neelé Israɛlje d’ula dɔ dee d’aw ŋguna-ŋguna ndá Judaje d’un baŋga dɔ dee’g mbata deḛ nam kaar Njesigənea̰’g, Ala lə bɔ deeje-je. 19Abija korə Jeroboam, taa ɓee-booje ləa gə́ ri dee lə Betel gə ɓee-kogoje ləa ləm, gə Jesana gə ɓee-kogoje ləa ləma, gə Epro̰ gə ɓee-kogoje ləa ləm tɔ.
20Mee ndəa’g lə Abija lé siŋga ɓee lə Jeroboam gə́ kédé lé rəm ndá Njesigənea̰ undá tɔlee. 21Nɛ Abija lé siŋga ko̰ɓee ləa ḭ dɔ maree’d gə́ kédé-kédé, yeḛ taa denéje dɔg-gir-dee-sɔ ndá yeḛ oji ŋganje gə́ diŋgam rɔ-joo-gir-dee-joo ləm, gə ŋganje gə́ dené dɔg-gir-dee-misa̰ ləm tɔ.
22Ges sorta néraje lə Abija gə́ yeḛ ra gə ta gə́ yeḛ pa lé ndaŋg taree mee maktub kolé mee dɔ’g lə Ido, njetegginta ya. 23Abija wəi ar dee dubee dan mee ɓee-boo’g lə Dabid. Ŋgonee Asa ɓa o̰ ɓee toree’g tɔ.
Asa tel to mbai gə́ Juda
1Mb 15.9-11
Un kudee mee ndəa’g lə Asa lé ɓee to lɔm as ləb dɔg.
Currently Selected:
2 Sôrta Gḭka Israɛlje 13: SBA2015
Highlight
Copy
Compare
Share
Want to have your highlights saved across all your devices? Sign up or sign in
Ngambai Bible © Alliance Biblique du Tchad 1989, 2015.
