1 Njé gə́ Tesalonikə 4
4
Nékəmra gə́ taa kəm Ala lé
1Ŋgakɔmje, ta gə́ raŋg ya to ŋga. Né gə́ kəm ra karee taa kəm Ala lé seḭ ooje rɔ sí’g mba̰ ləm, seḭ raje née ləm tɔ ndá jeḛ n’tɔg sí j’wa ta sí gə ri Mbaidɔmbaije Jeju Kristi mba kar sí awje ne kəm sí gə́ kédé-kédé ya. 2Tɔgərɔ ya, ta ndooje gə́ jeḛ m’pa j’ar sí gə ri Mbaidɔmbaije Jeju lé seḭ gərje gao ya. 3Né gə́ mee Ala ndigi lé to mba kar sí toje dəwje gə́ meḛ sí àr ŋgad-ŋgad ləm, to mba kar sí ɔgje rɔ sí dɔ mɔdkaiya’g ləm tɔ, 4to mba kar nana kara gər loo kisi gə dené ləa gə́ to gə́ darəa lé gə meenda ləm, gə goo rəbee ləm tɔ 5ɓó a ra gə goo malee gə́ ula na̰’d el mbata yee ɓa gə́ néra njépole-magəje lé. 6Maji kar dəw kára kara unda kəm maree jibi taa ne né ləa el ləm, ar kəmee əḭ dɔ né’g lə maree gə́ rara kara el ləm tɔ, mbata Mbaidɔmbaije ɓa gə́ njedalba̰ néje neelé lai to gə́ jeḛ j’ula sí taree ndəji sí ne kédé ya. 7Mbata Ala ɓar sí mba kar sí j’isi gə kəmee ɓó gə mba kar sí toje gə́ njémeemina̰je el. 8Gelee gə́ nee ɓa, yeḛ gə́ ɔs ta ndoo neelé rəw ndá Ala gə́ njekar Ndil gə́ to gə kəmee to meḛ sí’g ɓa yeḛ ɔsee rəw kən ɓó dəw gə́ kari ba el.
9Ta gə́ wɔji dɔ kunda ŋgako̰ síje dan kəm sí’g lé to né gə́ seḭ awje ndòo maktubee el, mbata Ala nja ndoo sí ar sí gərje loo kunda na̰ dan kəm na̰’d mba̰ ya. 10Yee ɓa seḭ raje gə ŋgako̰ síje lai gə́ d’isi gə dɔɓee dɔɓee gə́ Masedoinə ya. Nɛ seḭ ŋgako̰ síje lé jeḛ n’tɔg sí mba kar nojimeenda lə sí lé ɔs dɔ maree’g gə́ kédé-kédé ləm, 11gə mba kar sí naaje loo mba kisi lɔm ləm, mba ra kula gə́ wɔji dɔ sí dɔ sí ləma, gə mba ra kula gə ji sí ləm tɔ, to gə́ jeḛ ndoo sí taree kédé lé. 12Togə́bè ɓa, néraje gə́ to gə goo rəbee gə́ seḭ a raje gə njé gə́ raga lé d’a kila ne riɓar dɔ sí’g ləm, seḭ a kawje ne ndòo né lə dəw kára kara el ləm tɔ.
Ta tel ree lə Mbaidɔmbaije lé
13Ŋgako̰ síje, ta gə́ wɔji dɔ dəwje gə́ toɓi lé jeḛ ndigi kar sí sije keneŋ dɔ mbə’g el, nà seḭ a kulaje ne rɔ sí ndòo gə dəwje gə́ raŋg na̰’d gə́ nékunda-mee-yel dɔ’g lə dee godo. 14Mbata ɓó lé j’ɔm meḛ sí dɔ kwəi gə́ Jeju wəi’g ləm, gə dɔ teḛ gə́ yeḛ unda loo teḛ dan njé gə́ d’wəi’g ləm tɔ ndá maji kar sí j’ɔm meḛ sí dɔ tel gə́ Ala a kar deḛ gə́ d’wəi gin Kristi’g lé d’a tel ree gə Jeju na̰’d tɔ.
15Tɔgərɔ ya, aa ooje, ta lə Mbaidɔmbaije gə́ j’ula sí təsərə ɓa nee: jeḛ gə́ j’a si kəmba saar ndɔ tel lə Mbaidɔmbaije lé deḛ gə́ d’wəi mba̰ lé j’a kun gɔl sí kila no̰ dee’g gə dɔrɔ sí el#1Kɔr 15.51-52. 16Mbata Mbaidɔmbaije nja ɓa a kwɔji lé ndá ndu ka̰ mbai lə kuraje gə́ dara a ɓar wəl ləm, ndu to̰to̰ lə Ala a ɓar kɔr loo lɔi-lɔi ləm tɔ ndá yeḛ a kḭ dara gə mba ree ŋga. Deḛ gə́ d’wəi gin Kristi’g lé d’a kunda loo teḛ kédé. 17Gée gə́ gogo jeḛ gə́ j’aw kəmba dɔ naŋg nee ɓəi lé jeḛ sə deeje j’a kḭ na̰’d kuru dan loo-kil’g lə ndi’g dəs tar mba tila kəm Mbaidɔmbaije par gə́ dara lé. Bèe ɓa j’a nai gə Mbaidɔmbaije gə no̰ ya. 18Maji kar sí gɔlje meḛ na̰ gə taje neelé.
Currently Selected:
1 Njé gə́ Tesalonikə 4: SBA2015
Highlight
Share
Copy
Want to have your highlights saved across all your devices? Sign up or sign in
Ngambai Bible © Alliance Biblique du Tchad 1989, 2015.
