1 Njé gə́ Tesalonikə 2
2
Kula ra Pool mbuna njé gə́ Tesalonik’g
1Ŋgakɔmje, seḭ gərje gao, kaw gə́ jeḛ j’aw rɔ sí’g lé j’aw gə́ ŋgar el. 2Seḭ gərje gao, to gə́ d’ila rɔkul dɔ sí’g d’ar rɔ sí ndiri ne njigi-njigi mee ɓee gə́ Pilibə nɛ jeḛ j’ɔm meḛ sí dɔ Ala’g, j’wa ne diŋgam meḛ sí’g mba kula sí ne tagə́maji lə Ala gə kəm ŋgon diŋgam dan néje gə́ d’ɔs kaar sí’g . 3Mber kila lə sí lé wɔji dɔ ta gə́ to ɓam el ləm, əsé dɔ meeyèr el ləma, əsé dɔ ta su ne kəm dəwje su-su el ləm tɔ. 4Nɛ to gə́ Ala nja oo sí gə́ dəwje gə́ kəm kila mber Tagə́maji lé ɓa ɔm kula neelé ji sí’g ɓəi ndá jeḛ j’ɔr taree mba n’taa ne kəm Ala ya, yeḛ gə́ njenaa meekuru lə sí ɓó mba taa ne kəm dəwje ba el. 5Seḭ gərje gao, jeḛ lé ndɔ kára kara jeḛ lèbè kəm dəw el ləm, j’unda meḛ sí dɔ né’g lə dəw el ləm tɔ. Ala ɓa oo gée gao ya. 6Jeḛ lé n’saŋg rɔnduba gə́ ḭ rɔ dəwje’g el ləm, əsé gə rɔ sí-seḭ’g el ləma, əsé gə rɔ dəwje gə́ raŋg’g el ləm tɔ. Jeḛ gə́ n’to njékaḭkulaje lə Kristi lé j’askəm ko̰ dɔ sí ya nɛ jeḛ j’o̰ el. 7J’aw mbuna sí’g lɔm asəna gə ko̰ ŋganje gə́ odo ŋgantədje ləa bèe. 8Kunda gə́ j’unda sí dan kəm sí’g dana ɗəŋgərə lé ɓa ar sí j’wɔji mba kar sí Tagə́maji lə Ala lé gə karee el nɛ j’wa rɔ sí bura j’ar sí mbata jeḛ sə síje lé n’tel n’to j’asəna gə darɔ gə́ kára ba tɔ. 9Ŋgako̰ síje, kula ra sí gə́ jeḛ j’ula ne rɔ sí ndubu dṵda’d gə dan kàrá mba kar sí j’wɔi ne dəw kára kara mbuna sí’g el lé meḛ sí a kolé dɔ’g ya, togə́bè ɓa, j’ɔr ne gin Tagə́maji lə Ala lé j’ar sí. 10Seḭ toje njékoogineje ləm, Ala kara oo ləm tɔ. Néra gə́ jeḛ n’ra sə sí-seḭ njémeekunje lé to né gə́ àr ləm, to né gə́ to gə dɔ najee ləma, to néra njemeekarabasur ləm tɔ. 11Seḭ ooje gao, jeḛ n’ra sə sí to gə́ bɔ ŋgon ra gə ŋgan méeje lé ya. 12Jeḛ ndəji sí ləm, jeḛ n’gɔl sí ləma, jeḛ j’ɔs sí ɓɔḭ-ɓɔḭ mba kar néra sí aw gə goo ka̰ Ala, yeḛ gə́ njeɓar sí mba kar sí sije ɓeeko̰’g ləa gə dan rɔnduba’g ləa lé ləm tɔ.
13Gelee gə́ nee ɓa, jeḛ n’ra ne Ala oiyo ɓó j’əw ne rɔ sí el mbata loo gə́ seḭ taaje ta lə Ala gə́ jeḛ j’ula sí lé seḭ taaje gə meḛ sí, ooje gə́ kankəmta lə Ala gə́ ra kula meḛ sí-seḭ gə́ ɔmje meḛ sí dəa’g ɓó seḭ ooje gə́ tapa dəwje gə́ kari ba el. 14Tɔgərɔ ya, ŋgakɔmje, seḭ telje ndajije kəm Eglisəje lə Ala gə́ d’ɔm na̰’d gin Jeju Kristi mee ɓeeko̰ gə́ Jude lé mbata seḭje kara njé gə́ goo ɓee’g lə sí-seḭ ɓa d’ula kəm sí ndòo to gə́ Jibje kara d’ula kəm dee-deḛ ndòo bèe ya tɔ . 15Jibje neelé deḛ tɔl Mbaidɔmbaije Jeju Kristi gə njéteggintaje ləm, deḛ d’ula kəm síjeḛ ndòo ləm tɔ. Deḛ taa kəm Ala el ləm, deḛ to njéba̰je lə dəwje lai ləm tɔ . 16Deḛ d’ɔg sí loo kula njépole-magəje ta mba kar dee d’iŋga ne kaji, yee ɓa kaiya lə dee uba ne dɔ na̰ ɓul-ɓul rusu loo ya. Nɛ oŋg lə Ala lé uba dee naŋg bus wa dee mba̰.
17Ŋgako̰ síje, jeḛ lé darɔ sí ɓa ya̰ sí waga nɛ meḛ sí ɓa yḛ̀ ya̰ sí el, yee ɓa ar mal koo kəm sí ra sí ne ŋgwɔd-ŋgwɔd. 18Jeḛ lé j’ə̰ji meḛ sí’g mba kaw koo sí gɔl kára əsé joo jén nja ləm, ar darɔm-ma Pool nja kara m’ndigi mba kaw ya nɛ Njekurai ɓa ɔg sí rəbee ya. 19See na̰ ɓəi ɓa gə́ nékunda-mee-yel dɔ’g lə sí əsé nérɔlel lə sí əsé dɔgugu gə́ j’a kal ne rɔ sí wa. See a to seḭ nja no̰ Mbaidɔmbaije’g lə sí Jeju ndɔ ree’g ləa el wa. 20Bèe ya, seḭ toje néndubarɔ lə sí ləm, gə nérɔlel lə síjeḛ ləm tɔ.
Currently Selected:
1 Njé gə́ Tesalonikə 2: SBA2015
Highlight
Share
Copy
Want to have your highlights saved across all your devices? Sign up or sign in
Ngambai Bible © Alliance Biblique du Tchad 1989, 2015.