1 Samel 18
18
Kwa kura lə Jonatan deḛ gə Dabid lé
1Loo gə́ Dabid tɔl ta gə́ yeḛ wɔji gə Sawul bém ndá léegəneeya Jonatan ɔm mée na̰’d gə Dabid. Jonatan ndigee to gə́ yeḛ ndigi ne darəa-yeḛ bèe. 2Mee ndəa’g neelé ya Sawul ɔg Dabid naŋg ɓó yá̰ aree tel aw kəi lə bɔbeeje el ŋga. 3Jonatan man rəa ar Dabid mbata yeḛ ndigee to gə́ ndigi ne darəa-yeḛ bèe. 4Yeḛ ɔr kubu ləa gə́ boi yul rəa’g ar Dabid. Yeḛ aree kubuje ləa ləm, gə kiambas ləa kara ləm, gə ɓandaŋg ləa ləma, gə ndar ləa ləm tɔ.
5Dabid teḛkɔr dɔ looje lai gə́ Sawul ulá aree aw keneŋ lé. Sawul aree si gə́ ɓée njérɔje ndá lel koso-dəwje lai ləm, kuraje lə Sawul ya kara lel dee ləm tɔ.
Sawul ra kəmkəḭ dɔ Dabid’g
6Ndɔ gə́ d’ḭ loo-rɔ’g tel loo gə́ Dabid tɔl dəw gə́ Pilisti lé ndá denéje d’unda loo mee ɓee-booje gə́ Israɛl bura teḛ d’aw tila kəm mbai Sawul lé. D’ɔs pa ləm, là ləm tɔ gə dalèje gə nékimje ra ne né wəl-wəl gə rɔlel tɔ. 7Denéje gə́ d’ɔs pa lé d’ila na̰ ta’g pana:
Sawul tɔl njéba̰je tɔl-dɔg-dɔg (1.000)
Nɛ Dabid tɔl dee tɔl-dɔg-loo-dɔg-dɔg (10.000)#1Sam 21.12, 29.5.
8Mee Sawul ea̰ yaa̰ mbata ta neelé lelee el. Yeḛ pana: Deḛ d’ar Dabid kea̰ tɔl-dɔg-loo-dɔg (10.000) nɛ kama ndá d’am tɔl-dɔg (1.000) ba! Né gə́ lalee lé to ɓeeko̰ ya kára ba ŋga. 9Un kudee mee ndəa’g neelé Sawul oo Dabid gə kəm dɔbee ya gə́ kédé-kédé.
10Bèlè lookàree ndá ndil gə́ yèr gə́ Ala ulá lé ree ula kəm Sawul ndòo aree si aa loo gəl-gəl mee kəi’g ləa. Dabid lé si im né to gə́ yeḛ im ne né ndɔje gə́ kédé’g ləm, Sawul si gə ko̰-niŋga ləa jia’g ləm tɔ. 11Sawul wa ko̰-niŋga ləa mèr-mèr pa ne ta mée’g pana: M’a kur ne Dabid rədee kaar bɔrɔ’g. Nɛ Dabid sa rəa rəa’g as gɔl joo. 12Sawul ɓəl Dabid mbata Njesigənea̰ nai gə Dabid nɛ yeḛ uba Sawul yá̰. 13Ndá Sawul ɔree rəa’g undá loo gə́ əw’g aree to mbai dɔ njérɔje gə́ tɔl-dɔg (1.000). Dabid teḛ ɔr no̰ njérɔje aw sə dee raga ləm, tel sə dee ɓée ləm tɔ. 14Yeḛ teḛkɔr dɔ kula reaje’g lai mbata Njesigənea̰ nai səa ya. 15Loo gə́ Sawul oo to gə́ yeḛ teḛkɔr gə́ kédé-kédé ndá yeḛ ɓəlee. 16Nɛ Israɛlje gə Judaje lai ndigi Dabid mbata yeḛ ɔr no̰ dee aw sə dee raga ləm, tel sə dee ɓée ləm tɔ.
Dabid taa Mikal, ŋgolə Sawul gə́ dené ləa
17Sawul ula Dabid pana: Aa oo, m’a kari Merab, ŋgondərm gə́ dené ləi. Maji kari wa rɔi gə́ diŋgam ya ra né am ləm, rɔ rɔje lə Njesigənea̰ ləm tɔ. Nɛ Sawul pa mée’g pana: Ma m’ndigi kun jim kɔrɔ ne rəa el, nɛ maji kar ji Pilistije ɓa ɔrɔ rəa.
18Dabid ila Sawul’g pana: See m’unda bḭ ɗi əsé ginkojim to gə́ ɗi əsé njémeekəije lə bɔm d’as ɗi mee ɓee gə́ Israɛl ɓa gə mba kam m’to ne məəm mbaije wa.
19Nɛ loo gə́ ndɔ kar Merab, ŋgolə Sawul tel to ne dené lə Dabid teḛ ndá d’unee d’ar Adriel, dəw gə́ Mehola ɓa təa gə́ dené ləa.
20Mikal, ŋgolə Sawul gə́ dené lé ndigi Dabid yaa̰. D’aw d’ula Sawul taree ndá ta neelé lelee ya. 21Yeḛ pa mée’g pana: M’a karee ya gə mba karee tel to gum kwá karee oso ne ji Pilistije’g. Bèe ɓa Sawul ula Dabid njekɔm’g gɔl joo tɔɓəi pana: Ɓogənè i a tel to meemje. 22Sawul un ndia togə́bè ar kuraje ləa pana: Aw ulaje Dabid gə goo ŋgəḭ ndá uláje pajena: Aa oo, mee mbai lelee dɔi’g ləm, kuraje ləa lai ndigii ləm tɔ. Ɓasinè maji kari to məəm mbaije ya.
23Kuraje lə Sawul tel ndaji taje neelé d’ila mbi Dabid’g. Nɛ Dabid ila dee keneŋ pana: See seḭ ooje to gə́ tel to məəm mbaije lé to né gə́ lam ba wa. Ma lé m’to dəw gə́ njendoo ləm, m’to dəw gə́ m’əḭ el ləm tɔ.
24Kuraje lə Sawul d’un ta gə́ Dabid ila dee keneŋ lé d’aw d’ula Sawul.
25Sawul pana: Seḭ a paje togə́bè karje Dabid pajena: Mbai lé dəji lar dené el nɛ yeḛ ndigi kiŋga ndar tamɔd Pilistije as tɔl (100) gə mba dal ne ba̰ ləa gə njéba̰je ləa.
Sawul wɔji mée’g mba kar Dabid oso ne ji Pilistije’g. 26Kuraje lə Sawul d’un ta neelé d’aw d’ula Dabid ndá Dabid ndigi ra bèe mba tel to ne məəm mbaije lé ya. 27Kédé ɓa kar ndɔ gə́ d’wɔji as ɓəi ndá Dabid ḭ aw gə dəwje ləa aw tɔl ne diŋgamje tɔl-joo (200) mbuna Pilistije’g. Yeḛ ree gə ndar tamɔd dee ar mbai as dɔ lé gə́ yeḛ dəji lé gə mba tel to ne məəm mbaije lé. Togə́bè ɓa Sawul aree ne Mikal, ŋgonee gə́ dené lé gə́ dené ləa ya.
28Sawul oo bèe ndá yeḛ gər gao to gə́ Njesigənea̰ nai gə Dabid. Tɔɓəi Mikal, ŋgonee gə́ dené lé ndigi Dabid tɔ. 29Sawul ɓəl Dabid gə́ kédé-kédé ləm, yeḛ undá gə́ njeba̰ ləa ya gə no̰ ləm tɔ.
30Mbaije gə́ Pilisti teḛ d’aw loo-rɔ’g mba rɔ gə Israɛlje. Nɛ gə ndɔje kára-kára lai gə́ d’aw loo-rɔ’g lé Dabid dum dɔ dee ur dɔ kuraje’g lə Sawul lai ndá ria ɓar ne yaa̰ tɔ.
Currently Selected:
1 Samel 18: SBA2015
Highlight
Copy
Compare
Share
Want to have your highlights saved across all your devices? Sign up or sign in
Ngambai Bible © Alliance Biblique du Tchad 1989, 2015.
