1 Samel 13

Kḭ gə́ Israɛlje d’ḭ gə Pilistije lé

1Sawul lé ləbee as ... loo gə́ yeḛ tel to mbai ndá yeḛ o̰ ɓee dɔ Israɛlje’g as ləb joo. 2Tɔɓəi Sawul mbər njérɔje gə́ Israɛl as tɔl-dɔg-loo-munda (3.000) ndá ar deḛ gə́ tɔl-dɔg-loo-joo (2.000) d’isi səa Mikmas ləm gə dɔ mbal gə́ Betel ləm, ar deḛ gə́ tɔl-dɔg (1.000) d’isi gə Jonatan mee ɓee gə́ Gibea gə́ ka̰ Bḛjamije ləm tɔ. Ndá yeḛ ya̰ ges koso-dəwje gə́ nai lé ar nana kara aw kəi-kubu’g ləa-ləa.

3Jonatan dum dɔ kudu-njérɔje lə Pilistije gə́ loo-si dee to Gibea ndá Pilistije d’oo taree. Sawul ar dee d’im to̰to̰ mee ɓeeko̰’g lai pana: Maji kar Ǝbrəje tuga mbi dee d’oo ne maji. 4Israɛlje lai d’oo to gə́ deḛ pana: Sawul dum dɔ kudu njérɔje lə Pilistije ndá Israɛlje tel to kḛji kəm Pilistije’g. Bèe ɓa deḛ ɓar njérɔje d’ar dee mbo̰ dɔ na̰ rɔ Sawul’g Gilgal. 5Pilistije mbo̰ dɔ na̰ mba rɔ gə Israɛlje. Deḛ d’aw gə pusu-rɔje tɔl-dɔg (1.000) ləm, gə njérɔ gə́ gə kundaje tɔl-dɔg-loo-misa̰ (6.000) ləm tɔ, tɔɓəi njérɔje lé bula dum tura asəna gə nagəra gə́ to ta baa-boo-kad’g bèe. Deḛ d’aw d’wa loo-si dee Mikmas, par gə́ bər lə Bet-Aben. 6Njérɔje gə́ Israɛl d’oo to gə́ d’un kəi dee lad mbata ɓeb dee ɓeb ndá deḛ d’aw d’iya rɔ dee mee bolè mbalje’g ləm, gə mee bèmèje’g ləm, gə mbuna mbalje’g ləm, gə mee kəi-gadje’g ləma, gə mee godə-bwa-manje’g ləm tɔ. 7Ǝbrəje gə́ na̰je kara d’unda mán baa gə́ Jurdɛ̰ gaŋg d’aḭ d’aw ɓeeje gə́ Gad gə Galaad tɔ.

Sawul ɓa nai Gilgal ɓəi ndá njérɔje lai gə́ nai rəa’g lé d’unda bala tigi-tigi. 8Yeḛ ŋgina ndɔ siri gə goo kwɔjee gə́ Samel wɔji lé. Nɛ Samel ree Gilgal el ɓəi ndá njérɔje sanéna̰ kad-kad rɔ Sawul’g#1Sam 10.8. 9Yen ŋga Sawul pana: Reeje gə nékinjaməs gə́ ka̰ roo ləm, gə nékinjaməs gə́ ka̰ kiŋga meelɔm ləm tɔ amje. Ndá yeḛ inja nékinjaməs gə́ ka̰ roo lé. 10Loo gə́ yeḛ tɔl kula nékinjaməs gə́ ka̰ roo lé bém mba̰ ndá aa oo, Samel ree ndá Sawul teḛ aw tila kəmee mba rəa lapia.

11Samel dəjee pana: See ɗi ɓa i ra bèe wa.

Sawul ilá keneŋ pana: Loo gə́ m’oo to gə́ dəwje sanéna̰ rɔm’g kad-kad ləm, i kara ree gə kàr kwɔji gə́ i wɔji lé el ləma, Pilistije kara mbo̰ dɔ na̰ Mikmas ləm tɔ 12ndá m’ə̰ji m’pana: Pilistije d’a gə́ ree ɓugu na̰ dɔm’g Gilgal’g nɛ ma m’ra ndòo rɔ Njesigənea̰’g el ɓəi! Yee gə́ bèe ɓa m’ḭ ne gə dɔrɔm m’inja ne nékinjaməs gə́ ka̰ roo lé gə mbəa.

13Samel ula Sawul pana: I ra némbə mbata i aa dɔ godndu gə́ Ala ləi gə́ Njesigənea̰ un ari lé el. Ɓó lé i aa dɔ godndəaje lé ɓa bèe ndá Njesigənea̰ a gə kar ko̰ gə́ i o̰ ɓee dɔ Israɛlje’g lé to njaŋg gə no̰ ya. 14Nɛ ɓasinè kuru ko̰ɓee ləi a kəw el. Njesigənea̰ ɔr dəw gə́ ḭ mée’g ndá yeḛ wɔji karee to mbai dɔ koso-dəwje ləa mbata i lé i aa dɔ godndu Njesigənea̰ gə́ yeḛ un ari lé el#NNk 13.22.

15Bèe ɓa Samel ḭta ndá ḭ Gilgal aw gə́ Gibea lə Bḛjamije. Sawul tən njérɔje gə́ nai səa ndá d’as dəwje tɔl-misa̰ (600) jén bèe. 16Sawul gə ŋgonee gə́ Jonatan, gə njérɔje gə́ nai rɔ dee’g lé d’isi ɓee gə́ Gibea lə Bḛjamije ləm, Pilistije kara d’isi loo-si dee gə́ Mikmas’g ləm tɔ. 17Kudu-dəwje gə́ njékaw waije munda d’ḭ loo-si Pilistije’g gə mba kaw wai ndá njé gə́ kudu kára d’aw gə rəw gə́ a teḛ Opra par gə́ ɓee gə́ Sual tɔ. 18Njé gə́ raŋg d’un rəw gə́ aw gə́ Bet-Oron ləm, kudu dee gə́ njekɔm’g munda un rəw gə́ tel kəmee par gə́ ŋgaŋ loo gə́ wɔji dɔ wəl-loo gə́ Seboyim gə́ to mbɔr dɔdilaloo’g ləm tɔ.

19Mee ɓee gə́ Israɛl lai lé a kiŋga njekɔr kára kara keneŋ el mbata Pilistije pana: Ar sí j’ɔgje Ǝbrəje dɔ koo kiambasje’g əsé niŋgaje’g tɔ. 20Diŋgam gə́ rara gə́ Israɛl lé aw ɓee lə Pilistije ɓa tɔ ŋgaŋ kwɔs-maŋg ləa ləm, gə kwɔs ləa ləm, gə tina ləa ləma, gə marm ləa ləm tɔ. 21Tɔ ŋgaŋ marmje ləm, gə kwɔsje ləm, gə kag-larje gə́ ta dee tɔ munda-munda ləma, gə tinaje ləm tɔ əsé ndɔji ndo̰ nékad gə́ d’ɔs ne kudu maŋgje ləm tɔ lé lar dee as ŋgon lar kára gə́ kaiyee loo munda bèe. 22Mee ndɔ rɔ’g lé d’iŋga kiambas gə niŋga ji njérɔje’g lai gə́ d’aw gə Sawul gə Jonatan el nɛ Sawul gə ŋgonee Jonatan ɓa néje neelé to ji dee’g ya. 23Kudu-njérɔje lə Pilistije kára ree d’isi béréré gaŋg loo dəs kaw gə́ Mikmas tɔ.

Currently Selected:

1 Samel 13: SBA2015

Highlight

Copy

Compare