1 Mbaije 19
19
Mee Eli ila kas
1Akab ɔr goo néje lai gə́ Eli ra ar dené ləa Jejabel oo ləm, aree oo loo tɔl gə́ yeḛ tɔl njéteggintaje lai gə kiambas lé ləm tɔ. 2Ndá Jejabel ula njekaḭkula kára rɔ Eli’g gə mba karee ulá pana: Ɓó lé bèlè kàr gə́ togə́bè ya m’ar kəmə ləi godo to gə́ i ar ka̰-dee deḛ godo ne bèe el ndá maji kar magəje ra səm nédɔkudu gə́ al dɔ ka̰ dee-deḛ ya! 3Loo gə́ Eli oo ta neelé ndá yeḛ ḭ sa rəa aḭ aw gə mba kaji rəa. Yeḛ teḛ Beer-Seba gə́ to ɓee lə Juda ndá yeḛ ya̰ kura ləa keneŋ tɔ. 4Nɛ yeḛ lé aw njaa dɔdilaloo’g as ndɔ kára doŋgɔ ɓa aw si gel kag-sam’g ndá yeḛ ndiŋga yoo pana: Asm ŋga! Ɓasinè lé Njesigənea̰, ɔr kəmə ləm mbata ma m’to maji m’unda bɔmje-je el#Jun 4.3.
5Yeḛ to naŋg ndá yeḛ toɓi gel kag-sam’g lé. Nɛ aa oo, kura gə́ dara ɔrɔ rəa ulá pana: Ḭta sɔ né.
6Yeḛ aa loo ndá oo mbə gə́ kila dɔ kɔr mbal gə́ taa pər gəgəgə’g to mbɔree’g ləm, mán to mee ku’g ləm tɔ. Yeḛ sɔ gə ai ɓa tel to naŋg gogo ɓəi. 7Kura lə Njesigənea̰ tel ree njekɔm’g gɔl joo ɔrɔ rəa ulá pana: Ḭta sɔ né mbata rəw nai nɔḭ’g əw yaa̰ ɓəi.
8Yeḛ ḭta sɔ né ləm, gə ai mán ləm tɔ, gə goo nésɔ nee gə́ aree siŋga lé ɓa yeḛ njaa ne ndəa rɔ-sɔ dan kàrá gə loondul’g saar teḛ ne Oreb, dɔ mbal’g lə Ala ya.
Ala tel ula diŋgam mee Eli’g
9Lée neelé ɓa yeḛ andə mee bolè mbal’g gə mba toɓi keneŋ. Yen ŋga Njesigənea̰ dəjee ta togə́bè pana: Eli, see ɗi ɓa i ree ra loo gə́ nee’g wa.
10Yeḛ tel ilá keneŋ pana: Ma m’riba dɔ ri Njesigənea̰, Ala gə́ njeboo-néje lé gə goo malee gə́ ram ŋgwɔd-ŋgwɔd ya, mbata Israɛlje d’uba goo manrɔ ləi d’ya̰ ləm, deḛ tɔs loo-nékinjanéməsje ləi tila ləma, deḛ tɔl njéteggintaje ləi gə kiambas ləm tɔ, ma nja m’nai gə karm ba ndá deḛ saŋg loo mba tɔlm tɔ#Rɔm 11.3.
11Njesigənea̰ pana: Gə́ teḛ raga, aar dɔ mbal’g no̰ Njesigənea̰’g! Nɛ aa oo, Njesigənea̰ lé dəs tar.
Loo gə́ no̰ Njesigənea̰’g lé lel-boo gə́ to ɓəl kədm-kədm ula ar mbalje ta̰ ləm, təd mbalje njigi-njigi ləm tɔ nɛ Njesigənea̰ godo dan lel-boo’g lé. Goo lel-boo’g ndá naŋg yə nɛ Njesigənea̰ godo dan naŋg gə́ yə’g lé tɔ. 12Goo naŋg gə́ yə’g lé ndá pər teḛ to nɛ Njesigənea̰ godo dan pər’g. Goo pər’d ndá ndu dəw ɓar jan-jan bèe. 13Loo gə́ Eli oo ndá yeḛ on kəmee gə kubu ləa gə́ boi yul ləm, yeḛ teḛ aar ta bolè mbal’g ləm tɔ. Aa oo, ndu dəw teḛ oso mbia’g togə́bè pana: Eli, see ɗi ɓa i ree ra loo gə́ nee’g wa.
14Yeḛ ilá keneŋ pana: Ma m’riba dɔ ri Njesigənea̰, Ala gə́ njeboo-néje lé gə goo malee gə́ ram ŋgwɔd-ŋgwɔd ya, mbata Israɛlje d’uba goo manrɔ ləi d’ya̰ ləm, deḛ tɔs loo-nékinjanéməsje ləi tila ləma, deḛ tɔl njéteggintaje ləi gə kiambas ləm tɔ, ma nja m’nai gə karm ba ndá deḛ saŋg loo mba tɔlm tɔ.
15Njesigənea̰ ulá pana: Tel aw un rəw gə́ dɔdilaloo’g gogo saar teḛ Damas nɛ loo gə́ i teḛ keneŋ ndá i a kwa dɔ Ajael gə ubu mba kundá gə́ mbai gə́ Siri#2Mb 8.7-13. 16Jehu, ŋgolə Nimsi kara i a kwa dəa gə ubu kundá ne gə́ mbai lə Israɛlje, tɔɓəi i a kwa dɔ Elije, ŋgolə Sapat gə́ si Abel-Mehola gə ubu mba kundá gə́ njetegginta tori’g tɔ#2Mb 9.2-6. 17Bèe ɓa gə mba kar deḛ gə́ d’a teḛ ta kiambas’g lə Ajael lé Jehu a tɔl dee ya, tɔɓəi deḛ gə́ teḛ ta kiambas’g lə Jehu ndá Elije ɓa a tɔl dee tɔ. 18Nɛ m’a kya̰ dəwje tɔl-dɔg-loo-siri (700) kəmba mee ɓee gə́ Israɛl, deḛ lai gə́ d’ɔs kəji dee naŋg no̰ magə-Baal’g el ləm, gə deḛ lai gə́ tɔnee gə ndo̰ dee el ləm tɔ#Rɔm 11.4.
Eli ɔr Elije mba karee taa toree
19Eli ḭ lée’g nee aw iŋga Elije, ŋgolə Sapat gə́ aar ndɔ-ndɔ. Maŋgje joo-joo loo dɔg-gir-dee-joo d’aw nea̰’g ndá yeḛ orè goo dee gə dee gə́ d’ɔm dee’g dɔg-gir-dee-joo lé tɔ. Eli aw pər gə́ rəa’g ndá yeḛ ila kubu ləa gə́ boi yul dəa’g. 20Léegəneeya Elije uba maŋgje ləa ya̰ dee aiŋgwɔd goo Eli’g ndá yeḛ dəjee pana: Ya̰’m am m’aw m’il ɓɔl bɔmje gə kɔmje ɓa m’a kaw gooi’g ɓəi.
Eli tel ilá keneŋ pana: Aw ndá tel ree: mbata maji kari ə̰ji dɔ né’d gə́ ma m’ra səi lé.
21Loo gə́ yeḛ ya̰ Eli gə kuree ndá yeḛ tel ree wa bɔ maŋgje joo inja dee gə́ nékinjanéməsje ləm, yeḛ ndiri dakas dee gə néməməna̰ gə kag-kɔs lə maŋgje lé ya ar dəwje d’usɔ ləm tɔ. Tɔɓəi yeḛ ɔd aw goo Eli’g aw ra né aree tɔ.
Currently Selected:
1 Mbaije 19: SBA2015
Highlight
Copy
Compare
Share
Want to have your highlights saved across all your devices? Sign up or sign in
Ngambai Bible © Alliance Biblique du Tchad 1989, 2015.
